直擊鄭中基鬧市陪玩做阿四 暖男爸爸拒接親子真人騷賺人仔
撰文、圖片：東方新地
鄭中基化做暖男深閨戒夜蒲
自從娶咗前娛樂主播賢內助余思敏（Sammie），鄭中基人生從此不一樣，昔日「無賴」已被老婆轉化成為暖男，顧家好男人形象近年更深入民心，令鄭中基愈來愈受歡迎，近日為ViuTV拍攝的新劇《暖男爸爸》熱播，令他人氣攀升。
而真實版暖男爸爸更同角色一樣吸引，現時已經是一對仔女父親的他，一切家庭至上，更將一對仔女放第一位，為仔女改變自己的生活常規，曾經無酒不歡的他試過在機上醉酒鬧事，近年原來已成功戒酒，動力正正來自女兒Emma（鄭梓喬）。據知情者透露：「做咗爸爸之後， Ronald成個人唔同晒，以前佢係夜鬼，唔到天光都唔瞓，拍戲會叫導演開夜班，等佢瞓夠先開工，依家拍嘢佢會叫導演開早，就係為咗要快啲拍完返屋企陪仔女，唔單止好深閨戒埋夜蒲，仲連酒都戒埋，因為佢試過喺慶功宴飲醉咗，唔單止成個人失晒控，仲醉到撻落地嚇親囡囡，佢真係好心痛，之後就決心戒酒，有時想約佢出去飲兩杯，佢都耍手擰頭！」
不為高酬勞所動鬧市陪玩做阿四
同老婆余思敏結婚九年恩愛有增無減，大女Emma今年已經九歲，細仔鄭梓仁（Evan）今年亦五歲，鄭中基除為家人改變，更加為一對仔女築起保護牆，照顧得無微不至！近年內地親子真人騷大行其道，他亦不為高酬勞所動。據知情者透露：「內地電視平台咁多，親子騷需求量好大， Ronald又點會冇人搵過，不過講明冇興趣，佢話大人要捱眼瞓開工都好難頂啦！何況係細路仔，如果收得人錢，好多嘢都唔係自己控制之內，佢冇理由要仔女為賺錢捱苦！咁佢又講得好有道理喎！」
鄭中基全程傍實囡囡Emma掟公仔，暖男爸爸不時緊張教路。近日在ViuTV新劇演暖男爸爸入型入格的鄭中基，現實中就是如假包換的暖男爸爸，婚後完全被賢妻余思敏馴服，顧家好男人已經成他最新標記，除咗錫老婆， Ronald（鄭中基）更視一對仔女如珠如寶，表明心跡唔會為賺人仔接拍內地親子真人騷，要讓仔女在最舒適健康環境下成長。早前這位暖男爸爸便貼地落區出動，陪寶貝女到冒險樂園玩，樂園內更真情流露，同老婆牽住手湊女，又好有耐性陪囡囡玩掟公仔，真實版暖男爸爸超級有魅力！
囡囡玩得非常投入，玩了不久便中獎，攞到個中型公仔獎品。
早前疫情未嚴峻，他便陪妻女出巡到銅鑼灣鬧市行街，期間又陪囡囡到「冒
險樂園」玩過盡興，只見他慈父上身，體貼幫囡囡孭住背囊，等妻女可以玩得更盡情，一時又蹲低身陪囡囡夾公仔，總之乜都女兒至上，大男人完全被妻女融化，廿四孝爸爸攞足一百分！
