41歲楊怡 羅仲謙為女兒搞百日宴 晒全家幸福照
楊怡、謙謙和B女穿上白色家庭裝在粉紅色布景板前拍照留念，一家三口樂也融融，Hera BB眼仔碌碌好精靈，戴上口襪仔又露出人人都想咬一口的肥髀髀，真係好可愛呀！楊怡在穿著熱褲下略見未收身，不過看上去精神很好。
新手媽媽楊怡寫道：
親愛的小珍珠，不經不覺，你已經滿三個月，不經不覺，你已在悄悄地成長了，爸爸和媽媽每天都在加深認識和了解你，願你在我們的愛護下更加健康地茁壯成長，memorable days, with a hundred days of blessing, healthy growth!
蛋糕上有酷似囡囡HERA的公仔，化身美人魚BB坐在珍珠上，寓意「如珠如寶」萬千寵愛在一身。
而場地亦放有彩色獨角獸及皇冠汽球等，繽紛非常！
不過不少網民卻錯重點，將百日宴焦點落到媽媽場怡臉上，指認唔到楊怡，從照片上看 ，楊怡以all back髮型示人，樣子包滿，有點新任媽媽未退腫的感覺，不過皮膚白滑，幸福比一切重要！
更有人指楊怡照片上看來竟然與無綫咪神陳婉衡撞樣
肺炎疫情持續，社會氣氛緊張，大家嘅心情都唔會好得去邊，然而娛樂圈仍傳來唔少喜訊，接二連三有藝人宣布懷孕，大批星B排住隊趕出世，疫世生B絕對係一個大挑戰！
古巨基榮升新手父母
古巨基與太太Lorraine於2014年結婚，今年初榮升新手父母，轉眼間囝囝Kuson已經半歲大，眼仔碌碌又愛笑，可愛到暈！
周勵淇一索得男
周勵淇於2018年底宣布與內地演員傅浤鳴結婚一年多，去年9月傳出有喜，直至今年1月宣布陀B，並於5月18日剖腹誕下6磅重囝囝，一索得男。好姊妹蔡卓妍及鄭秀文上門探B。
楊思琦老公成謎獨自湊B
楊思琦2011年誕下囡囡楊卓穎後，一直以單親媽媽身份同囡囡相依為命。去年宣布再懷第二胎，聲稱跟圈外拍拖半年嘅男友喺外地註冊結婚，今年2月12日誕下兒子「豬豬」，仔跟母姓楊，父親仍然是個謎。
梁靖琪姊弟戀修成正果
經歷婚姻失敗，去年6月與年輕8歲嘅圈外男友施雋賢結婚，梁靖琪於同年12月27日誕下兒子施睿文，由二人世界變成三人行。
黃祥興幸福五人家庭
黃祥興同圈外老婆結婚7年育有一仔一女，今年初再添一子，組成幸福五人家庭！
許亦妮寵愛「馮寶寶」
前港姐許芷熒（前名許亦妮）去年10月與商人男友結婚，其後宣布懷孕，囡囡於今年2月2日出世，女兒乳名叫「馮寶寶」、英文名叫Kayli Jane。
楊秀惠離巢TVB做靚媽
去年跟圈外男友葉世揚註冊成婚，早前正式離巢TVB嘅楊秀惠，於4月宣布榮升人母，展開人生另一階段。
楊怡羅仲謙終成功造人
楊怡同羅仲謙結婚4年終於成功造人，今年4月尾誕下囡囡羅昀凝，一家三口非常幸福。生B後嘅楊怡一直待在家中湊女，搵奶粉錢嘅重任就交畀老公謙謙搞掂。
鄭嘉穎 陳凱琳兩年抱兩
鄭嘉穎與陳凱琳兩年抱兩，今年5月宣布再做爸媽，而第二胎冧莊又係仔，大仔鄭承悅（Rafael）將會多個細佬。
譚凱琪低調完婚即有喜
38歲譚凱琪今年三月與拍拖八年嘅富貴男友莊日宇低調完婚，上月尾宣布有喜，現已全面停工，留家專心安胎。
陳山聰親手為囝囝剪臍帶
陳山聰太太何麗萍剛於今個月生咗 B仔 Jaco，陳山聰陪太太入埋產房，仲親手為囝囝剪臍帶㖭！
雨僑羅力威唔請陪月自己湊
雨僑同羅力威結婚2年，今年情人節宣布懷孕喜訊，自稱P牌媽媽嘅雨僑日前公布今胎係B女，兩公婆決定唔請陪月唔請姐姐，一於親力親為自己湊，勇氣可嘉！
吳若希話唔知轉頭又陀B
吳若希上月宣布懷有第二胎，3歲囡囡Giselle將榮升家姐，澳門闊少老公何兆鴻興奮大爆今胎陀仔湊成個好字。
應采兒陳小春再添一男
應采兒與陳小春2010年結婚，2013年誕下兒子Jasper，今年52歲嘅陳小春再做老竇，應采兒於5月尾再添一男，雖然恨女恨到發燒，但應采兒亦開心迎接細仔，惟有之後再努力過啦！
王祖藍李亞男成功追多個
王祖藍與李亞男已育有一歲半囡囡王天韻，疫情期間兩公婆成功追多個，一家三口將變四口。
宋熙年陳智燊迎四口之家
相愛11年，2016年結婚，宋熙年與陳智燊婚後兩年迎來兒子 Damon，今年3月再度傳出喜訊，將由三口子變成四口之家。
倪晨曦婚禮延期照生B
早前已入紙排期結婚，但因疫情婚禮延期的網絡女神倪晨曦，選在父親節宣布懷孕喜訊。「因為我覺得男女都冇所謂，都係上天嘅禮物，所以我等到佢出世嗰刻先知。」現陀 B六個月的倪晨曦坦言有意再生，婚宴則希望在明年1月舉行。
