【萬千星輝頒獎典禮2018】有洋蔥！有驚喜！完整得獎名單＋8大亮點 一文睇晒！
撰文：Joanne 圖片：myTVsuper截圖
第一大亮點：大小姐眾望所歸
最佳女配角 – 林淑敏
舊年獲得大批網民力撐嘅「大小姐」林淑敏，竟然畀朱晨麗爆冷跑出而「撻Q」，搞到網民好嬲，仲揚言要杯葛大台！
今年「大小姐」終於眾望所歸坐正！憑《愛回家之開心速遞》攞到「最佳女配角」 。
好拍檔「送水輝」、「KC」同「Terry」，都第一時間向「大小姐」道賀！
林淑敏喺台上致謝時說：「7年前嗰場大病之後，我諗仲做得乜，樂小姐一個電話，叫我唔使擔心。」最後「大小姐」都感謝老公多年來嘅無私支持！仲話會繼續謙虛演好每個角色。
第二大亮點：綠葉演員有嘉許
專業演員大獎 -盧宛茵、歐瑞偉、鄭子誠
出道45年嘅Madam盧宛茵，今年喺《BB來了》中飾演惡奶奶入型入格，雖然失落「最佳女配角」，但係都獲頒「專業演員大獎」。Madam一上到台就即喜極而泣，仲話自己係好感性，拍喊戲從來唔使滴眼藥水！
打咗30幾年嘅，今時今日竟然係靠搞笑入屋，歐瑞偉同樣都話冇諗想過自己會得奬，所以冇準備致謝辭，佢除咗要多謝太太同一對仔女之外，仲有多謝「我嘅Terry（李偉健）」
人人話一見佢就覺得係「有陰謀」，事實上好謙虛嘅鄭誠，就話攞奬唔敢當，只係有做演員最基本嘅態度。「我每日工作時候都遇上非常專業嘅同事們，相信大部分同事們都配得上攞這個獎。」
最強最閃大亮點：蕭正楠騎劫節目爆婚訊
最受歡迎電視拍檔 – 蕭正楠、曹永廉
呢個本來都唔算係咩大獎，但係得獎者蕭正楠突然喺節目上宣布婚訊，就真係全晚最最最出人意表喇！
一上台曹永廉就已經以快打慢，爭取時間講晒感受，就係想留番多啲時間畀蕭正楠做「正經事」！
蕭正楠：「2018年喺我工作上有好多成就，拍咗好多好好嘅劇，做咗好好嘅綜藝節目，而喺我人生中，我都做咗一個好大嘅決定，我好想趁呢個機會，多謝我太太黃翠如。」
一句：「多謝我太太黃翠如。」全場即時起哄！
翠如BB覺得冧豬之餘，都感動到眼濕濕！
喺全場起哄下，蕭生蕭太喺螢幕前深情一吻。
第四大亮點：天然呆馬明台上倒米
最受歡迎電視男角色：馬國明《宮心計2深宮計》
年年頒獎禮都畀人捕捉到「天然呆」，今年都唔例外， 當成班「胡道八道會」成員問大家估係邊個攞獎嗰陣，馬國明已經不斷口噏噏講：「黎諾懿」。
點知一宣布又係自己，佢又發揮天然呆狀態！
呢個「最受歡迎電視男角色」，馬明已經係第三次攞到，之前係憑《On call 36小時》、《降魔的》，仲有今次嘅《宮心計2之深宮計》，每次同視帝都係差一步。
一上台，馬明就倒公司米，話唔使畀紙巾佢，因為佢冇收錢，唔係代言人。又話唔知自己點解會攞獎，搞到台上嘅胡杏兒同台下班高層都笑得好尷尬。
「惟有多謝套劇同埋錫我嘅團隊，都要多謝高層，今晚真係好大嘅Surprise。」
無論馬明攞嘅係咩獎，相信台下嘅黃心穎都係一樣咁開心！
第五大亮點：馬神打破千年老二宿命攞視帝
最佳男主角：馬德鐘《跳躍生命線》
入行25年，獲提名視帝16次都無功而回，馬德鐘今屆終於憑《跳躍生命線》，穩坐視帝寶座！一宣布嗰陣，所有提名人都為佢高興！
同劇飾演佢姨仔嘅劉佩玥都忍唔住喊！
負責頒獎嘅胡定欣，拍第一部劇《衝上雲霄》嗰陣，就係飾演馬神嘅妹妹，所以頒獎嗰陣都好興奮呀！
同馬明一樣，都係同視帝擦身而過十幾次，馬神喺台上最感激嘅就係屋企人：「多謝屋企人，相信爸爸喺天上面睇到，多謝我個仔，佢帶畀我好多快樂，多謝我太太，佢照顧得我同屋企好好，做藝人太太唔容易！」
第六大亮點：煒哥大熱倒灶喊爆
最受歡迎電視女角色：陳煒《宮心計2深宮計》
賽前被視為視后爭奪戰嘅大熱，煒哥喺聽到自己得到「最受歡迎電視女角色」就已經忍唔住喊，唔知係失望到喊，定係開心到喊
呢？
行出去攞獎之前，有好多藝員起身恭喜煒哥，當中包括同屬亞視幫嘅陳展鵬。
煒哥話自己加入大台嘅時候，就係自己人生最低潮嘅時候，所以好感激大台畀咗咁多機會佢。
煒哥亦都多謝《宮心計2深宮計》監製梅小青，因為佢哋只係第一次合作，但係小青姐都將個咁重要嘅角色交畀佢。
而家攞到獎，就算啲對白好難背，背得好辛苦，都值得啦，煒哥！
