《痞子無間道》兩小時大結局公布收視不敵《哪吒》少30萬觀眾 《奪命提示》有望挽回劣勢

《痞子無間道》創8:30時段劇集本年收視新低 30集《奪命提示》有望挽回劣勢

無綫公布了《痞子無間道》的大結局收視，最高只有16.9收視，比起2月尾同樣周五晚上插播的《哪吒之魔童降世》少30萬觀眾，作為自家製作劇集得到如此收場實屬不幸，回顧5開期開播以來的收視，竟是拾級下跌 ，由開播時126萬觀眾到最後只有110萬觀眾，收視竟然比同樣以廣告植入作核心的《奔跑吧！勇敢的女人們》流失得更利害！

重溫上輯大結局超級暴走： 痞子殿下大結局｜首振鎮居民「Marvel式」救世 戴耀明再變「一拳超人」

《痞子無間道》大結局 四人合體激戰大魔頭曹永廉 周嘉洛陳瀅朱敏瀚JW開花結果

兩小時大結局袁雨就(曹永廉)即使發現親生仔女仍在眼前，本來想與符玲(陳瀅)、恭梓(朱敏瀚)和潔姨(車婉婉)一家團聚但遭到拒絕，盛怒下打算大開殺戒！費仁(周嘉洛)、高強(JW王灝兒)、符玲、恭梓四人與就公展開激戰！陳瀅進化成紅髮魔女的造型，非常矚目卻被指撞樣葉劉淑儀。

黃子恆白白犠牲 魔盜王造型死得轟烈但無謂

大結局在大團圓之中仍留有遺撼！就是黃子恆飾演的范泰帥，為了拯救一直深愛的思朗（麥美恩飾），竟捨身成仁連人帶炸彈衝入海中，最終於半空被炸死，死得轟烈；但值得安慰的是，泰帥不但於臨死前與思朗冰釋前嫌，還向思朗送上深情吻別，死後還恢復了捕快的身份並獲得了高榮譽葬禮。對於子恆角色壯烈犧牲，網民大感意外，因為解決了一個炸彈最後還有另一個毒氣彈，最後都係要靠「忘不鳥」拯救全城市民！

《痞子無間道》第3輯有冇可能開拍？

雖然結局有兩小時篇幅，每個角色都有大團圓結局，不過有觀眾發現，官方發布的劇照和預告片中，有多幕周嘉洛的戲份被刪走，莫非要留到第3輯再發揮？！其中一幕陳瀅與周嘉洛為了湊仔爭吵的戲份，只在劇照中出現：

黃子恆：「我喊到要行出廠」

談到角色慘死，子恆接受TVB.COM訪問時坦言當初得悉「死訊」時，也因太投入感到不捨、一度哭成淚人，並成為同劇演員笑柄，子恆說：「當時拍攝時因為係飛紙仔嘅，大家都唔知結局係點，直到出劇本先知泰帥最尾會死。到知道有呢場戲後，有一日放飯時，我突然醒起原來嚟緊嗰場戲，就係我最後一次見到嘉洛仔同陳瀅佢哋，當我發現咗之後，我就忍唔住喊，心諗：『原來我哋冇機會再見喇』。我覺得應該係因為當時真係太投入，所以會有呢種感覺，我記得我係喊到要行出廠。之後阿瀅萬歲請食雪糕時，仲拍咗條片話要睇我喊添。」

車婉婉大晒喊功

另一焦點場口，絕對是車婉婉大晒喊功！事緣當爆出費仁（周嘉洛飾）真實身份是萬千霞（馬海倫飾）失散多年的兒子思春後，潔姨（車婉婉飾）即含著滿眶眼淚向著驚訝萬分的費仁道歉：「對唔住，我呃咗你咁多年。」之後，潔姨再以激動Tone、面紅耳赤兼淚流披面謂：「我好憎你呀！咪亂咁叫你做費仁咯！」然後滿臉憐愛地捧著費仁的臉說：「我曾經想揼低你，但我真係唔捨得呀！」說時樣子滿是掙扎及辛酸，而當最後得悉公子（朱敏瀚飾）就是自己的骨肉是，車婉婉再流露出傷心中見茫然的表情，所以情緒的轉折均恰到好處，演技實力不容忽視，網民亦大讚婉婉將潔姨角色演得相當立體！

難忘角色情緒大起大落 車婉婉開心劇中「子女成群」

談到「潔姨」角色成功入屋，婉婉笑言很開心收到不少正評，並感激監製賜予這麼具大挑戰性的角色給她：「因為個角色係好大twist，神經質、搞搞笑笑之餘，仲有好多感情戲，大喊大笑大開心大傷心咁，希望大家睇完《痞子》結局後，覺得搞笑之餘仲係有笑有淚。」談到喊戲場口，婉婉坦言由於事前做足功課，整理了角色頭二十多集累積的鬱結，所以拍攝時尚算順利：「雖然我個水煲易著嘅，但都要有感覺先嘅，同埋拍喊戲我通常兩、三個take內要自己完成到，因為真眼淚喊唔到太多，係會乾塘！呢場喊戲潔姨個角色因為都屈住咗好多嘢，所以感情都嚟得自然。」

車婉婉：其實做媽媽嗰樣嘢，我喺呢套劇都有投射到出嚟

婉婉續指另一難忘位，是劇中子女成群，來到最後周嘉洛、JW、朱仔及陳瀅全部都是她的兒女。問到現實中也是媽咪身份的婉婉，私下教仔方法與潔姨是否相似時，婉婉即搞笑地分享升Key教仔大法：「其實好多父母都同潔姨一樣鬧完又錫番，其實BBQ跩嗰吓，都要氹吓鬧吓，例如叫佢做功課，你都係用愛心講，但佢又未必聽、又未必肯埋位，埋咗位又未必坐得低，於是我就要好似唱歌咁升Key，一路升Key，升到一個位佢好驚慌就會喊喇。我個仔好得意嘅，佢會問：『媽媽係咪你唔愛我喇？』，我就會諗係咪個key高咗啲呢？跟住我哋會和解，我會講對唔住。其實做媽媽嗰樣嘢，我喺呢套劇都有投射到出嚟，同埋呢套劇最後全部都係我仔女，我覺得好好笑。」