Do姐罕有大讚中環名店售貨員！ 聽眾分享買名牌心得 回應4大服務業禁忌

Do姐心血來潮 即興走訪逾億裝修Gucci新店

節目中，Do姐表示經朋友介紹她到訪位於中環、近月裝修完畢重開的「意大利名店」，雖然她沒有說出口，但好明顯就係講緊Gucci，因為聽朋友介紹新旗艦店耗資逾億元裝修，店面裝潢都由意大利直送，所以心血來潮，某個閒日「突擊檢查」想來一開眼界⋯⋯

買鞋遇上優質售貨員

除了「隨便逛逛」，Do姐亦打算睇睇自己喜歡的Loafers鞋款，點知一入到去款式又唔係好多，有啲失望：「佢（售貨員）就話唔緊要，可以訂，即刻就畀我睇嗰啲皮，同埋嗰啲皮，有金扣有銀扣，佢話：『你著重37.5碼吖嘛？』呢啲就係好嘅Sales喇！」Do姐稱自己並非經常幫襯，與該位名店售貨員亦只見過幾面，曾款待過自己，但由於對方記得自己的鞋碼，所以笑言原本唔打算買，都會睇睇啲皮：「經驗老到，係成功嘅Sales！」

網友分享名店到訪心得！

能夠令Do姐滿意，的確很不容易。又要學歷高、英文流利、話頭醒尾⋯對於Do姐的遭遇，引出不少迴響！有聽眾表示Do姐是名人，獲厚待是可以理解，但原來留言區亦有不少聽眾「現身說法」，分享自己到名店的遭遇，甚至逐個品牌作出評價：

【買童裝都讚】「我唔係大客仔，係Gucci 買過幾次童裝，個sales每次見到都識叫我地 ”X生X太你好!” 個CS的確係幾impressive 值得讚！」

【標籤免尷尬】「其實有啲鋪頭一入去放咗兩個標籤俾客人揀貼係個身上面。 一種係話俾sales聽我唔需服務齋睇， 一種係我需要你俾意見介紹。 咁就可以免卻無謂嘅尷尬，內向嘅顧客可以唔怕被人煩住被迫走，想要被招待嘅卻被忽略嘅公司人力資源錯配。」

【海港城服務好】「我之前同老公去海港城Polo買嘢！越買越多都係因為個sales service 好！我哋重寫信讃佢！可惜佢最近冇做！所以我哋都冇去買嘢了！」

【招呼周到】「我好幾年前由澳洲返香港度假，著得極之casual地行入LV買嘢，難得sales比我感覺好舒服，唔pushy，但又招呼周到」

【再讚Gucci】「同意，我都覺得 Gucci 售貨員係好好！有心機介紹，唔會push, 如果你問到，佢會比意見，態度親切，就算買個幾仟蚊wallet 仔, 都好好招呼，仲開支Sparkling water 畀你！ 10/10滿分！」

【名店逐間數】「而LV 售貨員都十分專業，但售貨員較Cool，冇乜親切感。Goyard 亦十分友善，專業，有耐性講解。水貨舖，一般冇乜服務，你要乜，佢就順勢講你鐘意聽嘅sell你。Hermes 太貴，唔啱budget 未買過，no comment。」

《口水多過浪花》Do姐歸納4大服務業禁忌

Do姐讚完名店售貨員之後，她與幾位主持人例如余迪偉以及余德丞等就開始探討「反面教材」，主要可以歸納為以下四點。

1）吊靴鬼咁跟到實

第一個弊病，相信大部分人都會有經驗，就係一入鋪頭，就有一位售貨員由頭跟到尾，不停向你介紹，幾乎拎起每一件貨品都要講解或推銷，Do姐表示：「我就係唔鍾意，一入到去就跟喺後面，我鍾意好優閒！」余迪偉再補充：「佢哋會話『埋鏡拼拼啦』，一定係懶音，『啱可以試喎』！」

2）用明星做賣點

另一方面，幾位主持又表示有不少售貨員會以「XX明星都有買」「明星都嚟睇過」作為一件貨品的賣點，尤其見於地產界。然而他們都表示對此很反感，表示每個人的購物準則都不同，亦不能夠因為某人有買/用就代表適合每一個人，迪偉更斥這明顯是「冇做功課」的行為。

3）意見唔夠中肯/Hea

提到交流方面，Do姐表示有時購物都會感到迷惘，所以會向售貨員問問意見，而且其意見不能夠不中肯：「如果佢畀嘅意見係唔OK呢，咁我就一對都唔買喇！」余德丞再具體補充，表示有曾經遇過一些售貨員，每一次貨品都只會話「幾好」「OK」，令到客人更加迷惘，此行為要不得！

4）介紹親都係最貴

貴，就並不代表一定好，但做服務行業就切忌會以都向客人推介「最貴」的產品，余德丞就分享了很一次食西餐的經驗，當他向侍應提問推介時，豈料對方卻將餐牌上最貴的菜式作為推介：「唔肯定係咪最好食，總之就係最貴。」迪偉的經驗更離譜：酒樓都係咁，我嗌個例湯，你就知我咩價位啦，點知一嚟就鮑參翅肚！」實在好反感！