鄧麗欣談及與傅穎被杯葛！2015年訪問片翻hit 7字形容雙方真實關係

鄧麗欣10年前回應與傅穎真實關係片翻hit

鄧麗欣2015年12月接受鄭紹康於《東方新地》訪問時，就被問到是否曾與傅穎被Cookies杯葛：「你同傅穎暗指被其他Cookies成員杯葛，有冇咁嘅事？」不過鄧麗欣對此就表示「冇！」，兼透露2人嘅真實關係：「曾經係最好嘅朋友，其實好多嘢都係新聞或者大家渲染到成件事好似好複雜，其實唔係咁複雜，亦都唔想講到小學生咁邊個杯葛邊個，根本冇呢啲咁嘅事，我唔排除佢可能曾經有啲誤會，但咁多年咩誤會都化解、唔記得啦！只不過大家做唔成朋友，就係咁！」

大爆與方力申拍足10年拖「唔結婚」主因

除咗在訪問中談及與傅穎嘅真實關係外，鄧麗欣更被問到與方力申拍拖10年，係唔係已經認定對方係結婚對象一事。鄧麗欣就大爆自己與方力申從來冇傾過結婚打算：「講都冇人信，真係從來冇傾過」以及：「好多人都催我哋結婚，我自己嘅諗法係順其自然，咁耐反而已經過咗衝動嘅時候，拍拖兩、三年嗰陣有衝動，但我哋已經過咗幾次兩、三年，依家變咗實際啲，同諗啲大因素啲嘅嘢，而且正正因為咁多人催，壓力大咗，可能都會影響咗個考慮。」不過Stephy亦直言唔介意閃婚，但係「結婚都係兩個人嘅事」，自己亦無法單方面做決定。而在採訪後一年，2016年3月，方力申與鄧麗欣發出「聯合聲明」宣布分手，戀情告一段落。

鄭紹康訪問鄧麗欣 【星惜天下】2015-12-17

本周嘉賓是鄧麗欣（Stephy），她大嘆跟方力申未公開戀情前地下情的苦處，又呻爆小方唔浪漫及聲言拍拖十年已過了想結婚的時間，指現時沒結婚衝動。

鄧麗欣：唱歌平常心

鄭：鄭紹康 鄧：鄧麗欣

鄭：所拍電影作品多數係愛情小品，怕唔怕被定型？

鄧：我冇驚，某程度上俾人定型其實係一個icon，做到icon其實唔係一件簡單嘅事，亦都係需要累積，所以我覺得反而係positive，而唔係negative。

鄭：期唔期望拍億元大製作？

鄧：期望，邊個演員唔期望，但唔係好執着要達到，拍吓愛情小品都好吖，又唔使咁大壓力。亦可能自由度又大好多，所以冇乜強求。

鄭：Paco話過電影上沿用捧鄭秀文同楊千嬅嘅方式捧薛凱琪，你哋同一間公司，擔心資源會被分薄？

鄧：資源嘅嘢其實我從來都冇諗過，我計數好差，唔知資源幾多等如幾多，或者俾咗幾多我，我淨係覺得，我依家做緊嘅嘢都係我想做同做得開心，而且都滿足，我覺得已經夠。

鄭紹康：你簽過國內經理人喺國內發展，咩驅使你回歸香港？

鄧：好多人用回歸形容，其實我簽咗內地經理人兩年，兩年其實好短，但可能香港人嘅節奏實在太快，走咗一陣覺得唔見咗、太多新嘢湧現，但喺我角度我覺得嗰兩年有少少似去深造，同香港環境、做嘢模式好唔同，係見識，同埋除咗做嘢之外，喺我個人嚟講係沉澱，因為香港實在太多嘢、身邊太多人圍住，好難有時間諗將來嘅嘢、自己嘅人生，嗰兩年我做到。

鄭：喺國內搵錢多啲？

鄧：國內當然搵錢多啲啦，搵錢同機會都係內地多啲，好多人問我咁點解要返嚟香港？某程度上都係情意結，自己係土生土長香港人，唱廣東歌大、拍香港電影大，覺得呢種情懷我係要攞番，而且亦都唔想遺忘咗呢個自己嘅地方，我覺得香港做基地啫，發展空間都可以好大，我可以返內地或者其他地方。

鄭：唱歌方面你有冇野心？

鄧：唱歌我非常平常心，呢兩年返番嚟唱歌好輕鬆，因為個心態唔同咗，首先唔同嘅係market唔同咗，以前一定要出碟，一年起碼出兩隻，每隻碟要十首歌、拍幾多個MV，好模式化，變咗好大壓力，變相未必做到自己鍾意嘅音樂，依家就唔同，喺冇乜壓力之下，每一首歌可能都係自己鍾意，亦都可以好用心諗個MV點拍，反而嗰首歌仲長久，大家仲記得、仲鍾意。同埋好坦白講，我會行電影比較多啲，音樂只不過係點綴。

鄭：點解會組排球隊？係咪好多商機？

鄧：商機梗係冇啦，依家暫時只係揼錢出嚟，做其實因為鍾意，如果唔係自己對呢個運動咁熱愛，係好難堅持，由組隊、搵隊員以至搞活動推廣，都係由零開始，因為喺香港排球唔係咁多人關注，所以要做係要花好大力量，我好多身份，又係球員、又係俾錢、宣傳嗰個，所有嘢都係自己做，係辛苦嘅，仲堅持係因為鍾意。

少見方力申呻冇安全感

鄭：你同方力申係拍《獨家試愛》撻着，係邊個做主動同點樣撻着？

鄧：拍緊嗰陣都未係拍拖嘅，其實我哋係拍完套戲之後，做宣傳訪問嗰時，因為我哋呢行好多時做完嘢就走，好少話會有好多交流或者傾偈嘅機會，最多了解對方嘅機會係訪問當中，互相講吓自己睇法，嗰啲moment互相了解咗，覺得原來都OK㗎喎，嗰吓click咗！

