請1日假去旅行｜麥美恩戴祖儀零儀態遊韓國 Mayanne入行12年浮誇有原因

《請1日假去旅行》麥美恩撩長腿Oppa交換聯絡

Mayanne、Joey一去到首爾就撞正韓國男團Treasure由外地返韓，兩人即時化身迷妹追星。遇見長腿Oppa，Mayanne口花花撩傾偈之餘，更乘機互相Follow社交帳號，認真好艷遇！其實Mayanne同Joey都係「是非精」，都拍過《學是學非》，兩人一齊經常「依嘩鬼叫」，歎薯仔排骨湯時，Mayanne更不顧儀態，即場表演吮骨絕技！

期望再拍《兩個八婆去旅行》

Mayanne同Joey近日又為《請1日假去旅行》拍了一段「快問快答」影片，被問到對方在旅行中的小秘密，除了答大家都有「好嚴重水腫」外，Mayanne又爆Joey在小睡片刻後醒來都會大發脾氣。而趣事則是兩人去到邊都會打交，兼影響當地市容！兩人仲諗定第二季節目名，叫《兩個八婆去旅行》，地點就係去亞馬遜森林。

生日傳收戒指 竟然關節目事

Mayanne近日為慶祝36歲生日，連環出席多個慶生飯局，其中一場更有其緋聞男友許文軒（Edmond）出席，飯局上Mayanne收花又收戒指，被指同許文軒好事近，不過事後Mayanne就澄清戒指是和Joey在韓國拍節目時，用公司錢所買，花則是前經理人所送，而許文軒只送了香檳。

陷整容疑雲 全因狂食辣年糕出事

Mayanne日前亦有同一齊拍《森美旅行團》的拍檔，包括森美、吳若希和丁子朗，一齊食飯補祝Mayanne生日，森美更大讚Mayanne「瘦咗又靚咗」，懷疑她到韓國後順便整了容！Mayanne就解釋在韓國拍節目時狂食辣年糕，懷疑因此搞到味精過敏，眼皮同眼袋都腫到「連成一線」，好像剛整完容，似足「佛地魔」！

「大癲大肺」背後是「宅女」

Mayanne同森美合作多年，有指Mayanne直頭當森美係師傅，介跟足其主持風格！但其實在「大癲大肺」形象背後，Mayanne形容自己本身的性格是「宅女」，平時會坐下來沉思，但在電視上很少機會可以呈現這樣的自己。至於為什麼總是表現出「極度外向」，只因為自己缺乏安全感，唯有將自己「吱喳」一面放大。

2011年選港姐奪「梗頸四」入行

回到那些年，Mayanne回流香港後參加2011年的香港小姐競選，最終奪得第四名。當年冠軍係出爐最「最佳女配角」朱晨麗，亞軍朱希敏、季軍許亦妮。想當年Mayanne因為較豐滿的身形，被傳媒封為「龍躉村姑」！

麥美恩5個成功入屋嘅原因！

1. 自然唔造作

Mayanne份人自然唔造作，成日被人寸都好好EQ！所以好得觀眾喜愛，愈嚟愈入屋！

2. 扮醜抵得諗

為咗節目效果，Mayanne不時都會扮醜博觀眾一笑，雖然係港姐出身但都好抵得諗！

3. 講嘢搞笑唔煩膠

比起其他旅遊節目女主持，其實唔少觀眾都更鍾意Mayanne，進退得宜唔煩膠！就算不斷被森美恥笑都唔會黑面，仲笑埋一份！！！

4. 竹昇妹都可以中文好

麥美恩講過好多人問佢呢個竹昇妹點解中文咁好，原來係Mayanne公公以前日日陪佢做中文功課、幫佢默書，而Mayanne今日亦可以自豪咁對公公講，佢有做功課，喺香港發展得好好！

5. 其實都係個靚女吖！

麥美恩雖然唔算係好典型嗰種美女臉孔，身材又唔係咩「咪神」級數，但相信無人會否定佢其實都係個靚女，眼大大、笑容親切又甜美，酒窩又迷人！平時Mayanne多數係簡約打扮，唔走淑女路線，不過每逢出席大型活動都會盛裝打扮一番，又係另一種魅力！

被封「龍躉村姑」以為係指「鄰家女孩」

2015年麥美恩接受《公子會》訪問，坦言自己競選港姐時沒有太多報導，最深刻的記憶，是傳媒用「龍躉村姑」來形容她，但她當時對廣東話仍不太熟悉，因此笑言：「我以為村姑係指 Next Door Girl（鄰家女孩），幾 down to earth（貼地）、幾親切呀！」

麥美恩演技出色曾獲提名最佳女配

2020年，Mayanne首次獲提名最佳女配角，於《使徒行者3》飾演爆Seed（林峯飾）徒弟和卧底朱倩。麥美恩劇中以豹紋蕾絲裙造型出場，更要濕身，跟飾演嫖客的農夫有對手戲，笑彈百出！麥美恩僅得兩集戲份，但演技仍獲網民激讚。2021年，Mayanne更憑劇集《智能愛人》入圍「最佳女配角」最後五強。

奪「飛躍進步女藝員」

另一方面，麥美恩憑《森美旅行團》、《學是學非》等節目獲提名TVB 馬來西亞星光薈萃頒獎典禮2017「最喜愛 TVB 節目主持」，同年更勇奪萬千星輝頒獎典禮2017「飛躍進步女藝員」。

細個睇衛星新聞苦練廣東話

身為加拿大土身土長的華人，卻能說出一口流利的廣東話，而清晰的咬字和發音是擔任主持最必要的條件，她在發表得獎感言時也提及：「細細個公公陪我做中文功課，陪我默書，我又陪公公睇衛星新聞。佢喺病床上都問我，『啊妹你做咗中文功課未？』20年後我喺台上可以答我有做功課啊。」

《請1日假去旅行》麥美恩、戴祖儀遊走首爾：

《請1日假去旅行》快問快答-麥美恩&戴祖儀篇：

希望真係拍得成第二季《兩個八婆去旅行》！