余迪偉遭艾粒開騷公開恥笑 嬲怒斥歧視 再爆「唔係第一次」！

余迪偉會見傳媒：真係夠喇咁多年

余迪偉續謂：「我身邊都有好多朋友受到例如職場、性別身份認同嘅欺凌，我自己曾經喺2018年嘅騷都講過，我曾經有個Ex，亦都因為承受唔到呢啲歧視壓力，喺職場被人玩、屋企人嘅歧視等等，雖然我哋分咗手但都係好好嘅朋友，但最後佢因為受唔住歧視租咗間屋然後燒炭。我到咁多年都係耿耿於懷，雖然我平時開咪談笑風生，我係一個好無所謂嘅人，我做人亦都係非常之光明磊落，但係經過今次之後我覺得我嘅嬲，唔單止係要為我自己發聲，我亦都要為一眾受到任何歧視嘅人發聲。」

事件驚動高層 余迪偉已大方原諒

被問到是否已經原諒當奴和阿占，余迪偉：「我梗係會原諒佢哋啦，始終一齊做嘢，但原諒還原諒，嬲都會完嘅，但係歧視係唔會完嘅，所以我希望籍住今次出咗呢個post話俾大家聽，It’s about time to stop，enough is enough，希望唔會再有下次。」

當奴少爺占貴為節目總監 網友憂余迪偉將「被清算」

現場記者問到當奴及少爺占都是商台的高層（二人分別為叱咤903節目副總監及音樂總監），余迪偉會否怕得罪？余迪偉則指：

「都要面對，行出嚟講平權嘅人都會有啲不幸，但係話我勇敢都好，我覺得係要做。公司好支持，話個兩個嘢係玩過份咗，希望你原諒佢啦。」

同時余迪偉亦有再爆在公司不止一次遇過同事歧視： 「試過有位女同事帶個幾歲仔返Office玩，該女同事個丈夫，當著我面同個仔講『你唔好同呢個哥哥玩，佢鍾意玩後面』，我當時只能對嗰位小朋友講『希望你可以小心成長』，喺呢呢種父母底下，我只可以咁講！」 網友都為余迪偉感到擔心，表面上艾粒為此道歉，但公開指控難免氣難下，紛紛建議余迪偉搵定後路，以免他日「被清算」！

當奴IG出Post道歉 承諾剪走演出

當奴於事發翌日下午、余迪偉開咪做節目前，已其IG發出道歉帖文：「就日前艾粒騷以過去環節文化節拍重溫一事而闖出的禍，令當事人迪偉先生受到冒犯，我們鄭重地衷心向迪偉先生道歉。感謝迪偉大人有大量，得知你已接受道歉，我們萬分感激。我們會更改餘下場次節目內容，並承諾以此為鑒，日後會更加小心顧及所有人感受。我知道錯了，對不起。」商台DJ如朱薰、梁文禮等都有留言送上心心表示支持。

艾粒令余迪偉大怒 凌晨出po鬧爆

艾粒開騷反應向來熱烈，2月9日晚展開序幕的《Part2 ! 王鳳女士XYZ 銀河道士大匯演》，有不少圈中人到場支持，包括謝安琪及蘇麗珊，現場觀眾睇得好High，不過與艾粒是同事多年的商台DJ余迪偉就非常不快，他於昨晚凌晨在社交網留言：

「Enough is enough！你哋都玩咗咁多年啦，我都冇出聲咁多年啦，你哋都有頭有面有地位，仲玩 ？呢張相係我IG嘅，有冇經過我同意上你哋個大台去賺錢呢 ？呢單嘢係性取向歧視同埋職場欺凌！」

字裡行間完全Feel到余迪偉有幾嬲，其帖文亦有加「@」通知阿占及當奴兩位始作俑者。

艾粒笑余迪偉笑足多年

其實多年來艾粒無論做節目或開騷，都有拿「迪偉後花園」及「迪偉俱樂部」作為話題，不過今次玩大咗，他們在開騷前把一張余迪偉赤裸上身浸溫泉照片放在大螢幕，並打上「迪偉同你浸溫泉」的字眼，當作過場娛樂在場觀眾，但原來艾粒事前並未經余迪偉本人同意借用照片，忍足多年的余迪偉終於爆seed。至於余迪偉認為艾粒的行為有職場欺凌之嫌，是因為當奴唐劍康效力商台多年，已升做叱咤903節目副總監，身為電台高層被指有恃無恐。

網民力撐余迪偉 直斥艾粒技窮唔識尊重人

余迪偉公開控訴艾粒後，網民見迪偉發火都留言力撐，但亦有網民誤以為艾粒笑余迪偉多年，以為當事人不介意，甚至是好friend，亦有網民懷疑余迪偉是假嬲，幫艾粒做宣傳。點都好，鬧艾粒的聲音都好澎湃，網民留言「呢兩條友，bad taste、技窮」「呢兩條友玩左迪偉同梁文禮咁多年，根本呢代人仲歧視當講笑，呢兩個人要負好大責任」「 如果要用人哋張相， 其實真係應該要問一聲」「佢兩個經常係節目笑迪偉，以為佢哋好friend，原來搞錯咗……」，網民幾乎一面倒支持余迪偉，更提議去平機會提告。

艾粒Part2無新意Hea做

有網民指艾粒向來都係得幾招，開騷多年亦技窮，愈來愈呃飯食，今次除了少爺占扮女人、當奴扮道士，仲有幾Part Hea扮Anson Lo同COLLAR跳唱，甚至扮參加Fist Take大唱《First Love》，不過每節都好散亂，真係唔係人人識欣賞。今次艾粒擺余迪偉上台吸嬲成功，唔知第二晚仲敢唔敢繼續講余迪偉個後花園呢？