楊千嬅爆兒子Torres愛唱歌 想參加《聲夢傳奇》無懼演出壓力
楊千嬅爆囝囝想參加《聲夢傳奇》一句回應試圖叫停
楊千嬅在節目講到早前Halloween為囝囝丁進諾（Torres）佈置屋企，原因是他不單儀式感重，而且喜歡扮鬼扮馬，更遺傳父母鍾意唱歌的特質，她說︰
佢好鍾意唱歌，仲睇晒《聲夢傳奇2》識晒啲學員名，所以佢識Eric（《聲夢2》導師之一）。佢叫我問下點樣參加，我話「你唔好言之過早」，10歲咋。佢唔知，以為係玩game，唔明個樣嘢，唔明個壓力喺邊度。
另外，打從做女開始鮮有下廚的楊千嬅，近年已榮任為「廚娘」，雖然未至於出色，至少識煮。原因是老公喜歡食之外，更會評頭品足，但更多的是想可以親手煮餸給兒子吃。
楊千嬅49歲生日 爆老公出門口前叫佢小心啲
楊千嬅以一頭標誌性的紫色頭髮亮相節目，師兄亦穿上紫色衛衣襯返嘉賓。今趟千嬅是應Eric邀請出席，她又爆二人秘密，原來他們是同年同月同日生，是典型水瓶座性格，上星期五生日齊齊步入49歲。節目開始師兄問到千嬅，大懲罰最驚會遇到什麼物種，千嬅話︰「蛇蟲鼠蟻是基本驚，有毛滑潺潺、曉郁有生命都驚。」她又自爆老公丁子高出門前的叮囑︰「佢叫我睇路囉，小心啲出牌。開頭以為佢驚我輸，原來佢係唔想我輸得咁核突。」
楊千嬅分享好識應對獅子座男人
牌局正式開始，第一鋪先來三位女仕對決，千嬅憑最後一隻牌，構成同花擊敗Sonya 3條7及Amber一對A，先下一城。席間Eric講到圈中有不少獅子座藝人，師兄及千嬅老公都是最佳例子，Eric說︰「谷德昭都係，佢哋玩牌有一個特點，好少偷雞，開頭死都唔肯講畀我聽點解。後來佢哋解釋我聽，因為獅子座要面，好驚偷完雞衰咗個下，瘀呀。」
楊千嬅為谷愛子入名校虛脫激殘 選讀IB課程激發創意
楊千嬅回想初為人母時，曾爲谷仔入名校，犧牲自己不少休息時間，結果被本刊影到捱出激深黑眼圈，成個人虛脫激殘，媽媽唔易做！
楊千嬅愛子Torres 極速長高只矮媽媽半個頭
楊千嬅與丁子高婚後育有一子丁進諾（Torres），不時分享一家三口合照，Torres快高長大，就快高過媽媽楊千嬅。之前楊千嬅曾於2019年分享自己與兒子Torres的合照，兩年前Torres身高只到媽媽心口位置，轉眼兩年過去，Torres只與媽媽差半個頭！
兒子未滿一歲己為學業憂心 楊千嬅攰到企都企唔穩
在楊千嬅與丁子高所生的寶貝仔丁進諾（Torres）剛滿一歲時，楊千嬅已開始爲囝囝的學位問題而憂心，並化身「怪獸家長」，到訪幼稚園開放日及做調查，更曾因過於頻撲而病倒，爲人父母果真唔容易。當年丁太既要打理家頭細務，又忙拍彭浩翔執導的電影《香港仔》，頻頻開夜班，日間又要把握時間催谷愛子，難怪攰到腳步浮浮、企都企唔穩，勉強睜開眼，而且大熱天時著長袖衫，就知她虛爆！
當年本刊曾拍得千嬅穿潮tee、leggings襯MBT涼鞋，到其居所屋苑陽明山莊内的超市，履行丁師奶責任，購買日用品，現場所見，千嬅面上挂着三層眼袋激深黑眼圈，而且累得腳步浮浮，明顯睡眠不足虛脫激殘，購物時她更棄新鮮蔬菜肉食，反而大手買入大量叮叮食品、快熟通粉，莫非爲催谷愛子搞到連正正經經食餐飯都唔得閑？
千嬅當年受訪，曾訴說希望兒子將來有成就，本刊發現千嬅並非得個講字，而且已積極實行。原來千嬅爲替愛子揀選學校及playgroup，在愛子剛滿一歲時已親身到心儀的幼稚園及playgroup視察，然後通宵上網搜集資料，因而捱病，其後被迫將心水名單交予老公丁子高代勞。
千嬅更曾自爆老公丁子高怕她的買餸look太吓人，影響星途，特意命stylist多買一set便裝潮服，供她買餸時穿著，當日所見，千嬅所穿花T恤果然型夾潮，可惜丁生千算萬算算漏一步，原來千嬅殘樣可以比她的衣著更嚇人！
千嬅爲令囝囝赢在起跑線，無所不用其極催谷愛子，當時有知情人爆：「Torres依家同時返緊幾間playgroup喪谷，千嬅仲打算囝囝一學識講嘢，就即刻請導師上門教語言，佢已經鎖定學校，依家一有時間就同個仔操面試，買嘅玩具全部同學習有關，連難得出嚟食飯都係問家長朋友子女升學問題。」
丁子高：想佢入聖若瑟
其後丁子高被拍得一支公逛幼稚園及playgroup，他更直認已爲兒子找學校：「我知小朋友辛苦，但唔想佢一返學校乜都唔識。已經搵咗兩間心水playgroup，我以前讀聖若瑟，所以都想囝囝讀呢間，不過都要再觀察吓個仔性格先，其實我想個仔讀本地學校多啲，想佢有番啲壓力，因爲屋企已經好多人錫佢，想嚴啲，讀書辛苦可以鍛煉吓佢。」
楊千嬅為子揀英基
楊千嬅與丁子高的兒子丁進諾（Torres）最終入讀了英基屬下位於港島區的白普理小學（Bradbury School），有指楊千嬅是為了免囝囝Torres學習壓力太大，因而選擇報讀國際學校，而丁子高就認為國際學校的環境空間較大、設施較完備，故亦傾向國際學校，放棄為兒子報讀其母校、位於灣仔區12校網的資助男校聖若瑟小學。
夫婦倆曾考慮加拿大國際學校，亦出席過學校的面試，但最終決定讓 Torres 入讀白普理小學（Bradbury School），Year 1 全年學費約10萬元。早年楊千嬅一家三口被目擊出席學校新生日，開學首日千嬅親自接 Torres 放學，見證兒子成為小一新生。
