楊怡大爆當年羅仲謙全靠一隻乳豬追到自己

撰文：叮叮、sundaykiss｜圖片：新傳媒資料庫、羅仲謙微博、楊怡Instagram

40歲楊怡宣布陀B 傳5月生得

楊怡下嫁羅仲謙至今已有4年，二人不時在公開場合表示自己非常喜歡小朋友，加上羅仲謙是圍村人，難免會有傳宗接代的壓力。造B工程一直只聞樓梯響，夫婦二人長期分隔兩地工作，更一度因為楊怡脊椎問題要延遲生B。

日前（12日）楊怡與羅仲謙在IG上公布喜訊：「我們的緣份從劇集開始，由同事變朋友，由朋友變情侶，由情侶變伴侶，從今以後……..我們多了一個身份，感恩上天送給我們一份珍貴的禮物，我們之間將會加入一顆小小電燈，寶貝，願你在未來的日子裡時刻照亮我們的生命，願我們在未來的日子裡幸福快樂⋯⋯謝謝你選擇了我，We love you，我們一家期待你的來臨 。」

楊怡又爆羅仲謙知道後，第一個反應竟然係「你唔好亂咁噏吖，你問清楚醫生未？」她分享：「第一次聽BB心跳聲時，原來有D似火車經過」

恭喜晒，楊怡與羅仲謙做父母！

剛公布完造人成功，謙謙工作接踵而來，他會參與無綫新劇《陀槍師姐V》，早前已返電視城試造型，亦會本月16號開拍，努力搵奶粉錢。他都表示怕開劇太忙，之後會無暇照顧楊怡同BB，但呢位24孝爸爸咁愛妻點會冷落佢地啊！

楊怡：我同馬明係最夾

早前，楊怡喺接受港台電台訪問時大談當年老公謙謙係點將佢追到手。楊怡笑指其實當初根本冇特別留意老公羅仲謙，冇諗過自己將會同佢拍拖，冇諗過呢套《On Call36小時》會成為佢嘅人生轉捩點。

佢當時只係專心拍戲，就連大家都完全估唔到，因為呢套戲同楊怡撮合埋一齊嘅居然唔係戲中好拍檔、好情侶馬國明！楊怡話：「真係好奇怪，因為同佢（羅仲謙）係風馬牛不相及嘅人，而且大家都覺得我同馬明係最夾。」

其實，楊怡你唔使奇怪，愛情就係咁，愛情係霎那間嘅火花，愛情本來就係會來得突然，一個本來一直喺你身邊嘅人，你可能會有一日「叮！」一聲，同佢刷出火花。所以，只可以話楊怡你同老公仔羅仲謙係命運中要刷出愛火花嘅一對情侶，係命運將你兩個風馬牛不相及嘅人拉埋一齊。

羅仲謙使出宵夜攻勢

深夜，孤零零一個一個女仔仲要留喺公司做嘢拍戲，咪話唔慘。羅仲謙就識做啦！原來羅仲謙戲拍《On Call》嘅時候，每當女神楊怡要開夜拍劇，羅仲謙都會問楊怡想食咩宵夜，然後每晚準時喺楊怡開夜嘅時候，羅仲謙就以送宵夜嚟嘅名義陪楊怡開夜拍戲喇！

原來羅仲謙呢招宵夜攻勢認真使得架！連楊怡都話雖然當初冇為意到晚晚出動宵夜攻勢嘅羅仲謙其實係追求緊佢，不過楊怡坦言羅仲謙嘅宵夜攻勢的確令佢加咗唔少分，「我好記得有一次。雖然嗰日佢好早收咗工，但我就要開夜。喺開夜嘅時候，佢就專登返返嚟公司請劇組人員食生果同蛋糕。我喺嗰個時候就覺得，佢係個幾唔錯嘅男仔。」

終極一擊：燒豬慶生

各位觀眾，其實楊怡同羅仲謙仲有一樣嘢係證明佢地真係命運中嘅一對，就係原來佢哋兩個嘅生日只係相隔兩日㗎咋！呢個世界邊有咁巧合嘅事，咁都俾佢地遇到，仲唔係天生一對？

講開生日，有暗戀過人嘅你哋都知，第一件事就係要記住人哋幾時生日，到時到候俾啲表示。羅仲謙都係唔例外，佢知道佢同楊怡嘅生日只係相差兩日，仲要大家生日嗰排都一齊拍緊劇，羅仲謙於是就利用先天優勢，同楊怡助手講，不如楊怡同佢同劇組一齊慶生吖！就係咁！成咗事！慶生當日，羅仲謙攞咗隻燒豬出嚟，冇錯！係燒豬！羅仲謙打算用燒豬幫楊怡慶生！真係夠曬特別！就係因為羅仲謙呢隻燒豬，令楊怡同羅仲謙嘅距離拉近咗喇！

楊怡大讚謙謙係好老公

楊怡喺港台個訪問入面仲話雖然羅仲謙份人好懶，去旅行唔到最後都唔執行李，但懶惰嘅羅仲謙，為咗楊怡改變咗，「佢會為咗我而拎背囊，因為我將啲水、旅遊書、遮塞晒比佢拎。」

除此之外，羅仲謙一啲都唔物質主義，唔會特登買花買貴重禮物哄老婆開心。被問到羅仲謙點解咁做，原來因為羅仲謙覺得佢哋兩個嘅感情唔需要用物質去維繫，佢哋兩個過嘅係細水長流嘅愛情。