【婚姻合伙人】林秀怡瞓身演出 網民大讚演技收放自如
撰文：Kammy｜圖片來源：林秀怡Instagram，TVB Youtube截圖
林秀怡瞓身演出《婚姻合伙人》
現年27歲嘅林秀怡入行11年，最近喺新劇《婚姻合伙人》中飾演施嘉露，同女主角高海寧喺劇中係同事同好姊妹，同陸永喺劇中係歡喜冤家。林秀怡喺劇中可謂瞓身演出，唔只畀陸永摸pat pat，不過佢一啲都唔怯場，仲十分投入拍攝！
另外，林秀怡更同陸永有「出浴戲」！劇中講到佢哋要爭住尋死，林秀怡同陸永糾纏間，陸永更一手拍落女方胸口以圖推開她。林秀怡曾表示，當二人知道劇本有呢一幕時，陸永即時主動提議指不如借位拍攝，因為借位就可以避免掂到女方胸部，不過佢都拒絕咗，仲演得收放出如。
林秀怡
17歲孭起頭家
林秀怡喺劇中角色生動搞笑，不時又有晒性感，佢同陸永嘅互動成功帶動劇集氣氛，更有好多網民大讚佢好好戲。戲外，林秀怡出身單親家庭，父母喺佢8歲嘅時候就離咗婚，一直同媽媽住喺天水圍公屋，相依為命。十幾年前，林媽媽因為跌傷唔可以再做嘢，所以秀怡中學畢業之後，孭起養家嘅責任。
2008年，林秀怡考入演員訓練班。不過，入行頭幾年人工都係得7千蚊，仲要養埋媽咪，個個月畀5千蚊媽媽做家用，自己就唯有節衣縮食，衫都唔敢買多件，所以就唯有撈多幾份兼職，增加收入。
為生計賣避孕套
之前《不懂撒嬌的女人》播出時，林秀怡受訪時講過，試過喺第二度攞貨返嚟擺上網賣，就連避孕套都賣過。為補家計，秀怡更喺被偷拍到喺食肆兼職做傳菜，當時都覺得好尷尬，不過都唔理得人點睇。林秀怡講過，只要有戲做就乜都唔介意，咁辛苦都係想媽咪食好啲住好啲！直到前年，林秀怡終於儲夠本錢，與前藝員葉婷芝等幾位朋友合資，在旺角通菜街開設意大利麵餐廳，生活質素慢慢改善。
林秀怡陪母抗癌
2018年，林媽媽被診斷出患癌，林秀怡喺呢個時候決意將辛辛苦苦儲起嘅40萬血汗錢嚟做媽媽嘅醫藥費。另外，秀怡因為擔心冇人照顧媽媽，幾個月沒有上班零收入，一個人買餸煮飯洗碗負責1日3餐，陪她抗癌。曾經歷癌症之苦的林淑敏得悉後馬上向她介紹醫生，又幫她們分析應到哪裡求診，好有心。
林秀怡細細個就鍾意演戲，入行11年，大多都係演閒角，到2012年拍《怒火街頭2》一場全裸半吊戲，令觀眾對佢留下印象，之後開始有啲「有名有姓」嘅角色做吓，不過發揮嘅機會都係唔多。去到《不懂撒嬌的女人》秀怡做唐詩詠身邊嘅閨蜜，終於開始上位，得到嘅角色戲份都愈來愈重。
事業一直未見起色嗰陣，秀怡都試過趁沖涼嗰陣匿埋喊，唔想畀媽媽知道擔心，好彩佢生性樂觀，喊完就冇事。去年，喺《是咁的， 法官閣下》中擔演其中一個新牌律師，做黃智賢徒弟。好彩林媽媽一直都好支持秀怡，令到秀怡可以放心去追夢。希望秀怡未來會有更多機會，賺多啲錢，可以同媽媽一齊過更安穩嘅生活啦！
