萬千星輝頒獎典禮2024｜現場9大花生位 林嘉華搶咪有怨氣韓毓霞妙計截停
萬千星輝頒獎典禮2024目錄
1｜節目嚴重超時 嘉賓個個好長氣！
今年頒獎禮時間由8點到11點半，不但頒獎禮後的特備節目要取消，連晚間新聞時段也要延後，由於眾多頒獎嘉賓和得獎者無視在場工作人員提示，部份嘉賓例如「長者男團」Hey Brother 亦不識趣，明知超時頒獎仍要搞爛Gag，導致節目遲遲未能準時完成！
2｜林嘉華榮獲「最失禮頒獎嘉賓」
韓毓霞和林嘉華今晚一同擔任「專業精神獎」的頒獎嘉賓。林嘉華一出場就開始重提1980年的舊事，韓毓霞想叫停林嘉華的時候，林嘉華竟然話「冇人撩我，我可以繼續」，之後不斷講，講到Overrun。直至頒完「專業精神獎」給TVB體育組之後，林嘉華繼續拎住嗰獎，又插嘴分享自己因為被委派採訪，新婚蜜月告吹，身邊「體育教父」李漢源好不容易才說得出感受，林嘉華此舉令網民都忍唔住狂鬧：「條友真心以為個獎自己有份」、「榮獲最失禮頒獎嘉賓」等。
3｜「三屆視帝」3缺1 黎耀祥入5強頂硬上頒視帝
到視帝頒獎環節，羅嘉良與有份角逐的黎耀祥負責頒獎，造成參選者頒獎畀自己有份的獎項的尷尬場面，黎耀祥在台上透露本來大會想集齊三位「三屆視帝」，但當中有一人「上咗岸」不理會無綫，所說的是同樣曾奪三屆視帝的郭晉安，由於旗下公司在去年尾成功上市，郭晉安旋即揚言放下幕前工作，退居幕後，因此謝絕無綫邀請出席頒獎禮。
- 羅嘉良分別於1997年、1998年、2002年憑電視劇《難兄難弟》、《天地豪情》、《流金歲月》先後奪得最佳男主角獎項
- 而黎耀祥分別於2009年、2010年、2012年憑電視劇《巾幗梟雄》、《巾幗梟雄之義海豪情》、《大太監》成為第二位獲得「三屆視帝」
- 郭晉安曾憑電視劇2003年《戇夫成龍》、2005年《阿旺新傳》及 2014年《忠奸人》 成為第三位「三屆視帝」
4 | 譚輝智開場表演繼續做「舞癡」
《萬千星輝頒獎典禮2024》今年一開場有一眾TVB藝人齊齊跳唱《The Greatest Showman》，其中有「舞癡」之稱的譚輝智，在表演的時候比其他參賽者快幾拍，非常突出！
5 | 家嫂王敏奕獲獎興奮大叫「老爺」
王敏奕今晚獲得「最佳衣著女藝人」，王敏奕得悉自己得獎後表現驚訝，在獲得獎項後更興奮表示「其實我頭先唔係著呢條裙，哈哈！哇我攞獎喇！」之後仲興奮大叫「老爺！」搞到全場嚇到O曬嘴！王敏奕見到現場反應之後先話「宜家唔係電視live㗎嘛？」其他藝員即刻開口提正在Live緊，家嫂聽到之後即刻嚇親，然後秒變害羞樣，連聲道歉，場面超爆笑。
6｜Benz雄超搶口 句句窒到爆
今晚「最佳男配角」由Benz雄許紹雄和溫碧霞負責頒獎，不過Benz雄今晚一出場就不停狂窒溫碧霞，又串溫碧霞睇唔到珍姐，又不停逼溫碧霞「噏」個心水出嚟，網民都睇到好尷尬：「Benz好X冇禮貌」、「Benz 雄咩事入左廢老領域」、「喂好尷尬呀，快啲頒啦」等。
7｜最佳電視劇主題曲表演多蝦碌
今晚「最佳電視劇主題曲」由一眾劇集主演介紹，再由聲夢出身的林智樂和Yumi鍾柔美唱出。林智樂打頭陣唱出的《黑色月光》主題曲《黯月》時，一開聲就破音；之後到蕭正楠介紹自己有份出演的《巾幗梟雄之懸》時，講講吓突然忘詞，一個環節卻蝦碌多多！最可惜的是，今屆得獎的姚焯菲無法演出得獎歌曲。
8｜頒獎台突然故障「一沉不起」
今晚另一花生位，一定莫過於頒獎台突然「一沉不起」。明明在頒發「最佳女配角」的時候依然正正常常，但到溫兆倫邵美琪之後， 頒獎枱未能升起，頒獎嘉賓同得獎者要執生拎咪，好在難唔到一班資深藝人。
9｜許文軒主持表現跌Watt
連續6年做旁白MC的許文軒在幕後負責介紹頒獎嘉賓同得獎者，不過就對住稿照讀都不斷食螺絲。到頒獎典禮尾聲出場介紹頒獎嘉賓甄子丹的時候，又同人撞嘴，今晚主持表現強差人意。