第七大亮點：Ail度定致謝辭攞視后
最佳女主角：李佳芯《BB來了》
宣布前，佳芯BB已經好淡定，反而之前成為星馬雙料視后嘅黃智雯，仲有啲若有所思。
係你喇！佳芯BB即時鬆一口氣，隔離左右，前後左右都爭住講恭喜！
佳芯BB定過神之後，就頭也不回上台領獎，連煒哥企起身行埋去講恭喜都睇唔到。
上到台，佳芯BB已經好有條理咁多謝每一個想多謝嘅人，就升畀FM圈佢快啲，都依然好淡定。
佳芯BB話最緊要多謝咁多個「允豬」，同埋飾演佢老公嘅黎諾懿。
「我唔係贏在起跑線，我係一舊飯，都係靠自己，如果覺得攰，記住唔止你一個行，仲有人默默陪你，多謝家人，媽媽、爸爸同哥哥，最感恩佢哋可以見證住我事業最高嘅一刻！」
第八大亮點：阿姐話最緊要多謝自己
最佳劇集：《跳躍生命線》
一向敢言嘅阿姐汪明荃，繼上屆頒獎禮叫大家唔好搞「山頭主義」之後，今屆又叫大家唔好上親台攞獎就爭住多謝嗰幾個高層！又話自己攞過8次獎，都唔係靠埋堆、派系，又冇送禮物畀邊個邊個，又冇傾續約，冇扭計，自己又唔會完全聽話，仲得罪咗好多人，一路以嚟都只係做好一樣嘢，就係，做好自己！
所以攞到獎，唔好淨係第一時間多謝嗰幾個高層，應該要多謝自己，「因為你真係付出咗好多努力，攞獎係應該嘅！」
但係阿姐講完呢番「肺腑之言」之後，都係有兜底多謝大台嘅，因為佢話佢大台，就冇之前講嘅嘢喎！阿姐真係阿姐！幾⋯⋯圓滑！
講番得獎嘅「最佳劇集」，就係全晚嘅大贏家《跳躍生命線》。
成班「救護員」都不知幾興奮！
劉佩玥又係忍唔住，係咁喊！不過最想喊應該係阿監制，因為個節目超晒時，冇時間畀佢講感受⋯⋯
佢就唯有攞張貓紙出嚟，叫攝影師畀個close up，就當多謝咗想多謝嘅人。
咁識做，所以次次做完騷都趕住番去瞓嘅Do姐，都要多謝阿監制一聲！
其他得獎名單
最佳男配角 – 梁烈唯
梁烈唯憑《是咁的，法官閣下》首度奪得「最佳男配角」，當宣布佢得獎嗰陣，佢好似完全唔識反應咁，身邊成班藝員拍佢同佢講恭喜，佢先慢慢有番反應，開心到喊！
佢一上台就話，如果我早知有獎攞，就搵人化妝、梳頭！早幾年喪畀人「負皮」，仲封為「負皮王」，多得有好多朋友同前輩同佢傾偈，先可以撐得過，除咗多謝佢哋之外，當然仲要多謝太太：「要同太太講聲I Love You，冇佢喺身邊支持我，提醒我，我可能冇機會企喺個台度，仲有我個女！」
最佳節目主持：田蕊妮《女人四十》
今年踏入40歲嘅田蕊妮，早就攞咗視后，今次就憑《女人四十》攞到最佳節目主持！
講得獎感受嘅時候，阿田愈講愈激動，因為今次節目佢由構思到策劃都有份參與，令佢可以發掘到自己另一方面嘅能力。
喺台上阿田亦有多謝父母，特別係已經過身嘅媽媽，因為媽媽遺傳到好多好嘅嘢畀佢。此外，佢亦都多謝自己。因為製作《女人四十》，佢覺得自己係為女人做咗啲嘢，希望女人唔會被年齡規限！
萬千光輝演藝人大獎 – 薛家燕
今年係68歲嘅家燕姐入行60周年，攞到呢個表揚佢嘅演藝成就，別具意義！
由兩位對家燕姐演藝生命中，兩個最重要嘅男人，修哥胡楓同黎小田一齊頒獎！
家燕姐好感恩得到呢個獎作為肯定，因為喺佢人生最失意時，珍姐搵佢入大台拍《真情》，就算幾辛苦佢都唔怕，因為冇呢個機會就好難有安穩嘅家，所以佢會繼續努力報答大家。
飛耀進步男藝員 – 何廣沛
訓練班出身嘅何廣沛，由小角色，做到有名有姓嘅，由做到男一，努力有目其睹。
「多謝公司安排好多前輩同我合作，畀我喺佢哋身邊偷師，每一位都係我好好嘅榜樣， 當然要多謝我屋企人、多謝26期訓練班嘅兄弟姊妹同埋導師鄭丹瑞，旦爸，我得咗喇！」
飛耀進步女藝員 – 馮盈盈
因為言論出位，馮盈盈被網民封為「貼地港姐」，外界反應有好有唔好，一宣佈得獎者時，馮盈盈都表得好意外！
上到台都唔知講咩好，「因為一直以嚟以為自己唔會拎呢個獎，所以冇諗講啲咩，仲諗住頒完去洗手間，我覺得自己係未夠班嘅，所以一定要好多謝一直以嚟畀機會我嘅人，我覺得自己嘅表演未夠滿分，佢哋好大膽畀機會我，嚟緊要再努力啲，先可以再進步，未來我會努力做好。」
最佳非戲劇節目
《森美旅行團》
今次節目有紙巾贊助，森美攞獎後，抵死地話要攝吓口水 。
