炎明熹破冰推出3大節目 樂易玲否認暗寸對方忘本：我對住Yumi同Windy講㗎！

最新！Gigi 破冰有望？7、8月三大節目輪住播放！

最近Gigi的雪藏傳聞似乎開始不攻自破，炎明熹不僅在商場活動中亮相（雖然TVB無派人採訪），同時也為一個手袋品牌拍攝了一系列廣告，這些廣告在金鐘的港鐵站隨處可見。此外，無綫翡翠台及TVB Plus 推出三個由炎明熹孭飛的節目，分別係：

• 7月14日星期日晚播出《炎明熹Gi-FORCE演唱會2024》
• 7月15日開始，星期一至五8:30pm TVB+ 播放 《他和她的喵店長2》由炎明熹再次負責聲音導航
• 奧運結束後，翡翠台在8月31日晚播放Gigi在今年初拍攝的音樂特輯《戀上西沙》，首次拍攝愛情劇

樂易玲否認暗寸炎明熹「忘本」

樂易玲早前在活動上叮囑Yumi和Windy不要忘本，被指是在暗寸有傳因不續約而被TVB雪藏的Gigi，對此樂易玲向傳媒強調唔係話緊Gigi：「我對住Yumi同Windy講㗎！佢哋細個，能夠教嘅我盡量教，尤其是公司藝人，我哋都會話畀佢哋知，真係要做榜樣，同埋永遠都要係朋友。」

樂易玲澄清指炎明熹有排先完約「新聞界太關心佢」

而講到Gigi有傳因不續約而被TVB雪藏，樂易玲澄清指炎明熹有排先完約：

「佢份合約仲有排喎，我就唔知點解你哋咁多人對號入座，成日都話佢要走唔續約，其實我哋嘅同事都應該同佢傾緊合約關係，因為佢仲有一段長時間，我諗新聞界太關心佢。」

她又並表示，絕對相信Gigi並非忘本的人。

解釋TVB冇派人採訪炎明熹原因

樂易玲又指 Gigi 現時工作安排如常，其歌曲也有上排行榜，最近少有現身是因為她仍在求學階段，所以工作都要配合她的休息時間。而講到上次Gigi出席活動時，TVB沒有派人採訪，樂易玲表示：

「咁我唔知，因為係TMG（TVB Music Group ）唱片公司幫佢接嘅嘢，我諗你要問番唱片嗰邊，因為我哋supervisor係唔使跟呢個project嘅。」

網民寸樂易玲完美示範「指桑罵槐」

對於樂易玲否認暗寸Gigi忘本，網民大多唔收貨，表示樂小姐依然係「句句有骨」、「含沙射影姐，咁你都唔明」、「對住邊個講都係講，有咩分別？」、「完美示範：指桑罵槐」、「即係話嗰個冇得教啫」、「佢咁講好似兇Yumi、Windy咁」、「樂小姐打扮到咁高貴點會鬧人，佢只係教啲𡃁妹做人要睇路」等。