林子善父親驚喜派「超強洋蔥」 《給20年後兒子的信》回憶育兒心得
林子善父親難忘陪兒子晚晚瘋狂掌上壓:「好開心,你記唔記得?」
林父全程慈祥地邊笑邊讀出對兒子心底話:「二十年後子善六十一歲,我都變咗阿伯,我相信子善仲係咁錫佢老婆同佢個女,我相信佢一家都好快樂。」林父揭出當年曾拼命晚晚陪子善做掌上壓,目的只是想阿仔有個伴:
「你細個我哋兩仔爺晚晚走去玩掌上壓玩幾百吓,五十吓一組,玩七組,嗰時你老豆又唔衰得,你玩咁多我玩咁多,其實我都想鼓勵你,等你有個伴,你做我又做,好開心,你記唔記得?」
回憶教仔點滴: 「打在兒身 痛在爸爸心、媽咪心」
林父續指小時候為了教好子善不惜體罰,但暗地其實很心痛:「希望你哋唔好記喺心,爸爸都係用心良苦,打在兒身,痛在爸爸心、媽咪心。」並謂每次體罰完子善,必定花上整個小時解釋原因,令子善明白為何被打。與子善同樣感性的林爸爸,最後勁有愛謂:「好多謝你子善,你同阿哥都好孝順,都係爸爸嘅緣份。」林父讀到最後強忍眼淚,子善則全程眼淚放題,聽到窩心位又難掩甜笑,畫面溫馨,黎諾懿事後取笑子善謂:「佢真係喊足兩集架喎。」
子善喊足兩集:我係好開心同好感動嘅喊
原來子善淚腺發達並非天生,他在節目中披露不時落淚全因感恩,而令他每分每秒都覺感恩的正是女兒乖乖:「我啲朋友都唔明白我,話你又喊嘅?因為我睇到人生好話唔埋,好多嘢過咗去冇得返轉頭。喊係有開心嘅喊同唔開心嘅喊,我呢種係好開心同好感動嘅喊,就係因為我多咗佢(阿女)喺我身邊,好感恩個天賜咗佢畀我。」講得出做得到的子善,為了為乖乖留下珍貴成長紀錄,才破例罕有地參與綜藝節目錄影:「等佢知道爸爸喺佢細個時,為佢工作咗一日。」
愛錫有堅持 子善父女示範吃飯禮儀
林父教出了感性感恩又善良的子善,子善亦教出了人如其名的乖乖。昨晚子善帶著乖乖與素人家庭的爸爸Michael、5歲大女妃頤及2歲細女玥玥互動。與子善相反,Michael由於要賺錢養家少時間陪女兒,經常遭受女兒無視;節目所見,單是吃飯禮儀,Michael已對兩女兒冇晒符,相反乖乖則全程聽足子善的話,無論叫她拿餐具吃飯、或是要遞濕紙巾照顧妃頤跟玥玥,乖乖都一一照辦;更搞笑的是當子善吃飯時問乖乖問題,乖乖竟搞笑地回應:「食飯唔可以講嘢」,令子善忍不住直豎姆指。
![林子善 父親 昨晚網民大讚乖乖人如其名,並大讚子善與太太教得十分好。](https://imgs.sundaykiss.com/wp-content/uploads/2023/09/24_191646619864fcb6d91391f.jpg)
網民大讚「乖乖」:咁乖,生十個我都願
對於乖乖如此聽話,於爸爸爆喊時又永遠第一時間遞紙巾,網民大讚乖女,並力讚子善及Kary:「證明父母平時真係好畀心機湊。」敏之亦曾在節目中抱著乖乖感嘆:「咁乖,生十個我都願。」至於經製作組精心安排的Michael,經過多番錯漏百出的努力,終冧掂兩名囡囡及獲得老婆Winnie認證。另有到現場探班的無綫娛樂新聞台,直擊黎諾懿一頭煙一刻,事緣諾懿撩玥玥玩時不小心搞喊對方,即使事後如何氹玥玥仍無功而還。