萬千星輝頒獎典禮2023|網民狠批3大寒酸位 笑指似足謝師宴
TVB頒獎典禮睇落勁low budget 3大重點似足中學Grad din?
《萬千星輝頒獎典禮2023》今屆去咗澳門上葡京綜合渡假村上葡京禮堂舉行,藝人們齊齊坐圓枱等拎獎睇表演。但有網民就認為呢種圓枱以及整個場面真係勁大陣「low budget味」。
第1,指出似同中學Grad din差唔多level咁,簡直真係一間普通公司圍威喂搞Annual dinner,完全無晒舊日嗰種星光熠熠的感覺!
第2,普遍公司Annual dinner起碼有嘢食,有獎抽,但網民指見到成班藝人淨係得個坐字,枱上得杯嘢飲,少少嘢食都無,睇落仲寒酸!
第3,昔日頒獎典禮主持都會有汪明荃、曾志偉、Do姐等,近呢2年已經唔見晒,今年仲要變成丁子朗,網民話就連主持都襯返。
網民:好過酒樓擺酒少少 成晚靠藝人叫囂撐場圍威喂
網民亦開Post討論,寫道:「好有百萬圓桌feel,成日聽到成個場冇聲,得啲友無啦啦X起哄圍威喂,成陣味真係好濃」、「只係好過酒樓擺酒少少」、「真係唔講上葡京以為邊間酒樓」、「人哋韓國sbs mbc 都係圍威喂,但唔會靠啲藝人叫囂撐場,似返個頒獎禮」、「冇睇tvb,但以前搞頒獎禮好似隆重好多,做咩而家搞到擺酒咁」、「自己公司annual dinner個場都大過佢」、「今年係上葡京搞酒樓feel,同廠入面有佈景舞台真係差勁遠」、「樓底勁矮,空間感好迫,即刻覺得好低級」、「出年搵間放得落二,三十人嘅房搞就算啦」、「annual dinner但唔見有嘢食」、「似聯歡晚會」、「我見同人哋d婚禮會場好似仲靚少少」。
有網民力撐:TVB自己台搞頒獎典禮緊係圍威喂啦
不過都有網民唔認同,指自己台搞頒獎典禮緊係圍威喂啦,唔通叫埋對台ViuTV上嚟咩,又指TVB頒獎典禮其實真係TVB的Annual dinne:「本身就係TVB嘅Annual dinne」,又有網民指今次唔駛錢已經好好:「唔駛用自己錢攪仲想點」、「mc遲下開show都係呢到啦,最重要個場係贊助嚟」、「又唔係金像獎好正常啫」、「今年係最好睇一年」。