服務業網民盤點「難服侍」明星試身室突顯真性情網友為蒙嘉慧平反！

Jan 30 2024

有網民在討論區出post，問大家在「工作時有無服務過明星」，結果引來大批網民爆料，分享自己遇過好難服侍的明星，提及一線紅星、阿姐級前輩仲有星二代！

網民爆料數難服侍明星原來係TVB男藝人

開post的網民拋磚引玉，率先分享自己同事指「This on*仔好難服侍，會鬧我哋」，不過他自己就覺得對方幾好幾有禮貌，有網民隨即詢問「This on*仔」身份，不少網民紛紛推測係黃宗澤，因為他有首歌《Hey Boy》，其中有句歌詞諧音和「This on*仔」相似。

星二代投訴被偷拍？沈月獲讚靚女

之後有不少網民都爭相爆料，有人開名爆，亦有人揞名爆，其中有一名自稱在日本料理餐廳工作的網民，直言曾遇上邱淑貞一家，期間被邱淑貞女兒沈月投訴他偷拍，該名網民覺得莫名其妙，立即把成部電話畀對方睇，證明自己並無偷拍，但他也有大讚沈月：「真人清純，係幾靚女。」

網民爆蒙嘉慧洗頭爆粗鬧人！

亦有在髮型屋工作的網民爆料指蒙嘉慧好無禮貌，仲開口狂鬧人，他描述：「嗰時我做salon幫佢洗頭，當個師父坐喺隔離同佢吹水，我唔小心整濕咗佢，佢即刻發癲，跟住XX個師父，話『仲坐喺度，攞條毛巾嚟啦，你係咪冇腦架』。」不過他指事件已起碼在10年前發生。

不過在留言區就有在髮型屋工作的網友，對上述說法另有見證：

我之前做salon serve過蒙嘉慧，佢超nice 喎，仲成日請我哋食野，反而吳x霏同胡x兒就好扮野，成日以為自己大明星！

遺產界KOL想摸人手仔

有網民就話服務過一位「最近同呀媽講話知錯認衰仔唔搵小三個呀叔」，更直斥他「死鹹濕佬一個，畀$100tips就想摸手仔。」有網民猜測她所講的是「遺產界KOL梅X明」，亦有網民指她應該入廚房「拎隻豬手畀佢摸」。

楊千嬅係獨孤精汪阿姐巴閉要封試身室

有一名自稱在時裝店工作的網民爆料指「歐陽得分夫婦又偷嘢，買盒西餅當無事」，引來不少網民追問詳情，該名網民就解釋該對夫婦已是慣犯，太太更特別愛偷sample。此外她又連環開名爆楊千嬅係孤獨精永遠一個人shopping、梁朝偉問佢一句要5分鐘先有反應、汪阿姐試衫要封Fitting room好大陣仗，但阿姐好有禮貌等等。