鄭伊健兩度謝絕埋堆「大灣仔」 原班人馬開戲《熱血燃燒》唔預「陳浩南」
鄭伊健2020後少有北上 復工赴台灣見Fans
之前報導過鄭伊健近日低調到台灣開工，2020年後的鄭伊健選擇飛台灣拍台劇開演唱會，都未有北上，另一邊廂 「古惑仔」班底陳小春、謝天華、林曉峰主持《大灣仔的夜》，組成的「大灣區哥哥」在內地知名度大增。昔日「古惑仔」北上搵食，人仔賺到豬籠入水，唯獨「浩南」鄭伊健未有加入當中，疫情期間更樂於同太太蒙嘉慧享受生活，近日才秘密復工！
「兄弟班」唔行古惑再召集 鄭伊健缺席
至於陳小春、謝天華、林曉峰「古惑仔」班底就開拍了新戲《熱血燃燒》，電影由已故的錢國偉執導（編按：錢國偉 2020 年 10 月 27 日離世），是一部動作警匪電影，故事講述一班緝毒隊隊員，因一次失敗行動而分道揚鑣，後來緝破跨國毒梟，兄弟重聚並肩作戰，展示熱血兄弟情，已定於6月上映，可「古惑仔」班底中仍未見鄭伊健參與，唔少觀眾大嘆可惜。
鄭伊健多度推job
「古惑仔」班底陳小春、謝天華、林曉峰近年積極北上發展，拍完內地真人騷《披荊斬棘的哥哥》後，再以「大灣區哥哥」之名主持《大灣仔的夜》，內地知名度大增！而有傳「古惑仔」主角陳浩南鄭伊健以疫情為由多次推job！不過後來卻低調接拍台灣導演蘇文聖的懸疑推理劇《百萬人的推理》。
網民：戲裡戲外都係最醒嗰個
雖然「大灣仔」在內地人氣高企，但唔少網民唔睇好他們的新戲，指他們靠「食老本」欠新意，反而力撐鄭伊健推內地job：「角色原全冇變過」「已經感覺票房死梗」「成班老土怪又喺到呃飯食？」「伊健清泉」「伊健真男人 同老婆享受生活」「真係高下立見」「戲裡戲外伊麵都係最醒嗰個」「伊健：唔好阻住我打elden ring」「不枉我一直只撐EKIN」。
鄭伊健推Job有理
有報道指鄭伊健未有接拍內拍「古惑仔」有份的真人騷等多項工作，是因為疫情期間，他不願長時間留在內地拍攝，與家人分隔太久，雖然因疫情不能飛到他的第二個家日本，但鄭伊健選擇在港享受家庭生活，最重要是鄭伊健有雄厚經濟支持，多年來搵落唔少，在港及日本都有投資物業，所以工作從來都是自己喜歡才去接！今次赴台灣接拍「華燈班底」導演蘇文聖的懸疑推理劇《百萬人的推理》，不少人都認為鄭伊健是搵錢買花戴，只做自己喜歡的工作。
