姊弟戀收埋12年 家燕姐苦盡甘來
撰文：Joanne 圖片：新傳媒資料室、薛家燕Facebook專頁
秘戀12年 兩度求婚
家燕姐同前夫有過一段11年婚姻，前夫一走了之後，就也已經獨自撫養3名子女，如今仔大女大，連奶奶都埋喇！日前家燕姐喺接受訪問時自爆，原來佢同一個比佢年輕十幾年嘅商人，已經秘密拍拖12年，而且對方仲曾經兩度求婚，但係都被家燕姐所拒絕！
家姐姐喺訪問中透露，對方係一個喺上海創業嘅商人，兩人係透過朋友介紹認識，好傾得埋，完全冇因為年齡問題而出現障礙。男友曾經兩次求婚，但係家燕姐一直都未有答應，一來係兩人年齡有差距（家燕姐今年68歲），二來係因為上一段婚姻，仍然對家燕姐留有好大嘅陰影。
而大女珊珊亦都表明，三姊弟都好支持家燕姐呢段感情，以前見到媽咪有人追，都會擔心對方唔知係咪對媽咪有咩目的，但係經過12年嘅觀察，深深感受到對方對媽咪好好，好細心。但係因為對方唔係圈中人，所以家燕姐會繼續保持低調，好好保護呢段感情。
薛家燕入行60年，但係佢嘅夢想唔係事業，而係家庭。家燕姐話自己係一個好傳統嘅女人，婚姻對女人嚟講係好重要，只是諗唔到會遇上婚姻觸礁。
萬千寵愛到婚姻觸礁
8歲入行做童星，你係點入行？
薛：我阿爺擺大壽，我負責表演折子戲，當時有製片想開《七兒八女九狀詞》，睇到我演出，搵我演其中一個角色，我就入咗行嘞。跟住好多人請我拍戲，但我爸爸唔畀，佢覺得做戲子唔正當，想我讀書，但我媽咪覺得我好有天份，入到廠就識做戲、要喊就喊，嘈到去我阿爺度，我阿爺對八字有研究，佢一睇話我八字啱做呢行，將會名揚四海，就叫我爸爸栽培我，我朝早五點上堂學跳舞、學戲，之後先返學，放學做完功課，又學其他演戲嘅嘢。
咁細個流連片場開工賺錢，你童年係開心定唔開心？
薛：我童年係好開心，屋企環境又好，又唔係忙得好交關，因為我唔係拍好多戲，一到考試爸爸就唔接戲，所以我係比陳寶珠、馮寶寶接少好多戲，開心因為我鍾意吖嘛，就算拍天光我照返學，因為驚唔返學我爸爸唔畀我拍，學識咗上堂點瞓覺，就係隻手郁、好似寫緊字，其實係恰緊眼瞓。
你係七公主之一，應該好多公子哥兒追求？
薛：係呀，但嗰時我媽咪成日跟住，好難有人埋到身。去party，男同學想請我跳舞，一望到我媽咪就轉身。我爸爸都係，佢五個女，屋企接到電話，只要係男仔打嚟，就話：「唔喺度。」我覺得都幾阻礙。
你婚姻觸礁復出，但賺多過婚前二千倍都唔止，觀眾又有福，大家都開心！你當時經歷姻觸礁，心情係點？點樣捱過？
我好傳統嘅，我覺得婚姻對女人嚟講係好重要，所以當我結婚，我退出幕前，要相夫教子，為佢生兒育女，我34歲至結婚，算遲婚，所以婚後即刻生小朋友傳宗接代，我唔要事業，為我先生嘅事業做所有嘢，但人算不如天算，唔係每個人都咁好彩，遇到真係咁愛你嘅人、或者咁守本份嘅人，我嗰時真係好唔好彩，跌咗落低谷，咁點算呢？我最愛嘅人竟然唔愛我，嗰種慘法係講唔出，尤其是我自細得到萬千寵愛，我行出嚟，個個都話：「我好鍾意你！」但我最愛嘅人竟然唔要我，我先生走咗三年，嗰種失望，成日問「點解？唔要我都要三個仔女吖！」
遇上「好姨」 改變一生
