45歲車婉婉拍劇湊仔兩面忙與Trouble 3仔仔大演困獸鬥

Apr 14 2020

45歲的車婉婉最近遇到一個大考驗！隨著第二波新冠肺炎疫情殺到，復課日子仍然未見盡頭，全港媽媽被迫與子女長期困獸鬥，叫晒救命！藝人媽媽仲辛苦，又要趕拍劇，又要湊住小朋友。45歲的車婉婉最近就忙拍TVB新劇《BB大晒》，還要擔心獨子Justus（暱稱BBQ）的身心健康，需要貼身照顧，更撞正最難纏的trouble 3時期，真是高齡媽媽的一個大考驗。

原文刊登：東方新地 | 圖片：東方新地、車沅沅@IG｜編輯：Sunday Kiss

車婉婉拍劇湊仔一腳踢

13年與拍拖三年的澳洲籍男友、游泳教練Jonathon在泰國結婚、17年懷孕生下兒子Justus時，車婉婉已經年屆45歲，因此一直以高齡媽媽自居，懷孕至今都樂此不疲在個人社交網絡分享湊仔日常。年初爆發疫情、全民響應防疫措施盡量少外出留家工作，不過電視劇製作冇得遙距，身為藝人身不由己，車婉婉過完年即復工投身新劇《BB大晒》拍攝工作，同時盡可能收工趕回家繼續親力親為照顧獨子。

車婉婉為三歲生日嘅囝囝BBQ在家慶祝，一家三口望鏡獨欠BBQ，車婉婉都話冇佢符，相信父母們最明白子女在trouble 3的煩惱﹗

停課不停學，雖然要兼顧拍劇，婉婉都為 BBQ精心設計每日作息，在家玩遊戲讀故事，間中又去行山行沙灘。

疫情持續最辛苦不過全球前線醫護人員，婉婉同 BBQ遊戲之餘，不忘玩玩具扮醫生，向醫護致敬。

車婉婉與Troble 3仔仔超市力鬥智鬥力

被車婉婉暱稱BBQ的Justus眨吓眼上月尾就滿三歲，眾所周知兩至三歲幼童最頑皮最難纏！日前車婉婉母子約埋友人去超市放風兼入貨，臨走想同友人道別去截架的士，都又哄又罵又拉又扯同Justus鬥智鬥力，旁人完全感受到trouble 3的驚人戰鬥力！

疫症爆發之前，向來親力親為的車婉婉帶埋兒子與友人去超市掃貨，臨走抱仔即見 BBQ扭身扭勢極力反抗。

出世時已經8磅9係巨嬰，三歲 BBQ扭起計上嚟一時傾盡全力一時又變軟皮蛇𦧲地，搞到媽媽冇晒符。

由超市內扭到出收銀、直至步出商場截到的士，精力旺盛BBQ繼續同媽媽鬥力糾纏，短短幾分鐘見識到trouble 3威力。

好彩家有好老公願意分擔，隔日又見一家三口出動，今次有高大耐心Jonathon陪玩幫手，至見婉婉有得鬆一口氣。多個月來婉婉除了趕劇都盡量減少出入人多地方，盡量陪伴BBQ玩吓益智遊戲、或者行山去海邊避開人流吸收新鮮空氣。雖然正值人生第一個反叛期，其實BBQ人仔細細都知孝順回饋，日前去公園放風地下執起小黃花一束贈母，感嘆好耐未收花的車婉婉所有辛苦一掃而空、即時冧晒！