萬千星輝賀台慶|「福祿壽」翻生再扮嘢 王祖藍激似林作、阮兆祥整喊曾志偉
TVB台慶2023|曾志偉講職位變動用6字總結!揚言要鞭策郭珮文
曾志偉在訪問中被問到職位可能有變動一事,笑言:「我驚變咗老闆,即係跳級,唔好啦!變乜鬼嘢,仲有咩變,我平時都係同所有員工、同事打成一片,我覺得職位係唔重要,最重要係你做到咩嘢,你做唔到好成績,畀你坐更高位都冇用。所以我對呢樣嘢唔係好著緊,我做戲都做咗咁多年,同埋自己年紀都唔細,但求做好件事。」
TVB台慶2023|曾志偉學坤哥話齋:一步一步咁行落去
被問到有冇打算繼續做幾多年?曾志偉回答:「真係冇,好似頭先阿坤哥講咁樣,係一步一步咁行落去。由我啱啱入嚟到依家呢日,好多同事已經好明白,大家一齊走落去條路要點行。初初同大家一齊行嗰時,大家都仲喺度捉摸緊我想要啲乜嘢,但係到依家大家都好明白,同埋大家都好齊心去做。」而講到對未來的計劃,他就表示:「有嘅,但係好難喺依家就馬上講畀大家聽,今晚等我享受完今晚嘅賽果先。」
TVB台慶2023|曾志偉講郭珮文攞獎:要鞭策吓佢
講到郭珮文(Juliana)贏得42萬獎金後表情呆滯,被曾志偉問她:「你未瞓醒咩?」曾志偉笑言:「佢個人係咁㗎,我同佢綵排時已經係咁,佢成日都係錯咗又唔知錯咩,做得好佢又唔知做得好咩,所以有時artist係要鞭策,攞獎都要鞭策吓佢!咁其實攞獎係好開心嘅事㗎嘛,四十幾萬喎,佢都仲可以…(發夢?)我諗佢以為係做騷,一陣間會收返,我知攞車嗰個小朋友都係,正想話畀大家聽我哋真係冇內定,如果有內定就唔會咁嘅表情啦!」
TVB台慶2023|台慶表演曾志偉畀100分
而講到台慶的表演,曾志偉就話要畀100分:「唔係話所有節目真係做得好好,但我係畀所有同事100分,因為每個人都盡心盡力,為咗TVB生日,好似自己屋企擺酒咁樣,為咗啲來賓去做好自己,可以睇到佢哋每一個團隊精神。其實今朝綵排嘅時候都見到,有啲同事拍緊劇唔得閒嚟,寧願請老師幫佢喺片場排,有啲喺屋企自己練,都要做好自己嗰part,我覺得呢啲team spirit好難得。」
TVB台慶2023|曾志偉:要擺出誠意畀觀眾睇
曾志偉續指:「即係同我哋以前做主持一樣,每一part都要大家擊掌,good show!good show!咁樣,呢個係好重要嘅,今朝綵排嗰陣時,我已經同大家講,我哋做節目有一樣嘢最重要,就係一定要擺出誠意畀觀眾睇,觀眾個個都係叻人嚟,你有心做定hea住做大家係知嘅,今日觀眾係完全接受到,覺得佢哋每一個同事都係用心去做好自己嘅每一part,咁所以得返嚟嘅反應係咁好。」
李思捷扮「拜金」
李思捷假扮成美國總統拜登,化身「拜金」諷刺香港政府推出的鼓勵生育基金:「我嚟到香港唔單止想參加《中年好聲音》,我仲想喺香港生仔,生BB,因為而家喺香港生BB有2萬!」
王祖藍扮「淋作」
王祖藍扮成「淋作」不斷向「抽水王」林作抽水,唱出的《最佳女友》更是句句直線抽擊:「裕美你永冇將我嫌棄」、「裕美我愛你一世完美」,甚至更拎埋飯盒,諷刺當日林作保釋時,裕美為他送上飯盒的一幕:「做我女朋友送飯盒就夠」。
阮兆祥扮「林加洞」
阮兆祥壓軸出場扮成林家棟,以「林加洞」之名向總經理曾志偉表忠兼擦鞋,唱出改編自《喜歡你》的《總經理》憑歌寄意,句句歌詞更是包含對曾志偉的謝意:「總經理我知你頭痕,總有你坐陣」、「問你可幾點瞓」、「太過分會令你激心,做手術唞一晚」、「總經理,你不要頭暈,我總會慰問」,聽到台下的曾志偉都眼濕濕……