方力申與鄧麗欣分手後四年冇拖拍 陳瀅篤爆小方媾過佢
文：東方新地 ｜ 圖：myTV super截圖
方力申聲稱近四年一直單身
由伍詠薇、阿Bob林盛斌主持的《Tiger’s Talk》最新一集，邀請了聲稱單身的方力申、唐詩詠、陳瀅任嘉賓，方力申同鄧麗欣呢對鏡頭前後的真拖友，拍拖十年未能修成正果，最後分手收場，Stephy其後戀上台灣藝人王子，小方在節目中坦言分手後近四年來未有新戀情。
阿Bob爆方力申要求介紹後生女
方力申約女次數：「一隻手數到﹗」
主持之一阿Bob話小方好少約異性單獨約會，所以錯失不少姻緣，小方解釋：「因為係我出道嗰個年代好多狗仔隊，慣咗收埋自己，所以我人生同單身而又有機會發展嘅女仔係好少，一隻手數得晒。」
爆方力申屎橋媾女法
方力申話自己甚少約女單獨出街，陳瀅立即玩踢爆：「佢（指小方）有約過我，有一日突然問我可唔可以同佢單獨食飯，但後來冇發生到嘅，事緣因為疫情我由溫哥華返嚟，佢怕我悶就叫我打電話畀個星座專家，個星座師傅話我2023、24年會同個點樣點樣嘅男仔結婚，個男仔係屬猴嘅，之後我打番畀小方，同佢講個師傅同我講咗啲乜，佢話個師傅又係咁同佢講，佢又咁啱係屬猴嘅，所以懷疑佢畀錢個師傅。」陳瀅踢爆小方曾對她有意，更暗笑小方的屎橋媾女法未能成事﹗
陳瀅評小方：「除咗心地好我諗唔到啲咩﹗」
陳瀅被伍姑娘大逼供係咪專釣金龜？陳瀅直言過去拖友富貴同冇錢都有，又豪言：「其實我自己搵到錢嘅﹗」小方又笑指陳瀅一定飛人居多，陳瀅一臉認真話：「上一段感情我係被人飛嘅﹗」主持又問陳瀅鍾意咩類型男仔？陳瀅即指住小方，大讚佢心地好：「我成日都媾佢㗎，你哋唔信咩？我覺得佢真係好男仔，心地好，不過心地好之外諗唔到啲咩﹗」
陳瀅逼小方當眾「求婚」
陳瀅爆曾被小方追求，小方一臉尷尬，而陳瀅的情緒愈來愈高漲，表現勁high，又話自己過去因為唔知道咩類型男仔合適自己，所以前度非同一類別男仔，每次拍拖都係慢慢了解才知是否合拍，但現在心態卻完全改變，因為現在已經ready結婚，所以如遇到心儀對象會主動出擊，隨即將自己手上的戒指除下遞給小方，阿Bob和伍姑娘起哄：「嚟啦，隻手伸咗出嚟，戒指呀，戴上去啦﹗」小方呆坐唔識畀反應，陳瀅硬把戒指塞畀小方：「戒指畀埋你，唔使買呀﹗」小方拍落陳瀅手度，並拎住戒指戴上自己尾指，唔中陳瀅的圈套為她戴上戒指。
陳瀅主動「合巹交杯」
坐在小方同陳瀅中間的唐詩詠聯同阿Bob、伍姑娘玩嘢起身走人，笑言留給二人相處機會，小方尷尬地飲紅酒遮醜，陳瀅便愈來愈興奮，不停拍打又捽方力申手臂，然後拎起紅酒，主動翹實小方隻手玩「合巹交杯」小方嚇到呆咗，最後又玩埋拋花球，陳瀅最為盡興﹗
方力申同陳瀅三年前曾傳緋聞，被影到結伴到蘭桂坊，有指是糖妹做媒人，有指當時陳瀅剛與賭王仔猷亨分手，近月有傳陳瀅同賭王仔猷亨復合，7月時一連兩日現身賭王葬禮上，看來小方今次又係無米粥﹗
最後阿Bob同伍姑娘、唐詩詠起身走人，伍姑娘更笑言將時間交畀方生方太，小方尷尬到飲紅酒。
