軒公敲碗︱張敬軒幫Lucy化妝難忍笑 歎完加料早餐終獲歡心與MC看齊
張敬軒開拓小朋友市場
今次張敬軒請來李璨琛愛女Lucy李元元做嘉賓,認真落重本,先借出私家大宅做拍攝場地,仲為「Lucy一日託兒服務」設計多項活動,包括化妝、襯衫、由Lucy親自為張敬軒主理早餐、Bedtime Story同吹氣球。主人家張敬軒為盡快同Lucy混熟,開通小朋友市場,所以由女孩子至愛的扮靚開始。
![張敬軒 李璨琛老婆Pae把女兒Lucy帶去張敬軒大宅,估唔到Lucy咁順攤肯跟軒公走。](https://imgs.orientalsunday.hk/wp-content/uploads/2023/03/1254059b-5202-42b6-a6b9-74abc29cb74d_1157446997641188700596f-1024x645.jpg)
張敬軒明玩Lucy 化妝師上身塗綠色眼影
雖然Lucy表示自備了指甲油同眼影,但都畀面嘗試用張敬軒預備的玩具化妝套裝,點知張敬軒化妝師上身,先用Lucy自備粉紫色眼影,不過顏色就唔係好覺眼,最後Lucy揀了綠色閃閃眼影,一望塗上綠色眼影的Lucy,張敬軒忍唔住笑話:「我擔心你阿媽以為我虐待你。」隨後又大膽話不如再塗多一層藍色眼影,塗完後一望鏡,呢個「偽化妝師」再次忍唔住大笑,仲問Lucy喜唔喜歡呢個色的眼影,一臉天然呆的Lucy細細聲講:「都鍾意。」場面十分搞笑中亦帶點溫馨。
![張敬軒 一望塗上綠色眼影嘅Lucy,張敬軒忍唔住笑到震話:「我擔心你阿媽以為我虐待你。」Lucy卻一臉無奈。](https://imgs.orientalsunday.hk/wp-content/uploads/2023/03/3_168030281564118a033d60a-1024x563.jpg)
軒公大讚5歲Lucy成熟有手尾
去到襯衫環節,知道Lucy鍾意公主打扮,張敬軒事前準備了多條公主裙,見到Lucy揀裙時就大讚,「佢係好知道自己想要啲乜嘢,我覺得佢都幾成熟,同埋好有手尾,佢係自己會執番整齊啲嘢,呢啲真係好少見呀依家啲小朋友。」雖然星二代Lucy剛好滿5歲,但在影片中完全睇唔到有恃寵生嬌的壞習慣,反而好有禮貌又淡定。張敬軒與Lucy的互動甚有化學作用,之後張敬軒仲奶爸上身大睡前故事,不過Lucy就唔多領情,只顧坐住膠鹿仔周圍彈。
![張敬軒 Lucy話要將益力多撈入早餐,擺明靠害喎!](https://imgs.orientalsunday.hk/wp-content/uploads/2023/03/5_171087334964118aa5639d8.jpg)
軒公歎完「加料早餐」再食 「檸檬」
Lucy於整早餐環節入面,好興奮咁將橡皮糖、薯片、粟米、蛋撈埋,仲「加料」整多支益力多同茄汁豆,睇到眼突的張敬軒即時搖頭笑言:「我同早餐都係冇乜緣分,食完肚屙都似!」佢仲問Lucy:「你知唔知我陣間要食咗佢?」Lucy點頭話:「特登!」張敬軒登時笑爆咀,反邀請Lucy一齊食,點知Lucy反應超快一口拒絕:「唔使!」之後張敬軒諗住使出「殺手鐧」唱歌仔冧女,Lucy竟然當眾派檸檬話:「唔使喇!」難怪一眾網民留言表示:「軒公遇上對手了! Lucy完全無面俾。」、「應該無乜人係咁派檸檬俾軒公,好好笑。」最後張敬軒仲問Lucy鐘意MC張天賦(Lucy頭號偶像)多啲定自己,Lucy答:「兩個都鍾意!」氹得軒公心花露放。
42年首次與父母出遊
張敬軒將於本月16號一連3日在英國倫敦舉行演唱會,日前他帶埋父母同行,仲自爆42年第一次一家三口去旅行,去到景點白金漢宮前留影,張媽媽還在公園同小朋友踢波,張敬軒笑媽媽已加入「耆」英超級足球聯賽。因為行動不便坐住電動輪椅的張爸爸,期間唔小心轆到張敬軒隻腳,兩父子幽默對答非常搞笑,張敬軒話:「影完呢張相阿老爺因為張椅係電動,所以連人帶椅碌過我隻腳,我嗌痛然後佢問我咩事,跟住我話你碌親我。然後佢話佢feel唔到,我話唔緊要,我都feel唔到自己仲有隻腳。」張敬軒與父母出行期間發生咁多趣事,網民提議應該拍片紀錄,點擊率應該又會衝上熱搜。