羅霖自爆兒子血緣竟遭親人要求驗DNA 掙扎6年2原因決心離婚
羅霖兒子竟被質疑「血緣關係」
羅霖在訪問中透露家人曾對仔女的血緣提出質疑，而搞到自己不得不進行DNA鑑定以證清白：
「我唔鍾意同人嘈，倒不如用證據去證明，驗DNA就可以一清二楚，亦唔使大家勞氣傷感情。我自己可以承受到（閒話），但我做呢件事，係因為唔想人侮辱我父母，呢一點我接受唔到。」
羅霖自爆離婚原因
羅霖多年後首公開此事，並表示過去一直未提及此事是為了保護孩子的童年，以免影響他們。羅霖亦憶起當年「嫁入豪門」的經歷，為咗表現一家人嘅骨氣，她的母親更主動放棄了婚禮禮金。雖然婚後生活看似美滿，不過羅霖就自爆與前夫離婚係因無法忍受第三者介入以及家暴，最終掙扎咗六年先下定決心離婚。
羅霖兒子因1傳言生隔閡
羅霖坦言當年因情緒問題需要食藥，而離婚初期羅霖就帶住細仔返娘家住，大仔、二仔則跟前夫生活。不過唔同住的兩個兒子更一度因「鬼上身」的傳言與自己產生隔閡：「半年後，大兒子一人拿着行李來找我，我笑問他是否打算只住一段短時間，因為當時我仍擔心自己照顧不了他。」羅霖更強調女性一定要經濟獨立，因為安全感係來自自己，並非令一半。
27歲入行 選亞姐被同房爆料決心奪冠
羅霖在1991年在時裝設計師張學潤介紹下，她參選亞姐入行，幸運奪冠，亦因此展開了銀色旅途。她自爆當年因為要穿泳衣在街上做宣傳覺得很不習慣，因此晚上回酒店房時和母親哭訴想退出，但母親鼓勵她開始了就要繼續。後來這件哭訴事件被同房參賽者出賣爆料給傳媒，第二天新聞出街，令她覺得更加要堅持下去，最終奪得冠軍。
為事業放棄婚姻自爆追求者眾
羅霖曾因《 真情 》大熱而帶旺人氣，但當時的她卻選擇了結婚而放棄事業：「 我當時都有同屋企人商量，爸爸媽媽覺得我年紀唔細，如果再唔結婚就好難嫁出去；同時我都問過家燕姐、司棋姐嘅意見，佢哋都認為我要結婚，因為緣份係好難碰上嘅。」可惜當年羅霖婚後雖答應男家要求淡出娛樂圈，但性格倔強的她仍堅持出席慈善活動及接拍廣告，因而令婚姻生活產生很大矛盾，最終離婚收場，她透露自婚姻挫敗後，經歷了半年的低潮期，每日以淚洗面，最終為了3名兒子而重新振作，復出工作搵錢養家，她說： 「啱啱復出推出第一本寫真時我50歲，必定有好多難聽嘅說話，例如：『咁老仲出寫真集』『邊有人睇㗎』，但我都要硬撐住，因為我覺得人總有高高低低，最重要係跌低咗要企番起身，千祈唔好因為別人講嘅嘢而失去自信。」
重新拍拖有條件 囝囝鼓勵談戀愛
如今無論在事業、家庭已獨當一面的羅霖，透露現時身邊不乏追求者：「囝囝好鼓勵我去談戀愛，但我現時忙到連瞓覺時間都冇，點樣去拍拖呢？雖然依家我係有追求者，佢哋嘅經濟條件唔錯，但佢哋只想同我一起住，唔想跟我三個兒子住，所以我想等囝囝都畢晒業，先再去搵男朋友。」大仔26歲、二仔24歲、細仔今年尾就18歲，追求者似乎㚵於等到機會！
羅霖拒做闊太 離婚後由零開始獨力照顧3兒子
離婚10年，羅霖要靠自己從頭開始，首先要面對的是經濟上的困難：「尤其係頭幾個月，我真係咩都無、由零開始，只可以同細仔搬番我媽咪度住，當時我同細仔瞓一張床，細仔都問我點解要住咁細嘅房、瞓埋一張床，我話：『你畀啲時間媽咪，我會努力做嘢，搬出去租屋住。』嗰刻我下定決心，到佢瞓著我就喊。」
