炎明熹專訪︱預告演唱會將有驚喜送粉絲 公開曾打算紅館開騷因1原因拒絕

炎明熹感恩有機會開個唱：仲緊張過我考試

年僅18歲炎明熹出道短短2年就開個人演唱會，連Gigi本人都表示覺得很幸運，亦感恩公司給予自己機會：「我首先想表達我自己係一個幸運兒，我估唔到自己出道唔太長時間，就已經可以擁有自己嘅個人演唱會，我係非常感恩。宜家都好緊張，我覺得仲緊張過我考試。」

Gigi又指會為演唱會全力以赴，更特別為演唱會首次做Gym：「我係人生第一次做Gym，雖然暫時只係做咗幾日，但都係一個好印象深刻嘅體驗。」

演唱會特設跳舞環節 認大有進步！

當被問到演唱會會否加設跳舞環節時，Gigi大爆會有，更指「一不做二不休」，自己會盡全力練習，務求對得住自己、觀眾和工作人員：「既然演唱會會有呢一個跳舞環節，我會盡力做好佢，我相信自己要做得到，我會盡力去練好佢。」

Gigi又笑指自己跳舞實力大有進步：

「因為我以前跳舞係⋯⋯我睇翻以前啲片段真係有啲欲言又止嘅感覺，但係慢慢我自己有開始跳舞嘅時候，就會覺得係好過以前好多。」

炎明熹為1原因拒絕到紅館開演唱會

炎明熹今次首次個人演唱會選擇在九展舉行，當被問到有否曾經打算到紅館開騷的時候，Gigi就回應指：「其實公司都有想叫我去紅館開演唱會，但我覺得真係要一步一步嚟，唔好咁急就上紅館表演。希望自己可以有多啲經驗，喺唔同嘅地方表演完之後，再去一啲更大嘅舞台表演。」

炎明熹自爆演唱會有驚喜送粉絲

Gigi在訪問當中透露今次演唱會有特意準備驚喜送畀粉絲，仲話特意將某首日文歌改為廣東話歌詞：「我會唱自己嘅歌曲之餘，亦都會唱一啲大家未聽過嘅歌，甚至係可能另一國語言嘅歌，但就將佢變做廣東話。本身係一首日文歌嚟嘅，自己都冇試過咁樣做，希望可以畀大家一個驚喜。」