萬千星輝頒獎典禮2023｜林敏驄亂講嘢大放笑彈 袁志偉得獎惹爭議

萬千星輝頒獎典禮2023｜一文看清7大重點！

萬千星輝頒獎典禮2023｜1. 佘詩曼、陳豪畀面拍開場片段劇透賽果

今年頒獎典禮開場前，有丁子朗惡搞今年播出嘅各大劇集，包括《隱形戰隊》、《一舞傾城》、《寵愛Pet Pet》等。當惡搞到《羅密歐與祝英台》時，視帝陳豪竟然驚喜登場，之後更以《破毒強人》的「文華」造型登場。佘詩曼就壓軸以「Man姐」身份登場，網民們都睇到好驚喜，而結果兩位最後就成為壓軸視帝視后得主，部份觀眾在開場就已猜到賽果！

群姐扮高Ling拉拉鍊，場面勁爆笑：

萬千星輝頒獎典禮2023｜2. 林子善獲男配喪幫TVB賣廣告

林子善在2005年轉投TVB後，時隔十八年終於憑《隱形戰隊》獲得「最佳男配角」。林子善一上台就跪謝父母，由帶佢入行的周星馳開始講起，多謝每一個在其演藝路上幫過佢嘅人，包括李力持、田啟文和黃子華等人。最後更多次呼籲客戶為TVB落廣告，講到頒獎嘉賓朱咪咪狂圈都唔走。

萬千星輝頒獎典禮2023｜3.劉佩玥化身「迎賓小姐」出鏡率奇高

今晚要數最突出的就一定係劉佩玥（阿Moon），事關今晚多位得獎者均為《隱形戰隊》的演員，包括「飛躍進步女藝員」的劉穎鏇和「最佳男配角」的林子善。每當好朋友獲獎時，阿Moon都表現得非常興奮，每次都起身上前送上祝賀，出鏡率奇高！

萬千星輝頒獎典禮2023｜4.林明禎驚喜登場叫修哥做男友

每次頒獎典禮的頒獎嘉賓們都會刻意搞笑，而搞到場面非常尷尬，不過今年「大馬女神」林明禎同胡楓（修哥）的組合就非常合拍。林明禎難得亮相TVB，修哥即刻邀請林明禎合拍TVB劇集，並邀請對方做自己孫女。不過林明禎就大賣口乖，叫修哥做男友，修哥就即刻扮聽唔到，要林明禎講多幾次，非常可愛。到馬國明上台領「馬來西亞最喜愛TVB男主角 」時，修哥又發揮鬼馬一面，攬實嗰獎唔畀馬國明，大搞氣氛！

萬千星輝頒獎典禮2023｜5. 林敏驄大放笑彈

今年林敏驄在頒獎台上再次大放笑彈，今晚林敏驄就伙拍江美儀上台為「最佳綜藝節目」及「最佳資訊及專題節目」擔任頒獎嘉賓。林敏驄一上台就不斷亂講嘢，一嚟就將《隱形戰隊》 講成「隱形照隊」。當江美儀講到綜藝主持要大方得體時，林敏驄又點名提起已經離巢的Do姐，搞到江美儀即刻話「喂，走咗喇！」，嚇到林敏驄表示「走咗？咁快開始炒人喇？」，之後又提起已經離巢的余詠珊，即刻笑爆全場。其後到《中年好聲音》獲獎時，林敏驄又話下年要開拍《中年邵音音》，無厘頭到超爆笑。

萬千星輝頒獎典禮2023｜6. 致敬過世藝人 李玟一出現炎明熹即哽咽

每年台慶頒獎典禮都會拍攝影片致敬該年度過世藝人和幕後工作人員，今年亦不例外。今年邊播致敬片段，邊有After Class伴唱林子祥的《抱緊眼前人》。當影片播到過世天后李玟時，與李玟交情甚深的炎明熹即刻哽咽，未能繼續唱下去，身旁的鍾柔美Yumi見狀即刻伸手攬腰以作安慰。

萬千星輝頒獎典禮2023｜7. 新人獎變豬肉獎 聲夢小花談吐超得體

TVB今年特別新設「最具潛質新人」獎項，只有25歲或以下才有資格入圍。今年一共有21人入圍，不過就有五位新人奪獎，包括鍾柔美、游嘉欣、冼靖峰、古佩玲、炎明熹，令此新獎項淪為「豬肉獎」。不少網民都大讚「聲夢小花」鍾柔美、炎明熹談吐最為得體，而網民們都表示古佩玲就繼續「硬面」，仲話佢「塊面真係郁唔到」。

萬千星輝頒獎典禮2023｜視帝視后及主要獎項

萬千星輝頒獎典禮2023｜袁志偉奪獎惹熱議

早幾年「萬千光輝演藝大獎」曾經由姜大衛、「珍姐」曾勵珍奪獎，不過今年獎項改名為「萬千光輝榮譽大獎」由現任現任TVB助理總經理（新聞部）袁志偉獲得！袁志偉1977年就加入TVB新聞部，係翡翠台開台以嚟最年輕嘅主播，由主持到管理層！ 他在台上表示無諗過「攞啲咁嘅獎」，又表示加入TVB不但係自己第一份工作，相信亦係最後一份工作，因為任職已經接近47年。

不過袁志偉以新聞部主管身份得「萬千光輝榮譽大獎」（編按： 去年珍姐得獎的獎項原名為「演藝大獎」、今年改為「榮譽大獎」）就惹來觀眾疑惑，因為TVB新聞部向來獨立於綜藝戲劇組，不會出席大騷領獎，任職期間絕不會以個人接受訪問，例如去年方東昇《尋人記II》得「最佳節目男主持」獎項亦無自己領獎，今次打破慣例，有觀眾認為與演藝頒獎主題宗旨有出入，不過主辦單位畢竟是TVB，獎項要改名、向高層致敬，觀眾亦都無Say ！