我記得我由120磅瘦到得90磅，企起身條褲係即刻跌落嚟，嗰時覺得三個仔女係包袱，因為養大佢哋真係唔簡單，嗰時佢哋五歲、七歲同九歲，後來見到三個細路哥真係唔捨得，佢哋都好乖，我冇理由就咁走咗去，都要諗辦法養大佢哋，咁啱無綫搵我拍《真情》，話「好姨」個角色搵咗成年幾，覺得我好啱做，但酬勞好少，所以我推咗，我覺得我出嚟拍，得咁少錢，但又冇時間照顧三個小朋友，點知嗰日我去惠天賜同斑斑結婚，見到黎小田，我同佢真係好有淵源，佢話：「你離婚呀？早啲嫁畀我吖嘛！」我話：「你唔係依家嚟講呢啲嘢吖嘛！」佢問我有咩幫手，我同佢講無綫搵我拍《真情》，不過錢唔多、我推咗，佢問：「點解你唔搵陳冠明？」陳冠明係當年《家燕與小田》嘅資料搜集，但當時升到去綫電視藝員科經理，點知講講下，陳冠明行過嚟，小田話：「你做咩恰家燕姐，畀咁少錢嗌佢拍劇！」
一人捱大三子女
陳冠明唔知咩事，返去問珍姐(戲劇部主管曾勵珍)，珍姐就話：「佢冇話錢少，佢話唔拍咋嘛！」之後請我入無綫傾，開個銀碼畀我，我一睇，話諗下，佢哋話：「黎明都係呢個價嘞！」仲話我著件花衫、戴個襟花已經似十足當年內地嚟嘅人，不作他人選，我就做咗「好姨」嘞，真係諗唔到，拍咗兩個禮拜，套劇出街，我個Call機響唔停，搵我登台、拍廣告，嗰時忙到飛起，但機會難得，嗰時開始每日瞓兩、三個鐘，因為我冇司機，自己揸車，返到屋企睇仔女功課、再要睇劇本，第朝一早又開車開工。我嗰時搞到自己好忙，譬如中秋節，有三度請我，我三度都接，因為我驚去少一度，又唔見咗(口舊)錢，起碼經濟上安穩，唔使擔心冇錢供小朋友讀書。
你最強勁試過連踩幾多個鐘？
薛：最耐試過四、五日冇瞓覺，我日瞓四個鐘唔係一年，係好多年，我由《真情》到《皆大歡喜》，日日拍，仲要登台、做event，拍廣告、顧屋企，小朋友學校有咩活動，我全部都去，我唔想畀佢哋感覺冇人back up。
你大女成日擔心你捱壞身體！
薛：我係辛苦，但我enjoy過程，我入到廠，咩都唔記得，一做戲，好有滿足感，尤其有場戲做得好嘅時候，even做電台，我咁鍾意講嘢，難得你畀個咪我，仲要畀錢我，去邊度搵？我又鍾意唱歌、扮靚，呢行好啱我做。
大女冇同王梓軒拍拖
你見證仔仔耀庭求婚，心情點？滿意新抱？
薛：我好開心，我個仔識呢個女朋友兩年幾，我第一次見已經好鍾意，有幾次我哋出外，我哋都邀請佢一齊去，佢好得體、好有禮貌，有樣嘢好緊要，佢好錫我個仔，同埋佢唔係奢侈嘅人，佢好細心，久唔久煲湯叫我個仔攞畀我，好體貼，見到阿仔遇到意中人，我好開心，但我有排忙嘞，要幫手參與安排。過兩日見親家，我心情都好興奮。
大女祐珊係咪如外傳同王梓軒拍拖？你對佢婚事急唔急？
薛：其實急，所以我同啲傳媒講，如果佢唔係同王梓軒就唔好再寫嘞，因為妨礙㗎，有男仔想追，以為佢同王梓軒，咪望而卻步？佢兩個真係唔係拍拖，佢哋成日一齊，因為工作嘛！
有冇催大女結婚？
薛：有，我叫佢唔好咁忙，畀啲時間尋求Mr. Right，佢答我：「遇到就遇到㗎嘞！」不過佢真係好忙。你記得幫我寫佢唔係同王梓軒拍拖，畀個機會珊珊。
欣賞Celine
賺到錢，你將啲錢投資？
