異空感應｜吳沚默雙面媽媽展示暗黑演技嚇窒觀眾 演出獲讚更勝《黑色月光》

《異空感應》吳沚默與蕭徽勇飾演夫妻互相埋怨

邊個估到吳沚默的角色原來係有如精神分裂的雙面人？！之前的嫌疑人物羅啟釗（蕭徽勇飾）、蘭婆婆（區靄玲飾）及大妹秀婷（羅毓儀飾）全數證實無辜。原來當年尚未成年的阿麗因未婚懷孕，被逼下家羅啟釗；羅啟釗雖然顧家又疼錫孩子，但阿麗卻對其嫌三嫌四，二人經常因錢銀問題家嘈屋閉，丈夫啟釗更因而患上躁鬱、對阿麗拳頭腳踢。

二妹挑釁侮辱 吳沚默「跳製」下毒手

對人生充滿埋怨的阿麗自始沉淪賭海，更拉二妹（羅皓誼飾）落水齊齊運毒賺錢，誤入歧途的二妹亦因忽然富貴變得囂張又自私，最終阿麗因經不起二妹一再挑釁及侮辱錯手殺死親生女，為了求生更不惜向親生母親蘭婆婆下毒手…

主動提出服裝造型 人設符合真實年齡

當年靠在《老表，你好hea！》中扮醜成名的吳沚默，近年每逢亮相劇集必定成為焦點，不少網民大讚她有女人味：「個阿媽好正」、「好有人妻feel」、「呢位媽媽好靚女」。細心留意，吳沚默是次雖然飾演三子之母，但由於太後生便當媽年紀尚輕，故每次現身均是悉心打扮，除了會穿透視裝、遇有Bling Bling裝及毛毛上衣，亮麗得嚟帶點娘味。吳沚默接受tvb.com訪問時，坦言這是她消化過角色背景及人設後，主動向監製Amy姐提出的意見：

「因為呢個角色未成年已經搞大咗個肚，其實加加埋埋同我真實年紀唔算爭好遠，所以我同Amy姐講我哋不如試吓扮後生啲嘅媽咪，令人覺得佢好似好唔甘心、 亦未ready做媽咪咁。但亦因為佢身份問題，所以貪靚得嚟又唔可以青春同Fashion，要有少少娘娘地。」

肢體語言母愛滿溢 巨蟹座天生有助演媽媽？！

談到年僅34歲便要演3個小朋友的媽咪，吳沚默不但不介意，而且還大呼好玩：「我真係第一次演有三個仔女嘅阿媽，之前最多都係懷孕，未試過生咗出嚟。其實做媽咪我係一啲問題都冇，我覺得呢個角色好有發揮。」對於被指劇中不少肢體語言都母愛滿溢，吳沚默竟笑言與星座有關：「可能因為我巨蟹座啦，如果相信星座嘅話，巨蟹係好有母性嘅，我喺屋企都好『媽咪』架，好囉嗦，會管番阿爸阿媽轉頭。」

《異空感應》吳沚默角色變反幅度巨大 嚇窒觀眾

除了造型，吳沚默角色方面的心路歷程及變化亦勁有發揮空間。起初，當大家還未得悉她是兇手時，大家只覺得阿麗淒涼、軟弱又無助；不過當昨晚她露出真面目後，不少猙獰及叛逆面孔均相當到位，尤其不停數落老公的一場，嘴臉更是相當衰格。在眾多場口中，吳沚默於停屍期認領二妹屍體時的表現最為到位，完全演繹出作為母親的悲憤及無助，亦豐富了角色的層次。吳沚默受訪時坦言角色是悲劇人物：

「其實呢個女人一直活得好壓抑同唔甘心，佢覺得自己犧牲咗成個人生去為咗頭家，但到頭來二妹咁對佢。其實佢殺二妹時冇為意同諗咁多，只係因為佢唔太叻又冇乜耐性，所以殺咗個女自己都唔知點算好…所以佢見到阿女屍體時嗰種傷心係真嘅。」

吳沚默曾演「社團大家姐」全程黑面

現年34歲的吳沚默在內地珠海巿出世及長大，高考後入讀香港浸會大學電視電影系，原本主攻幕後工作，但在校園中接觸過演戲後，逐漸產生興趣。自藝員訓練班畢業後，開始在無綫拍劇，此外她亦擔任編劇，曾是三部人氣劇《 老表，你好嘢！》系列的編劇之一。2020年吳沚默在劇集《木棘証人》飾演社團大家姐「沙膽姐」，她笑言這是她第一次做一個角色係全程黑面，由頭到尾都冇笑過！