54歲郭富城留港享受家庭樂湊愛女搞手無影演唱會急煞停損失千萬

Jun 17 2020

54歲的郭富城（Aaron）16年在紅館舉行的15場《舞林密碼演唱會》贏盡口碑，18年與內地製作公司合作舉行一百場世界巡唱，不過演唱會在內地至今僅開了十二場，據知去年《娛人製造》老闆遠飛美國，長期冇影令之前在國內傾好合作的多個演唱會Project 全部煞停，當中郭富城牽連最大。由於內地巡迴受阻，郭富城亦好無奈，近日留港享受家庭樂，陪太太方媛湊2個愛女3歲大囡Chantelle及1歲細囡Charlotte。

原文刊於：東方新地

郭富城巡唱內地搞手無影

郭富城近年在電影和演唱會上都大放異彩，電影接唔停，16年他在紅館舉行的15場《舞林密碼演唱會》，以三千萬打造智能舞台，加上其賣力演出贏盡口碑，令唔少內地及海外製作邀請城城開騷，但當時因城城緊接要拍三部電影，世界巡唱被迫暫緩至18年舉行。直至18年4月，城城與他的製作團隊飛北京為巡唱舉行啟動禮，躊躇滿志的他宣布將舉行一百場世界巡唱，計劃打破自己的個人紀錄，演唱會交由內地一間製作公司《娛人製造》主辦。不過演唱會在內地至今僅開了十二場，據知去年《娛人製造》老闆遠飛美國，長期冇影令之前在國內傾好合作的多個演唱會Project 全部煞停，當中天王郭富城牽連最大。

打亂香港演唱會計劃

據知情者透露：「城城呢幾年開嘅演唱會，都不斷挑戰難度，加上舞台設計震撼又機關重重，口碑好令佢喺內地有一定叫座力，《娛人》搞手成功傾到城城內地巡唱整個製作權，同小美傾好會幫城城舉行一百場世界巡唱，單喺內地都話有幾十場咁多，話做完一百場再返香港開，作為一個總結，不過呢兩年嚟就只喺內地開咗十二場巡唱，上年《娛人》老闆仲突然飛咗去美國，佢話要喺美國搞大壇嘢，唔得閒返內地搞show，好多演唱會project都hold住，《娛人》喺內地幾個月都冇經營，唔少同《娛人》合作嘅公司都聯絡唔到《娛人》搞手，畀佢一路拖數，不過，雖然郭富城演唱會被煞停，但因為合約簽咗會做一百場，如果開唔夠數，《娛人》都要賠錢畀城城，聽聞拖住城城嘅金額有成千萬！」由於內地巡迴受阻，香港演唱會都受影響，城城亦好無奈！而本刊聯絡郭富城經理人小美，直至截稿仍未回覆。