蘇小小19歲訪問華麗變身 原名蘇麗華參選「學界女神」

Zoe喺一年前開始涉足私影界，當時係純粹想影吓靚相，希望等自己老左，都可以俾自己啲仔女睇吓，自己後生嗰陣係點樣，好趁青春留倩影嘛！明嘅！

好多人都覺得私影好危險，三唔識七，約出嚟單對單，加上之前都發生過啲唔係幾開心嘅事，所以model本身都應該有番啲戒心。Zoe都好清楚呢點，所以都識得保護自己，例如抗拒影任何色情，或者過份性感嘅相。一來覺得冇必要為錢去賣弄身體，二來亦都唔想令屋企人尷尬難受。

Zoe由細到大都好中意畫畫，讀中學嗰陣，佢試過有兩年起勢咁參加畫畫比賽，攞獎都攞咗十幾個，不過而家就少畫咗，因為讀 event management都真係幾忙，而且亦都好有挑戰性，所以無論讀完high-dip之後，可唔可以繼續升學都好，Zoe都想喺番呢方面發展。

Zoe當正自己爸爸係偶像，連拍拖對象，都話要搵個好似爸爸咁好嘅！佢話雖然要搵個好似爸爸咁高質嘅男朋友係唔容易，但係有公德心，同心地善良呢啲基本品德都一定要有！而且爸爸教落，識男仔唔一定要有錢有車有樓，最緊要人品好，同腳踏實地，當然仲要鍚自己啦！喺呢方面，佢一定會聽爸爸話架！