52歲鄭伊健夫妻共築愛巢嘆世界 豪擲千萬 元朗建愛妻別墅

原文刊於：東方新地

鄭伊健花近千萬買元朗地皮

鄭伊健與蒙嘉慧拍拖七年結婚七年，過了兩個七年之癢反而愈愛愈恩愛，二人有共識不生育，享受二人世界想做就去做，愛錫老婆的伊健言行合一，對Yoyo寵愛有加，婚後他將公司「EK Plus Limited 」加入Yoyo名字擔任董事，多年來連環送車之餘，更一擲千萬買入元朗地皮，有指本來是想起村屋送給岳父安享晚年，知情者說：「雖然Yoyo嘅童年好坎坷，父母離婚後佢捱過好多苦，但伊健依然覺得以孝為先，佢送地畀Yoyo任佢點用，初時係計劃用塊地皮起村屋畀岳父住，等岳父佢可以安享晚年，不過Yoyo爸爸年事已高，如果住元朗好似唔太方便，所以Yoyo最後決定起一幢別墅，用嚟度吓假招呼朋友都好吖！」

愛妻別墅有山有水好環境

本刊記者日前走訪伊健贈愛妻位於元朗白泥的地皮，發現本來的爛地已發展成一幢樓高三層的別墅，大閘重門深鎖私隱度高，屋前方望山景，屋後是一個湖，環境非常清靜，現場所見，別墅設計得非常有型格，有別於一般的新界村屋，天台有間屋仔，疑似是桑拿房，而屋前的大空地就最適合伊健與Yoyo招呼大班朋友前來BBQ。

疫情下鄭伊健蒙嘉慧夫妻同心

近月受疫情影響，坐唔定的Yoyo公開表示會網購大量健身及拉筋工具，與老公鄭伊健在家慢慢研究，此外她亦會親自下廚，諗定一日三餐食乜好。日前Yoyo現身九龍城街市，化身師奶廚神揀新鮮蔬果，之後再去佐敦接健完身的伊健，一齊返屋企過二人世界。唔生小朋友自由自在的伊健與Yoyo，一樣可以好開心，繼發哥發嫂、劉青雲與郭藹明之後，又一對無範恩愛夫妻。