娟姐練美娟還原女星姣錫TVB人夫經過 自爆失身年齡 公開一大擇偶條件

原文刊於：東方新地

練美娟還原女星姣錫TVB人夫經過

練美娟接受網上平台訪問，擔任《月傾會》嘉賓，在主持人林柏希William邊食邊飲邊傾之下，出名說話大膽的她愈爆愈多。早前，她曾在ViuTV節目《晚吹-有酒今晚吹》大爆曾經親眼見過一個女星姣錫TVB已婚男星的場面，親密行為接近情侶，林柏希在節目中就重提此事，叫她開名講出哪個藝人，她立即面有難色：「真係唔開得名！」她惟有還原目擊經過，即刻姣精上身，示範當晚飯局入面一啖咀落TVB人夫的場面。她指當時TVB已婚男星同女星根本是旁若無人，相當大膽：「大家食食吓飯，跟住無啦啦攬，跟住錫，錫面先，跟住人夫畀佢錫埋個嘴，佢哋無理過身邊所有人。」

練美娟18歲失身 公開擇偶條件似強尼

練美娟最近工作量多，31歲事業起飛，但感情未有著落，她透露自己已單身了四年。主持林柏希問她選男友有何要求？她說自己喜歡成熟型男，對上一個男友大過她十幾年：「我鍾意偏向成熟啲，小鮮肉嗰啲我係一般！（強尼啱你喎？）強尼嗰一類，我鍾意啲安穩感覺，我係鍾意大叔㗎﹗」她又坦白自己失身年齡「失身呀？18歲，合法嘅！死啦，我經理人抹緊汗呀！」其後再爆初戀在小學五年級。

之後林柏希指ERROR肥仔同音樂人伍仲衡都先後被七師傅爆料很喜歡她，如果兩個必定要選一個，她會選哪個？練美娟說：「肥仔唔啱呀，我只能夠講肥仔唔啱！我真係介意另一半矮過我！」至於伍仲衡，娟姐就話：「點解件事會發生呢，係我做我飲酒個節目，跟住請咗Harry（伍仲衡）同埋師傅（七師傅）上嚟，跟住師傅就『7噏』，話佢一直留意我、好鍾意我！之後我哋真係交換咗電話話約食飯，但係我又忙、佢又忙啦！」

最後林柏希問練美娟如果開拍一個配對節目，黃德斌、許紹雄同鄧健泓三個圈中男星會選哪個？娟姐就話會選黃德斌：「我拍劇又識佢啦，佢係一個內斂嘅人！」如果古天樂VS黃德斌又怎樣選？娟姐答案一樣。

練美娟爆Stanley很小器 Edan鹹濕成日睇女

主持林柏希問拍攝《大叔的愛》時Edan、Anson Lo同Stanley三個，哪個最吝嗇、最小器同最多女冧？練美娟秒答教主Anson Lo最多女冧：「無論青春少艾或者已婚人妻，你知唔知連我表姨媽都好鍾意佢！」

最小器，原來是Stanley，練美娟說：「可能我同佢熟，佢成日都會對我小器囉！譬如有時預咗好多嘢，佢會話『又無預我，娟姐』，跟住我心諗，男人老狗唔好同我計呢啲啦，我好相信係因為佢同我熟，所以佢會咁樣同我玩！」

至於最吝嗇，練美娟就話想不到，反而主動爆料Edan最鹹濕：「我覺得Edan最鹹濕！因為佢血氣方剛，我成日見到佢平日休息嘅日子，都係睇女仔嘅IG！我成日話，又睇女呀，佢話，睇吓女仔啫，你知佢嗰啲乞人憎樣。我唔敢講咁樣係鹹濕，但係佢對異性最有興趣啦！唔係鹹濕，但係成日睇女囉！」