44歲滕麗名滑雪斷骨休養1年 無奈暫停做人計劃老公愁爆 硬頂《陀槍師姐5》 再做陳三元

撰文、圖片：東方新地

滕麗名滑雪受傷瞓床一個月 肋骨跌斷插傷肺

在《愛・回家之開心速遞》演周嘉洛阿媽熊尚善入晒屋的滕麗名，近期鮮有在該劇出現，原來去年12月底，滕麗名與老公到日本青森滑雪，不小心在樓梯跣低跌斷左邊5條肋骨，更插傷肺部致內出血，在當地治療了3個多星期情況嚴重，滕麗名返港後繼續接受治療，醫生更表示要等肋骨自然癒合，要半年時間才能穩定情況，完全康復更需長達1年時間。據知情者透露：「阿滕足足瞓床1個月先可以落地行，雖然依家行動冇問題，但其實大動作，或者瞓低起身同轉身都會劇痛，醫生仲要開嗎啡止痛藥畀佢食，仲講明要佢一定要好小心，唔可以再碰到整親，唔係手尾會好長。」

滕麗名不小心跌倒重傷，老公朱建崑既擔心又心痛，更因有工作在身，要頻撲港日兩邊飛照顧老婆，令阿滕非常感動。滕麗名呢1年要養傷，又要準備拍劇，相信做人計劃，要無奈暫停了！

日本留醫兩星期後，因為肺功能減弱未能坐飛機，阿滕入住當地酒店休養多一個多星期，之後更要坐輪椅上機返港再接受治療。

留家靜養改變人生觀 曾想辭演《陀槍師姐2020》

牽一髮動全身，要留家靜心休養的滕麗名，除了影響《愛・回家》 演出，就連二月底開拍的《陀槍師姐2020》亦受影響，為免影響身體復原，阿滕更曾向《陀槍》監製方駿釗辭演。據知情者透露：「當年 《陀槍》令阿滕爆紅，仲紅到返內地，所以知道有得再演三元呢個經典角色，阿滕真係好開心，為咗以最佳狀態演出，佢一早開始做gym同行山鍛鍊體能，真係冇諗過會喺滑雪場樓梯跣低跌斷肋骨，始終年紀唔輕，佢都好小心治療同休息，驚治療得唔妥當將來手尾長，其實今次滑雪重傷，阿滕人生觀都改變咗，好多嘢唔再執著，覺得冇嘢比健康更重要，除咗《愛・回家》減少演出，原本阿滕想辭演新《陀槍》，不過，因為佢個角色好重要，係唯一一個由上四輯帶落嚟今輯嘅重要人物，如果阿滕唔拍，成個劇本都要改動，最後監製答應大減佢動作戲，仲會用鏡頭遷就， 阿滕先答應頂硬上。」 相信除了監製及滕麗名想延續陳三元經典，觀眾同樣充滿期待，阿滕加油呀！