林二汶做《聲夢2》導師傳被飛出節目 ViuTV火速換自己人頂上

林二汶 被批「食兩家茶禮」

《又要威又要戴頭盔》是《晚吹》系列中最長壽的一個節目，由ViuTV開台至今已播了超過6年，期間節目一直由林二汶和商台DJ余迪偉拍檔主持，此外林二汶又曾在2020年為ViuTV選秀節目《全民造星3》擔任導師，去年更於ViuTV的《Chill Club推介榜年度推介20/21》頒獎禮上奪得「年度女歌手金獎」，因此她近日宣布為TVB《聲夢傳奇2》擔任導師時，惹來不少網民負評，狠批她「食兩家茶禮」。

網民望搵更「成熟」主持人

近日有消息指林二汶將被飛出《又要威又要戴頭盔》，而她主持的最後一集節目已在本周四（5月26日）播出，下周四（6月2日）將由Asha（徐㴓喬）臨危頂上做主持，有網民力撐林二汶並非ViuTV藝人，自由身鍾意去邊都得，亦有網民指出Asha只是代班，同時擔心以Asha的口才未必能擔得起這類節目的主持工作，希望ViuTV能搵一個較為「成熟」的主持人，去「永久」取替林二汶。

重溫林二汶強調「音樂無分邊界」

去年11月19日無綫電視台慶55周年，當時被外界認為是ViuTV常客，兼《全民造星3》導師的林二汶「驚喜」現身在「女星勁歌熱舞賀台慶」環節與其他女星歌手一齊獻唱，令不少網友大感意外，亦有不少人表示對她「食兩家茶禮」的行為表示失望。事後林二汶亦有開腔解釋自己兩邊走的原因，強調「音樂無分邊界」是自己的信仰：

其實我做咗廿年音樂，我一直都好相信，音樂係應該冇分國界，無分任何嘅邊界，因為音樂本來係應該要嚟溝通，而唔係孤立，我哋其實一直追求緊係百花齊放，唔係咩？

我今年開咗自己嘅音樂教室，我想嘗試傳遞一個訊息，就係音樂應該係冇分邊界，應該一心只為音樂嘅發展，如果我分得咁清，咁我教出嚟嘅學生，唔係會墨守成規同故步自封咩？我哋做音樂嘅人，我教出嚟嘅學生，我希望佢哋明白一個訊息，音樂係應該懂得海納百川。

網友支持：不要為反而反

對於林二汶的自白，網友有兩極反應，有人表示支持：「音樂大同，何必區分？想樂壇有健康發展就要放棄這種錯誤觀念！」、「以前大台獨大又話人霸道，到而家人地容得下其他歌手，就話歌手食兩家茶禮。一個人要為反而反，真係可以幾無恥都做得出」、「以前 tvb 嘅要求比人鬧，而家放寬咗，歌手又比人話⋯⋯其實，呢類人可以直頭 ignore⋯⋯」

亦有網友表示為生存無可厚非：「其實是否香港人出糧比二汶？老實講鏡仔巳經用咗一大半市場，其他人唔使揾食？是否反對的人養二汶，人要生存，最重要又唔係呃又唔係搶，點解現在啲香港人咁小氣，反對的聲音人仕只會供養鏡仔，其他人無工作，無收入，可以點？北上又閙，另一個台又閙，真可悲⋯⋯」

不少觀眾期待更開放平台：「支持二汶， 就算食兩家茶禮又如何， 人地係獨立歌手，食三家茶禮都仲得，而家有三個免費電視台，上多幾個節目，賺多幾個錢，好ok， 好開心可以見到歌手演員們，唔洗再被一間電視台綁死。」