鄭：未公開拍拖前，出街咪好唔方便？

鄧：嗰時真係驚啲，十年前冇依家咁開明，藝人拍拖一定要收埋，我哋嗰時仲要係新人，更加唔夠膽公開，唔知會有咩後果，所以都幾避忌，根本冇晒拍拖嘅時間，香港更加唔會出街、睇戲、出街食飯，就算食飯都同一大班人、一大班同事，睇戲都係成棚人，我哋第一次兩個人睇戲係拍拖五、六年之後，諗番轉頭好似冇拍拖咁，冇正常拍拖嗰種生活，有冇唔開心？都有，女仔始終都想光明正大拍拖，譬如坐車唔可以坐車頭，要匿埋喺後面，覺得都辛苦，但後尾都習慣咗。

鄭：拍咗咁耐，有冇試過低潮期？

鄧：七年嘅時候其實自己好擔心，因為太多分手、離婚例子，反而七年嗰時冇事，係前前後後有啲問題，但又未至於係好大件事，我記得喺內地發展嘅時候，大家喺唔同城市，有段時間好少見，佢又喺第二度，少見自不然疏落咗，冇乜安全感，好多拗撬。

鄭：有冇發生過好似戲入面，鬧交有好難聽說話或者偷睇對方電話？

鄧：偷睇電話一定唔會，呢個係我哋兩個嘅界線，點都好，應該尊重唔應該睇，所以暫時未試過，鬧交嘅時候難聽說話都有，因為真係控制唔到，好多我都好記得，因為我都好記仇，都幾唔開心，有時間唔中攞番出嚟講笑，但我覺得真係唔好太多，因為真係好hurt！

鄭：你呻過小方唔留意你，連你轉咗髮型、着咩衫都唔知，佢依家有冇改善？

鄧：冇！佢成日話自己好細心，但我覺得唔係，或者佢唔係好介意呢啲嘢，因為佢成日對住個電話，朋友搵佢、又睇facebook，可能咁就留意唔到身邊嘅嘢，連我都留意唔到。

鄭：點唔浪漫都應該有過感動到你嘅時刻㗎！

鄧：佢比較實際，試過一次surprise，明明喺內地做緊嘢，我生日，佢surprise我返咗嚟，唯一就係記得呢次！哈哈！

Stephy直認同傅穎做唔成朋友

鄭：佢咁fit，有冇催谷你運動、keep fit？

鄧：我都好fit㗎！我都係鍾意運動嘅人，唔係唔運動嗰種女仔，我哋都會成日一齊做運動，但有時佢會迫我做佢嗰啲運動，即係sit up、push up好勁嗰啲，試過跟，但真係跟唔到。

鄭：你係食素同海鮮？

鄧：依家白肉都食。

鄭：小方呢？

鄧：佢係掃食。

鄭：一齊食飯會唔會好麻煩？

鄧：我初初同佢一齊，我真係食素，連白肉都唔食，嗰時佢好頭痛同我食飯食咩，成日都要就我，覺得好麻煩，同佢一齊冇幾耐開始食番白肉，咁就好好多，因為佢真係乜都鍾意食，又鍾意鋸扒，我又完全唔食，我覺得對佢嚟講都係一個問題，佢會覺得冇咗個樂趣，even到依家佢都成日叫我：「食少少吖！」

鄭：財政方面係咪獨立？佢都買好多名畫，又玩電單車，驚唔驚佢太多花費？

鄧：唔關我事，依家呢個moment真係獨立，even就算結咗婚都未必一定要共用財產，未諗到呢樣嘢。

鄭：有冇傾過幾時結婚？

鄧：講都冇人信，真係從來冇傾過。

鄭：你同小方拍拖都十年，認定係結婚對象？

鄧：好多人都催我哋結婚，我自己嘅諗法係順其自然，咁耐反而已經過咗衝動嘅時候，拍拖兩、三年嗰陣有衝動，但我哋已經過咗幾次兩、三年，依家變咗實際啲，同諗啲大因素啲嘅嘢，而且正正因為咁多人催，壓力大咗，可能都會影響咗個考慮。

鄭：會唔會閃婚？

鄧：我性格唔介意，我係嗰種乜都唔驚，但結婚都係兩個人嘅事，我話閃啫！

鄭：過咗三字頭有冇諗係時候生BB？

鄧：好似好多規限，但我覺得都唔一定啫！

鄭：傅穎暗指被其他Cookies成員杯葛，有冇咁嘅事？

鄧：冇！

鄭：你同佢OK？

鄧：曾經係最好嘅朋友。我一直都話朋友同男、女朋友，抑或所有人都係緣分，既然冇咗呢個緣分無謂強求，其實好多嘢都係新聞或者大家渲染到成件事好似好複雜，其實唔係咁複雜，亦都唔想講到小學生咁邊個杯葛邊個，根本冇呢啲咁嘅事，我唔排除佢可能曾經有啲誤會，但咁多年咩誤會都化解、唔記得啦！只不過大家做唔成朋友，就係咁！

採訪後記：自我保護能力

Cookies絕對代表了一個年代，相信鄧麗欣也會感覺到時光飛逝，不經不覺已出道十五年了。或許是Paco教導有方，Stephy的自我保護能力非常高，一句「我沒有看網上的評論」已經杜絕了我下一題打算發問有關網民對她唱功輿論和評價的感受。自己也很喜歡〈好心好報〉這首卡拉OK合唱歌曲，希望Stephy和小方都繼續努力，拍多些代表作，唱多一些琅琅上口的流行時代曲。