郭鋒難捨愛妻歐陽珮珊離世大受打擊 堅持做2事憶亡妻！

郭鋒自揭手機背面放亡妻照原因

郭鋒的手機背面一直放着太太的相片，全因對方是其「定海神針」。他自言個性火爆衝動，相反太太冷靜理性，二人一凹一凸互補不足：「我見到張相就會個心舒服好多同時警剔自己做每一樣嘢都要小心 ，因為我幾百厭，成日都做得『過晒龍』，以前太太喺度嘅時候好多時都會話我，『你做咩啫 ？』、『你咁急做咩？」 總之要坐定慢慢諗，辦法總比問題多，所以依家佢唔喺度，要識得提點自己。」

郭鋒坦言失去太太後「世界變曬灰色」

郭鋒與亡妻歐陽珮珊因拍劇認識，並在劇集《無語問蒼天》一劇定情，隨後在1977年拉埋天窗。兩夫妻多年來鶼鰈情深，同甘共苦，走過40年婚姻路，奈何2017年歐陽珮珊因病離世，令鋒哥傷心欲絕，更因而淡出幕前。回想當時突然失去一生中最重要的人，鋒哥直言整個世界也變成灰色，做任何事也再沒有意思：

「我前面嘅畫面係做咩都一樣， 直情覺得咩都無所謂， 嗰種無所謂係想快啲同太太再見，所以嗰時要我出番嚟工作絕對冇可能 ，你叫我歡笑係笑得到 ，但唔係個戲嘅角色，而有時劇情可能仲會觸發我某啲唔好嘅情緒 ，變咗自己唔受控或者整個人沉咗落去，只會影響大家。」

郭鋒2017年悲慟送別愛妻

2017年，前無綫花旦、演員郭鋒妻子歐陽珮珊因為肺腺癌不幸逝世，終年63歲。家人為其於九龍殯儀館出殯，喪禮以基督教儀式進行，一大清早，郭鋒便在退繼子及其他親友陪同下到靈堂打點，靈堂正中、遺照之下，放著郭鋒為愛妻準備的黃色心形玫瑰花牌，上款寫著歐陽珮珊原名「陳潔英」，下款「郭民富」則正是郭鋒本名。

第一期藝員訓練班同學現身 送別歐陽珮珊

儀式開始後，包括第一期藝員訓練班同學、於七、八十年代和歐陽珮珊合作過嘅者一輩藝人，以及當年喺無綫同郭鋒合作過嘅後辈藝人陸續抵達向歐陽珮珊致以最後敬意，當中包括汪明茎、劉松仁、黃浩然、苗僑偉夫婦、林建明、秦沛、姜大衛、鮑起靜、劉江、甘國亮、駱應釣等。四十年夫妻生涯一直相敬如賓、互相扶持，痛失愛妻嘅郭鋒喺靈堂悲從中來，不斷拭淚，每逢有賓客到場鞠躬後，都會上前安慰。踏上靈車，只見郭鋒情深輕撫照片，身軀不斷顛抖、淚如泉湧，悲傷和不捨之情令在場人士無不動容。

郭鋒堅持做2事憶亡妻

時間流逝，現時鋒哥在傷痛慢慢走出來，感謝其身邊的朋友陪伴左右，不令他胡思亂想：

「 當自己一個靜落嚟唔諗係冇可能， 初時自己一個人都好沉重，依家因為時間耐咗會開懷咗。」

即使太太不再在身邊，鋒哥依然記掛對方，不但每星期也會到墳場探望，每天回到家仍然會與對方「聊天」，「『老婆我返嚟喇 』、『老婆我依家出去喇 』， 有啲人可能會覺得好傻，甚至係咪精神失常呀？ 我話唔係，呢個對我係一個習慣，好似刷牙洗面一樣，只不過喺生活入面做番比較接近以前嘅事。」

郭鋒對亡妻有1遺憾

與太太攜手走過人生不同階段，鋒哥回望過去自揭對太太有遺憾，有一件事至今仍令其耿耿於懷：「呢件事已經係80年代嘅事，嗰時我參加咗賽車比賽，我冇同太太講，後尾出賽佢先知，當時佢係唔開心，點解依家先話佢知。後尾佢身邊嘅同事朋友同我講，『你去咗比賽時佢要開工拍嘢，佢坐喺化妝間個樣揦埋口面，原來好擔心我嘅安全。』那刻我聽到心好酸，真係對唔住老婆，同埋我喺度嘅時候佢完全冇展露唔開心嘅情緒，咁先攞命 。」

作為教徒的鋒哥在2019年遠赴以色列、約旦等地朝聖，更在當地加納婚宴堂與亡妻再立婚約，在眾人的見證下許下承諾，愛太太一生一世，即使對方已離開人世，對其的愛依然永相隨，「她永遠是我偶像，改變我一生嘅人。」