薛：我買磚頭，我覺得買物業最穩陣，股票、基金要跟得好緊貼、要了解市場，有失有得，但買物業，因為香港人多地方少，升值嘅能力係高，所以我買物業，亦都因為咁儲到錢。同埋我個人唔大使，你見慣嗰啲名牌，喺我身上搵唔到，哈哈哈！
外傳你每個仔女都送間樓！
薛：我儲到錢，買物業，當然唔係買一間，既然第日都係畀佢哋，不如分好佢，我2009年已經寫好平安紙，嗰時係沈殿霞提我嘅，因為佢入院做手術，佢唔知要住成個月，乜嘢都冇準備，連銀行過戶嘅錢都冇，要去簽名攞錢，佢同我講：「有啲嘢好難講，一定要做定。」所以2009年我做手術割膽，我去做平安紙，將啲物業分畀三個仔女，估唔到呢幾年我原來多咗好多嘢，哈哈哈，我最近都要去補充文件，橫豎第時都係佢哋㗎嘞。
買物業最犀利賺過幾多錢？有冇試過損手？
薛：有，我嗰時買過縮水舖，嗰時好慘呀，得嗰幾十萬積蓄，買嗰時間舖二百幾萬，人哋同我講好快有人接手，實賺，點知冇，嗰時月供萬幾蚊，又要養家，好吃力，後來好平賣咗出去，可以講係畀人呃。賺嘅都有，嗰時我「家燕媽媽藝術中心」係借場地上堂，上完堂啲家長學生想留多陣，都畀人趕走，我同自己講要慳啲買個地方，人哋介紹我三百幾萬買觀塘二千幾呎，依家升到千幾萬，但我買嚟唔係諗住賺錢，係想畀學生聚埋研究演戲。
你都算早辦教育，現時「家燕媽媽」生意點？你諗住為呢行作育英材發揚光大？
薛：坦白講，我咁嘅方法做教育就賺唔到錢嘅，但你又諗唔到買咗個物業，個物業幫我賺錢，仲賺得快過教育，哈哈哈哈！而栽培小朋友係要從細開始，到大先學已經遲，因為香港演藝學院要中五畢業先可以考，小朋友係冇途徑去學。小朋友知道自己喺呢方面有天份，係好enjoy、好開心，除此之外，我係想推行《弟子規》，裡頭教好多做人嘅道理，依家社會唔會生得多，好多家長當小朋友如珠如寶，可能疏忽咗教導，《弟子規》對人嘅品行可以好提高，推行咗一段時間，so far效果好好。一個人點叻都好，如果人際關係做得唔好，都係有缺口，但如果你嘅人際關係好，你有少少差錯，大家都會扶你一把，以我咁多年人生經驗，我覺得呢樣嘢係值得去發揚光大。
我覺得你一句說話K.O.咗Celine爸爸(《全美一叮》摘Golden Buzzer及直入半準決賽的9歲香港小巨肺譚芷昀Celine的父親)，好犀利！
薛：我欣賞Celine嘅，佢係好有天份嘅小朋友，佢上堂好乖、學嘢好快，至於佢爸爸，佢最近都做咗應該做嘅嘢(道歉及捐款予慈善機構)，我唔再計較以前嘅嘢，最緊要佢識得點去培育Celine，等佢為我哋香港人爭光。如果佢有醒悟，可能會覺得全靠家燕姐提一提，因為佢嘅所作所為，對個女嘅影響係好大。
多謝網民畀面
網民好鍾意將你個樣萬能key，你有冇睇過？
薛：我有，因為我好多好激昂嘅表情，可以key好多嘢，都冇乜所謂啦，令人睇到開心笑，我覺得都係榮幸。
呢個階段算唔算苦盡甘來？
薛：應該OK嘅，哈哈！
係咪永不言休？
薛：今次拍完個劇，我有啲提自己，可能年紀大咗，日夜日夜咁拍好傷，我記性好好，但依家有啲嘢都記唔到，同埋依家拍嘢係高清，皮膚會乾，影出嚟驚唔靚，所以要減少啲、唔好咁密。
