反黑英雄 朱晨麗首集動作戲被箍頸標晒眼水兼伸脷 動作場面險命懸一線

朱晨麗飾 Madam Pang 與毒品拆家激烈對戰

昨晚（24日）一集，飾演反黑Madam彭穎琪的朱晨麗（朱朱）大晒好身手，她與飾演毒品拆家周龍的李善恆的一場埋身肉搏戲相當搶Fo！二人拳來腳往激戰一輪後，朱朱即大晒「過肩摔」將大隻仔李善恆撻爆玻璃；大隻仔之後反擊將朱朱擒獲、將其整個人抱起兼猛力撞向天花板，力度之大令假天花也被撞至粉碎！

朱晨麗自爆新角色係一大挑戰

之後大隻仔乘勢追擊，手執電線用力箍實朱朱頸頭之餘，又猛力扯朱朱頭髮將其拖行，幸好就在最危急關頭時，山聰及時趕到將李善恆擊斃。談到在劇中打戲連場，朱朱受訪時坦言是一大挑戰：

「第一次演戲畀人打，因為之前都係做啲比較好打嘅角色，但今次啲對手全部都係重量級，好勁、好打得！知道要接呢個角色後，我都有特別去操Fit啲自己，武指同導演都好錫我，知道我係舞蹈員出身，特別設計咗啲我比較擅長嘅動作畀我，等我打得靚啲之餘，觀眾都睇得好爽。」

第二個版本加插「箍頸、撞天花」

談到與李善恆激戰戲，朱朱透露箍頸、撞假天花等都是後來加插的：「佳導睇咗第一次拍攝後，覺得呢場戲有好多細節位可以拍得精彩啲，所以拍咗第二個版本，加咗啲箍頸、撞天花板同埋一嘢揈落牆呢啲動作。」朱朱續指為求呈現最真實畫面，很多動作都是親身上陣，並透露拍攝被箍頸戲時險生意外：

「我其實出現咗失誤，原本我係要好快咁伸隻手指入去條電線度，等佢唔好箍得咁實，但係嗰吓我失誤擺唔到隻手指入去，當時我又嗌唔到出聲（示意失誤），標晒眼水咁，同條脷係好自然咁樣伸咗出嚟，大家都唔知我失誤，以為我係演緊戲，好彩最後都冇事，導演都話嗰一Take係最好！」

朱晨麗帶隊肉搏勇擒毒販 鏡頭後打得辛苦爆汗險跣低

拍攝呢幕追捕場口，朱朱盡量親身上陣，見到都唔錫身咁周圍跑，仲差啲跣低，由於涉及槍戰畫面，拍攝時現場不停爆破嘅反應彈，朱朱事後話有被嚇親，額頭仲滴住汗，而埋身肉搏場口，朱朱亦跟武指排練動作，務求做出勇猛感覺，雖然成個過程都好緊張，但係朱朱不時都喺鏡頭前展現佻皮一面。