鄧兆尊G奶新歡現身養和傳大肚 兆尊斬釘截鐵回應
撰文、圖片：東方新地、節目截圖
鄧兆尊冷落兩房獨愛G奶新歡
被封「現代韋小寶」的鄧兆尊曾揚言對女友們絕不偏私，不過自從新三奶陳小姐出現後，形勢完全改變，時間分配亦錯晒。為獨霸兆尊無所不用其極，恃住有G奶肉感身材，令兆尊神魂顛倒，熱戀期的激情挑起無限慾火，搞到兆尊將正印Carmen與二奶Cherry（車厘子）打入冷宮，幾乎日日都係G奶日。
鄧兆尊同新歡現身養和醫院
日前有報導指有人目睹鄧兆尊同一身材豐滿、足踝有紋身的女子在養和醫院出現，兆尊傍實女伴並細心為對方拎手袋，全程貼身呵護，即惹來大肚疑雲，其後兆尊回應傳媒直認該女子是新歡陳小姐，但就否認新歡大肚，透露對方整親手，故陪伴到醫院看病，並非大肚，更斬釘截鐵話：「唔會畀意外發生﹗」兆尊一直持不婚不生態度，更指弟妹已有下一代，自己沒有傳宗接代的壓力。不過凡事都有例外，好似兆尊以前話向三個紅顏都一視同仁，慣了四人行活動，不過自從新三奶陳小姐的出現，已一再打破兆尊多年「家規」，真係有意外都唔意外呀﹗
鄧兆尊春情大爆發
同新歡打得火熱的鄧兆尊，早前更衝出灣仔，陪住新三奶勇闖南灣與陽光玩遊戲，面對進擊的L小姐姣騰騰掃髀罅，兆尊根本無力招架，之前話過與女友不會公開親熱的他，情不自禁破晒戒拖晒手又錫膊頭。為博新三奶一笑冷落其餘兩C，兆尊仲話冇大細超？
歎慣的兆尊最抗拒戶外活動，今次肯紆尊降貴陪女友享受日光浴實屬難得，身穿T恤短褲的他為配合L小姐，碌完沙灘纏綿完，又陪她行去海邊影相，不過影咗幾張相兆尊就提議離開，令L小姐扁晒嘴。以前兆尊與女友行街都是保持距離，絕少被影過拖手或有其他親熱行為，他曾說為公平起見不會與任何一位女友有公開的親密行為，所以今次他與L小姐的互動絕對是前所未有，拖手與攬攬錫錫全部做齊，而且睇得出兆尊樂在其中。能令兆尊破晒戒，國產L小姐果然威力無窮，看來即使正印Carmen與二奶車厘子聯手對抗，都未必係佢對手。
