「翻版吳彥祖」朱凌凌遇正版晒合照 網民笑稱：「廿年後似XXX就真﹗」
撰文：東方新地 ｜圖：吳偉豪IG、東方新地
朱凌凌獲馮盈盈爭住集郵
「朱凌凌」吳偉豪年僅22歲，高大靚仔，在《愛・回家》被稱為島大（劇中大學）吳彥祖，而現實中，亦因為外型出眾，貌似吳彥祖，成為無綫新一代男神，有不少女粉絲，連女神馮盈盈都爭住向佢集郵。「朱凌凌」吳偉豪貼出野生捕獲吳彥祖的合照，正版翻版撞到正，成功吸like，不過有網民卻指朱凌凌廿年後唔會似吳彥祖，而是似大奸角駱達華，拼埋一睇，大家臉型、髮型相似，又同是眉粗眼大鼻圓，輪廓的確有八分相似，不少網民亦和應：「似駱達華仲好，起碼唔崩壞冇甩毛吖﹗」唔知朱凌凌點揀呢？
45歲甩毛吳彥祖變油膩大叔
45歲的吳彥祖近年甚少在港見他蹤影，長居美國的他唔怕出街被狗仔隊影，唔使出席公開活動保持型男形象，不用打扮連外表都唔著緊，近日出po開快車的片段，髮線嚴重向上移，最嚇人係雙下巴又滿臉油光，成個油膩大叔，網民嘆昔日男神去咗邊？
男神徹底崩壞。
開快車加速自high大叫
吳彥祖在社交網上載一段揸快車自拍片段，片段中他表示試開一架保時捷GT3 touring，更聽到佢加速的引擎聲音，吳彥祖開住快車入隊道，佢表現勁high，不時發出叫聲，不過大家都錯重點，焦點全落在他髮線嚴重上移，又披頭散髮，網民心痛吳彥祖的脫髮現象明顯再進一步嚴重，而且他滿臉油光，再加埋個雙下巴，令人感慨男神都會老，昔日男神已徹底崩壞，變成中年油膩大叔無異，歲月催人老。
吳彥祖回復精神男神回歸
30幾度高溫、頂住烈日、載歌載舞成粒鐘，天王城城郭富城因為一場慈善演唱會再次成為港人頭號男神，54歲有氣有力，頭髮濃密，仲要咁靚仔㖭，點夠佢玩？不過都唔係個個男神都食咗防腐劑一樣得天獨厚嘅，繼起晒摺嘅 Edison 陳冠希同鬚都白埋嘅死敵余文樂後，較早前吳彥祖到訪台灣探友人合照外洩，就被粉絲嫌棄髮線嚴重向後移兼面容蒼老，男神崩壞大叔味濃喎！
近年帶埋妻女定居美國主打拍美劇，早前吳彥祖又有新相流出。今次同老婆 Lisa S. 同就快七歲嘅囡囡 Raven 連同親友一齊拜祭亡母。頭髮生長咗髮型唔同咗休息又足夠，今次男神個樣精神番晒，疑似上次走樣都係燈光同角度壞事居多。
結婚十年同Lisa.S 修成夫妻額
不過結婚十年，兩夫妻愈嚟愈有夫妻相就真嘅，尤其係個額頭又高又圓又反光，仲要同一個角度同一款笑容幸福到暈。留意番企喺兩公婆中間挨住媽咪嘅就係七歲嘅 Raven，正面樣被公開絕對罕有。爸爸媽媽抵唔住歲月洗禮，好彩囡囡完全繼承男神同名模完美基因，愈大愈靚！
角度問題？！甩毛男神吳彥祖
吳彥祖和太太LisaS.及七歲囡囡Raven移居美國，早前到訪台灣，被當地女藝人貼出合照，網民驚訝不已，並不是因為久未露面，而是被稱為一代男神吳彥祖的髮線嚇親，相片可見其髮線嚴重向上移，頭髮稀疏，網民悲痛大叫男神崩壞。
