希望女人唔會被年齡規限 41歲田蕊妮奪「最佳節目主持」
撰文：Chloe | 圖片：TVB截圖、《女人四十》劇照、田蕊妮IG
41歲田蕊妮奪「最佳節目主持」
41歲嘅視后田蕊妮今年主持咗節目《女人四十》，昨晚《萬千星輝頒獎典禮2018》奪得「最佳節目主持」獎項。阿田一上台領獎就非常激動開始哽咽，仲要叫人遞紙巾，睇落相當感觸。佢邊喊邊話：「原來真係想喊，呢個節目，我第一次自己構思、度橋有份參與，多謝公司畀咗好大空間，我學咗好多製作嘅嘢，發掘自己另一方面能力。」
田蕊妮：希望女人都不要被年齡規限
阿田媽咪早年離世，攞獎一刻佢不忘答謝亡母：「我要多謝我媽咪，遺傳好多好嘢畀我，所有好嘢都係來自你身上，仲有好多謝我爸爸，我會繼續好努力去做一個令到你驕傲嘅女兒……我亦都好多謝我自己，因為呢個節目我真係為女人做咗一啲嘢，希望各位女人都唔好被你嘅年齡規限你自己。」
去為女人做一點事情
隨後，阿田更喺社交網分享得獎喜悅，佢坦言自己興奮心情還未能平復！更因製作「女人四十」感到驕傲。
興奮之情還未能平復！確實我是第一次為自己而感到驕傲！驕傲，不是我得了獎，而是製作「女人四十」的初心！我很感恩自己還有這個能力和機會去為女人做一點事情！希望所有女人都不要被年齡規限！勇敢的去嘗試，坦誠地去面對和接受自己。活出屬於自己的一套。
杜汶澤盛讚：「比攞視后更成熟」
老婆攞獎，當然少不了老公杜汶澤的祝賀。阿澤喺社交網上盛讚老婆「叻」，仲表示相比當年攞視后更難得。
叻！
叻唔係因為有奬，而係見到你由頭到尾去做好件事，解決咁多問題，而且用最誠懇嘅態度，去面對自己嘅年齡，將正面嘅信息宣揚開去！相比起當年攞視后，呢個奬我覺得係代表住一種成熟同進步！
比個👍你！
田蕊妮發放正能量 「活出自己的一套女人四十」
《女人四十。節目播出以後，得到很多回響，有觀眾感同身受引起共鳴，一連十集於上月已經播完，作為主持人嘅阿田就有感而發，佢喺社交網留言鼓勵所有女性「希望你們每一位都能活出屬於自己的一套女人四十，五十，六十⋯」
「《女人四十》播出以來，令我最開心的並不是這節目的回響有多大，而是你們給我的每一個留言。有的話自己快將40，因為這節目而不再害怕，反而期待。有的話自己剛離婚正正處於谷底，但看了所目後令他相信自己可以從新站起來。更有一對夫妻因看了婚姻誓詞那集而改變婚姻的決定等等⋯⋯當然亦有很多說這個節目很貼地，很有共鳴！
這亦証明其實每個人經歷的階段，面對的狀況都是很類似，只是大家的細節上有點不同，雖然節目已播完，但是我們的路還有很遠。希望你們每一位都能活出屬於自己的一套女人四十，五十，六十⋯⋯⋯」
田蕊妮獲封為絕世好老婆 發文為老公澄清「冇破產」
阿田陪住老公杜汶澤經歷所有高低起跌，確實做到「無論環境順逆，疾病健康都甘苦與共」，因而被網民封為「絕世好老婆」。阿田除咗感謝大家支持，田亦喺網上親自回應：「《女人四十》播出以來，多謝各界媒體對本人的關注與報導！但我真的要澄清一點，可能是以前的資料有誤⋯⋯我老公真係無破過產！至於賭錢都只是他入行前的歷史！我亦沒有幫他還過任何賭債！我承認我是一個好老婆，但未至於好到咁！哈哈⋯呢個光環實在太大，亦對杜先生不太公平吧！最後衷心感謝各傳媒與觀眾們的厚愛。我會繼續努力！因為女人四十才是一個女人的真正開始！」
《女人四十》節目第三集邀請阿田參加相親聚會，聚會完結後被在場工作人員問她會選哪一位男士？阿田秒速地回應：「杜汶澤。」諗都唔使諗！
女人四十真是老？細數6大共鳴位
共鳴位一 女人四十真是老？
社會一直會認為40歲的女人已經步入中後年，女人會隨年齡增長，而自信下降。每當我哋被新認識嘅人，將我哋嘅年齡估成更年輕，心底裡都不禁沾沾自喜，而節目中，阿田問小朋友對她的印象時，小朋友話佢似27歲，佢都超開心！但年齡真係可以定義女人價值嗎？阿田就認為，其實自信係由內去外，你嘅內心強大年輕，年齡都只係數字，一樣可以去學新野，發掘自己未知嘅另一面。
共鳴位二
從前嘅興趣改變 不再夜蒲
年輕時，我哋夜夜笙歌，夜蒲、打牌、唱K直落無問題，一到了40歲好像只係鐘意留係屋企，瞓個美容覺。阿田和谷祖琳自稱曾是「夜蒲Queen」，當時生活由晚上11時先會正式開始，但現在再蒲會覺得「覺得很吵，很刺耳，更會見暈」急急腳離開。杜如風更自嘲，宜家落去再蒲自己已經係「Auntie Helen」。
共鳴位三
唔夠膽著背心短褲 要開始養生
阿田係節目試著上熱褲，就表示下面涼浸浸，提到宜家著衫要諗清楚，覺得著背心、短褲，就好似唔係良家婦女。「有一次問老公杜汶澤，著背心好唔好？，阿澤答我著得舒服就得。」另外節目提到「中女」要養生，阿芝就話「中女會飲暖水，遲啲要飲熱水」。阿田認為除左要保持健康，心態都要保持年輕。
共鳴位四
女人四十歲未結婚喺Deadline？
社會不斷進步，但一啲傳統觀念依然好影響女性嘅睇法，女性喺咪要40歲前結婚呢？阿田直言，的確會有人為咗趕死綫而結婚，要結婚好易，要嫁得好就好難。
共鳴位五
有仔趁嫩生？
過咗35歲懷孕嘅婦女就會稱為高齡產婦，認為身體會出現大變化，懷孕機會會下降，風險都會愈大。但阿田為咗推倒說法，連子宮都要出埋鏡！佢去咗婦產科照子官，照完醫生就話佢嘅子宮子齡如14歲，依然合適生小朋友，所以年齡只是數字，身體實際狀況先真實證明到適唔適合生小朋友。
共鳴位六
女人四十才是真正開始
去到節目尾聲，阿田認為，「40歲好似突然睇野清晰哂，都變得從容不迫」。車婉婉十分認同，以前衝動火爆嘅性格，當發生問題就要立即解決，宜家忍耐力高咗，發生問題時會先退後一步。阿田立即補充：「現在覺得出現問題很正常，無法即時解決嘅野，便等到明天再解決，始終能解決。」
另外，谷祖琳認為放慢腳步，不會逼迫自己太緊，每一日只安排一樣野，以一樣事情為重點。阿田更認為40歲過後，好似重生「一路走來累積到嘅智慧同涵養，我反而覺得件事好美麗。」 女人四十更要有態度！