前夫拒供細仔學費 坦然面對經濟壓力
羅霖直言經濟隱憂仍未解除：「三個仔學費、生活費各樣支出都好大，尤其係去國外留學，每年加埋食宿三十幾萬，去美國更加貴，每年接近五十萬。當初分開，協議我負責生活費，佢(前夫)負責學費，但過咗都無一年，佢話淨係負責兩個大仔三分一學費，對我嚟講壓力好大，依家三個仔都同我住，佢哋都生性，有時做吓暑期工，我最希望佢哋可以經濟獨立，因為講真我年紀唔細，都唔知可以喺呢行做幾耐，有時壓力大，我都會喊住咁祈禱。」
大仔畢業前轉Major 寧願自己辛苦捱通宵
除了經濟上，少不了單親媽媽母兼父職教育三名兒子的壓力：「依家啲小朋友好有主見，但亦經唔起挫折，遇到困難可能會放棄，要不斷支持、包容、鼓勵，好多嘅愛同耐性，加埋我要做嘢，有時都幾心力交瘁，但作為媽咪，永遠都係支持、唔放棄佢哋，譬如大仔喺外國讀完三年，本來仲有一年畢業，但佢話要轉major(主修科目)，要由頭嚟過，當時我覺得：『你咪嘥咗我啲錢？七位數字喎！我真係做幾份工捱通宵，做到喊㗎喎！』我沉澱，問自己：『你想個仔健康快樂，定繼續讀佢唔開心嘅嘢？』咁我寧願揀我自己辛苦啲，但我同大仔講：『你唔好成日轉，因為我仲有兩個細佬要供！』」
前夫劉坤銘從未支付贍養費
奇怪羅霖當年嫁入豪門，離婚後卻時刻為錢頭痛，羅霖爆前夫劉坤銘從未支付贍養費：
「一向都無，無錯，法律上係要畀，但當(對方)可以證實到銀行啲錢係少過我，當然之前做咗好多功夫啦⋯⋯唔緊要，只要個天畀我有工作，我每日祈禱就係有嘢做，我唔怕辛苦，無嘢做我就擔心嘞！」
離婚後半年最徬徨
每個女人都不希望走上離婚這一步，羅霖都一樣，1996年婚後與商人劉坤銘誕下三子，專心照顧家庭，十多年之後，Candy發現與丈夫未必能走到白頭，「其實離婚都醞釀咗幾年，因為咩事唔想講，但三個仔一直睇到，知道父母間發生咩事。」兩年前他們決定分開，首半年是Candy最難捱的日子，「我40幾歲先離婚，個人好冇自信心，前路茫茫，30幾歲都話重新嚟過，40幾歲真係好徬徨，嗰排成日匿埋喊。」
身為公眾人物，要面對輿論壓力，返回家中，在兒子面前亦要扮鎮定，別讓他們看見她徬徨的樣子，「我負責同小朋友解釋成件事，強調我哋作為大人，一定會為你哋着想，係難接受，但佢哋都明白。冇小朋友離婚好易處理，但有小朋友就複雜好多，無人會想離婚，即使分開都希望做到朋友，但我哋關係同之前一樣，未做得番朋友，希望時間沖淡後會有改善。」
復出拍戲細仔最支持
在半年的低潮期，親友關心和宗教信仰，帶領她走出低谷，「我每晚都祈禱，為咗三個仔，我一定要快啲企番起身，慢慢我都諗通咗，每個人喺不同階段都會遇到困難，為學業、為事業、為家庭，人一定要有希望，任何階段都唔應該放棄。」她勉勵同路人，有心事一定要告訴親友，切勿鑽牛角尖，走上困局，「當時我得到好多親友支持、開解我，我先可以走下去，開心又一日，唔開心又一日，凡事都有兩面，睇吓你點揀，有心事一定要同親友商量，多個人多個意見，講出嚟會舒服好多。」
