芷珊約您｜黎芷珊自爆如何打動許志安首度剖白「安心事件」：一世的傷疤！
黎芷珊分享如何打動許志安
今輯訪問中，千嬅和安仔更會百分百坦蕩蕩分享之前遇到事業低谷時的真實感受、及如何克服逆境，有血有汗有洋蔥！早前無綫官方社交網陸續釋出 7 大單位嘉賓的精彩預告片，在許志安的一集，他首度剖白 2019 年偷食出軌後經歷低潮期後的衝擊，並坦言是「一世的傷疤」，甚至因此對歌唱事業失去期望。芷珊約咗許志安喺澳門傾計！
首次談及「安心事件」認成一世傷疤
芷珊坦言嚟緊星期日首播，心情有啲緊張，唔知觀眾鍾唔鍾意呢個新訪談節目嘅形式，許志安的預告片一出街，立即引起好大迴響，原來芷珊係靠「交情」打動安仔，更首度開腔回應安心事件，安仔形容為一世傷疤，不過有觀眾就不滿他以「受害人」形象現身！
觀眾留言展示不滿
有觀眾留言直接表示「唔想睇，繼續安心在家，關心Sammi比較好」、「私下 or 公開的confession ，不等如可以當刺激的出軌之事冇發生過。經歷就是經歷，歷史就是歷史；是不能像粉筆字咁抹咗佢」、「收山啦，見到你就諗起 廚房宣言+ 的士出行 其實點面對自己。 要有幾厚面皮先做到。」
但亦有人對許志安表示支持「罪犯都總有出一獄的一天，寬恕是一種選擇。」不過支持者都語帶譏諷
「事件只是“不幸”被爆，只能認衰仔；想想，若沒爆，可能女人都換了幾批！」
偷食黃心穎出事「睇嘢冇顏色」
2019 年偷食黃心穎斷正，經歷人生低潮的安仔，曾暫停所有藝演工作，直到 2022 年才正式復出。他向相識二十載的芷珊罕有地重提當年事件，不但對其人生和事業造成極大影響，更足足花了三年時間才能面對心理關口；曾一度收埋自己，甚少回覆電話之餘，更直言不夠膽期望事業會有將來：「嗰刻嘅我係人生最……痛苦、最黑暗，睇嘢冇顏色。」
靠睇書＋彈鋼琴彈結他舒緩壓力
能夠走出陰霾、勇敢面對錯失，安仔最感激太太鄭秀文（Sammi）的鼓勵、陪伴和寬恕，他緊握拳頭肉緊地說：「我自己冇勇氣嘅話，真係對唔住愛我嘅人。」並大拋「男人核心論」:「一個男人喺家庭裡面係要咁，要去勇敢地面對所有嘢，而呢樣嘢先至係個核心。」安仔又重提曾形容自己是「壞咗嘅人」一事：「畀個機會我，壞咗做番好。」相當有誠意。在自我療癒的數年間，安仔除靠閱讀書籍舒緩心境，還重拾彈鋼琴及彈結他練歌的日子增值自己，安仔坦言該段沉澱的時間對自己來說是最無價的。
經歷過低潮期後，安仔自覺視野比以前寬闊，待人處事有了不同角度，最重要的是，Sammi 都覺得安仔變得成熟了；Sammi 鼓勵安仔復出，就連演唱會歌單都給予他很多意見。
「依個傷疤會跟住我一世」
他續指 Sammi 十分關心其內心感受，二人聊了很多，現在安仔學懂聆聽別人，說到此處安仔一度哽咽：「可能以前冇聆聽得咁多，會覺得……你（Sammi）搞得掂。」、「依個傷疤會跟住我一世，成為提示我做人嘅方向。」芷珊與安仔認識多年，見證他與 Sammi 多次離合，問到事件可有令二人感情昇華？他一臉嚴肅表示：「呢件事之後，唔好再用呢啲字眼。」
深入舞台採訪 直擊7 組嘉賓上台前真實一面
此外，片段見芷珊除了緊貼各組嘉賓深入舞台不同角落，還會由綵排一直貼身跟拍至上台，為大家揭秘 7 組嘉賓臨上台表演前最真實一面；芷珊與嘉賓的訪談地點亦不會局限於餐廳或室內，其中張敬軒一集，芷珊便與軒仔坐在紐約的 Limo（豪華轎車）上閒話家常，仲要大歎香檳，勁 Chill！
親自構思節目碌盡人情卡其實為「自肥」？
《芷珊約您》早於去年年初已開始籌備，芷珊受訪時透露節目構思起點源於疫情過後、自己私心想出國旅遊順道拍攝節目，難怪芷珊亦笑指是「自肥」之作：「以往做開嘅訪談節目多數坐定定，但係依家觀眾要求愈嚟愈高，多啲畫面會更加吸引，所以就諗有咩形式嘅訪談節目可以飛去唔同地方呢？加上歌手系列我未做過，所以就諗到需要周圍飛嘅巡迴演唱會。」經過一輪籌備及聯絡工作，節目於去年 7 月正式開拍，芷珊續指希望透過節目，讓觀眾看到更多歌手們不為人知的一面：「大家只係睇到台上嘅表演，台後其實仲有好多特別嘢，諗都諗唔到會發生嘅，我覺得都幾有趣架！」
邀約歌手期間食盡檸檬
談到能夠請到這麼多位樂壇頂級歌手擔任嘉賓，出名在娛圈人脈甚廣的芷珊笑言亦有「食檸檬」時候，原因與「紀錄片」拍攝形式有關：「有啲歌手嚇親，因為全程要跟住，但我就係想有變化，所以最終唔成事。同埋嗰陣係疫情尾聲，有啲歌手仲會戴口罩，同埋除咗開騷其餘時間都留喺酒店，比較難配合拍攝。」加上每位歌手檔期不同，演唱會後台又多「神秘禁地」，洽談過程絕對是一大挑戰，芷珊說：「雖然台後好多嘢拍，但有啲嘢唔穿得，要一路同嘉賓嗰邊傾。」親授當金牌主持技巧
芷珊又揚言節目「咩都有得睇」，訪談內容除圍繞事業、家庭、私人生活，還會探討社會話題。談到為何能贏得如此多藝人信任，芷珊笑指除了事前要花功夫做功課，對受訪者有深入及清晰的了解外，還必須與對方事前有充分溝通：「我訪問前會再同佢哋傾吓偈先，畀佢哋知我嘅方向係點、希望件事出嚟係點，等佢哋有信心，就會好放心、好坦白咁同我盡訴心中情。」
想知道更多相關精彩資訊，敬請留意 www.tvb.com。
