萬千星輝頒獎典禮2024｜樊亦敏入圍視后！ 3分鐘感言多謝TVB無嫌棄自己
《萬千星輝頒獎典禮2024》樊亦敏53歲入圍爭視后
TVB《萬千星輝頒獎典禮2024》昨日（12月2日）公布了入圍名單，其中「最佳女主角」獎競爭激烈，憑《神耆小子》入圍的樊亦敏在講入圍感言時，感慨表示現年53歲的她是當中年紀最大的一個：
「我1991年參加香港小姐到依家，好多人問我：『三太點解成日都咁開心呢？』其實有一樣嘢我真係好多謝TVB，佢陪住我一齊長大，冇嫌棄過我，因為我91年當選港姐無耐嘅時候免疫系統有問題，我係光晒頭，公司好好，叫我不如唔好拍劇，去做綜藝，所以我係做過綜藝主持。」
樊亦敏回顧患病辛酸 感激TVB無嫌棄
樊亦敏續說：「因為當時戴住假髮拍嘢，所以我對自己係失咗信心，亦都有好多負評，覺得我工作態度好差，好多外景唔會出，但係公司好包容我，安排好多好好嘅梳化（梳頭化妝）畀我匿埋整頭髮，唔好畀人睇到我頭髮有一撻撻窿。經過呢段日子之後，我都出去見識過個世界，去過內地拍嘢，當我再返嚟嘅時候，公司亦都好好，首先要多謝樂小姐，叫我簽邵氏做經理人，亦都多謝珍姐畀咗好多機會我，甚至因為我身體嘅問題，令我突然之間好肥，肥到170磅，但公司都無嫌棄我，畀好多唔同嘅角色畀我做。」
恨獎恨到出口：我呢個年齡都可以攞到好難得
最後樊亦敏表示：「我除咗以三太喺2022年攞咗萬千星輝最受歡迎女角色獎之外，其實今年我係第一次喺呢個大家庭入面，獲提名最佳女主角，所以點解我要企側邊，因為我要過去摸吓佢！因為我覺得以我呢個年齡都可以做呢個最佳女主角都好難得，所以再次多謝我哋台前幕後咁多位，同埋三太好開心嘅其中一個原因，就係因為有公司呢個大家庭喺度，每一日都見到一張張笑臉，同埋真係多謝Ken哥（鄭則士），因為佢先令到我洪玫瑰呢個角色攞到….唔係，未攞到住，對唔住，恨到出口！」最後講足近3分鐘的她答應大家，如果真係攞到視后，她的得獎感言絕對不會這麼長。
樊亦敏名校畢業 1991年奪最上鏡小姐入行
樊亦敏（Amy）出身於名牌中學嘉諾撒聖瑪利書院，畢業後曾到東京國際大學附屬日本語學校讀日文。不時都會接拍廣告，而陽光檸檬茶廣告一定是她經典之作之一。在1991年樊亦敏20歲時回流並參選香港小姐競選，更奪得最上鏡小姐，同屆還有冠軍郭藹明及季軍蔡少芬。不過近年她卻飽受塵蟎過敏的困擾，更令體重上升變成「肥師奶」。不過現時的她已經積極瘦身，回復昔日光采。
樊亦敏憑著青春可人的外貌，入行後隨即受到賞識，接拍過不少電視劇，不過事業大爆發反而是在離開TVB之後，1996年開始轉戰內地，同年於中國大陸拍攝了《太極宗師》，2000年更憑《楊總正傳》獲得國家廣播電影電視總局飛天獎三等女主角獎，演技備受肯定，更是首位香港女演員入圍飛天獎女主角提名！
治療過敏症 靠3招成功減40磅
樊亦敏拍攝《金宵大廈2》時，因為過敏症情況嚴重，以致體重暴增至 71 公 斤，但樂觀的 Amy 反而覺得令她演繹角色時更入型入格。「拍攝期間因為過敏太嚴重，搞到自己腫咗好多，所以我就扚起心肝去治療過敏症。」改善飲食習慣和配合營養師餐單，令樊亦敏成功由71公斤減到53公斤，她選擇用健康方法慢慢減磅，加上保持心境樂觀，成功減走30幾、40磅。
53歲樊亦敏 係第二代陽光妹
樊亦敏在1991年以20歲之齡參選香港小姐，並奪得最上鏡小姐獎入行，又曾於1989年與鄭伊健拍攝的陽光檸檬茶廣告，成為第二代陽光妹，令網民留下深刻印象，此外她曾出錢出力幫助中風癱瘓的前輩劉家輝，亦令網民覺得她十分有情有義。近年她更憑藉在《愛回家》飾演「三太」白天娥，而深得觀眾喜愛，在2022年奪得「最受歡迎電視女角色」獎。
相關文章：樊亦敏「三太」奪最受歡迎女角色！隱形小富婆戴500萬勞力士開工
萬千星輝頒獎典禮2024丨最佳女主角視后入圍名單：
01《你不是她》馮盈盈
02《旁觀者》王敏奕
03《飛常日誌》蔡思貝
04《本尊就位》陳嘉慧
05《狀王之王》姚子羚
06《再見、枕邊人》張曦雯
07《再見、枕邊人》黃智雯
08《婚後事》陳自瑤
09《婚後事》王敏奕
10《逆天奇案2》林夏薇
11《逆天奇案2》蔣祖曼
12《神耆小子》 樊亦敏
13《反黑英雄》姚子羚
14《反黑英雄》朱晨麗
15《法證先鋒VI:倖存者的救贖》蔡潔
16《法證先鋒VI:倖存者的救贖》蔣祖曼
17《企業強人》張曦雯
18《企業強人》龔嘉欣
19《巾幗梟雄之懸崖》胡定欣
20《廉政行動2024》張曦雯
21《黑色月光》林夏薇
22《黑色月光》楊茜堯
23《異空感應》 陳曉華