徬徨過後，Candy覺得女人要自強，必須有個錢傍身，決定復出幕前搵銀，接拍性感戲也在所不計，事前花了不少心機向三子解釋，18歲大仔Nathan已成人，懂得分辨；16歲二仔Jordan正值反叛期，比較介懷；反而細仔最開通，想入場支持媽媽演出，可惜未夠秤。
細仔想做英雄保護媽媽
年僅八歲的孻仔子晉，性格乖巧樂天，對媽媽亦頗黐身，他起初不習慣與爸爸哥哥分開生活，常要求同住，Candy為免影響他的成長，逢周五至周日帶他與哥哥食飯、打機，一講起打機子晉興奮起來：「我同大哥玩Wii，同二哥玩PS4同Xbox，我哋仲一齊儲閃卡！」Candy笑指三兄弟常相約睇戲，由大哥帶隊，子晉最喜歡睇英雄人物，超人、蝙蝠俠和《變形金剛》中的柯柏文，都是他的至愛，希望將來自己都英雄化身，「我好鍾意救人，仲可以保護媽咪！」Candy聞言感到很心甜，「佢好嗲，
好識氹我開心。」
子晉就讀基督教國際學校Grade 3（相等小三程度），同校的二哥讀Grade 10（相等中四程度）， 入讀該校除了相同宗教背景，亦喜歡其快樂學習、着重品德及運動的宗旨，子晉有參與多項運動，包括網球、籃球、游泳等等，非常好動。Candy坦言，做了單親媽媽後，集中照顧子晉一人，工作量增加之餘，放工還要跟進他的功課，「一返到去未食飯就即刻睇功課先，等佢瞓咗我先食飯，所以個人就攰啲。」
大仔初拍拖二仔最反叛
三個兒子的性格各有不同，Nathan已長大成人， 近兩年不斷為前途摸索， 留港升大學， 還是外國留學？讀心理學， 抑或大眾傳媒？經常舉棋不定，最近他決定到英國升讀蘭卡斯特大學（Lancaster University ）， 修讀Media andCultural Studies，母子要分隔兩地，Candy最擔心他學壞吸毒，因大麻在外國普遍，惟有叫他謹慎交友。
不過，講起Nathan拍拖，Candy就幾放心，「我一直唔俾佢拍拖，直到17、18歲先俾，所以佢同女朋友都係識咗冇耐，我見過個女仔，性格開朗純情，我鍾意呢類女仔。拍拖冇所謂，唔影響學業就得，最重要唔好一腳踏幾船。」至於16歲的二仔Jordan仍處於反叛期，Candy指最重要有耐性包容他，「青少年約10歲至12歲就出現反叛期，大仔比較文靜理智，反叛期只係一年，但二仔長達四年，好多嘢佢以為自己啱晒，好易諗埋一邊同發嬲，做父母千祈唔好頂撞佢，必須忍耐同多溝通。」
「美魔女」沒化妝阿仔唔慣
Candy重拾自信積極保養，贏得「美魔女」的稱號， 近日在一個修身廣告中， 盡顯美好身段，Candy笑言子晉初初對此稱號充滿疑惑，解釋了一番，「我話呢個稱號係好事嚟㗎，大家讚媽媽keep得好，佢知道後都好開心。」每次出外工作，Candy都悉心打扮，連訪問她也一絲不苟，執到最正以尊重對方，連三個仔都睇慣她的隆重打扮，輕鬆casual look反而看不慣，她笑說：「有次我同佢哋去超市買嘢，着件tee、輕便褲就出去，冇乜化妝， 佢哋覺得奇怪問我『你咁就出街喇？』係
呀，去超級市場簡簡單單就得啦，原來佢哋睇唔慣我咁樣出街，哈哈。」
