陳奕迅即興演繹《浮誇》超水準 重提2014年震懾台下韓星目瞪口呆

分享演出心得：「最緊要有態度」！

Eason來到傾偈位時，詢問觀眾為何演唱會只開始了一會便大嗌：「 我真係好好奇，係第三隻歌，點解你哋要叫我名，我好想知。」觀眾大叫： 「掛住你呀！」他答道：「我知啦，你哋有禮貌有家教，所以你哋叫 Eason…..唔係叫『呀喂』！哈哈。」

自認舞姿肉酸「我腳又粗額頭又闊」

Eason鼓勵大家唔好介意自己跳舞肉酸：「我排舞時同dancers 跳 ，佢哋叫我做啲動作，我覺得自己好核突，所以我排舞唔望鏡㗎，從來唔知自己跳成點，隻腳又粗額頭又闊，哈哈哈…」

重提MAMA演唱揚威國際：「唔好俾韓國人型晒先得㗎」

跳舞一向是韓國歌手的強項，Eason則表示最緊要有自己的態度，又不經意提起2014年演韓國的MAMA音樂頒獎禮自己的演出如何令韓星也驚訝：「但係既然我都做得，我鼓勵大家，一齊同我跳！記住！做任何事最緊要係有態度！唔好唔型、唔好比韓國人型晒先得㗎！你睇我唱《浮誇》時，佢哋個啲樣…」

事隔7年清唱《浮誇》！爆發力超強 重回演出高峰

然後Eason扮出韓星於台下睇他演唱《浮誇》目瞪口呆的樣子，全場拍掌歡呼，Eason又說：「要有態度！但都係要低調…哈哈。唱《浮誇》？條片係YouTube呀，隨時上去睇啦。唔得啦，我老啦……」

不過觀眾不肯罷休，仍是大叫，Eason超搞笑道，「其實我唱得好差呀，其實我咪嘴㗎成個騷….」觀眾終於打動到他，Eason說：「好啦，好啦….老實講佢哋（樂隊）冇練㗎…有冇我隻CD呀？播出來俾我對嘴啦，哈哈哈….算啦，既然你哋咁想聽，Christmas Special唱幾句啦….個個拿住部電話係度拍，一陣又話我唱錯，我聽日又俾人話啦！」接著樂隊用一隻琴伴著他清唱了《浮誇》半段，雖然Eason一開始又甩轆忘詞，但後段逐漸進入狀態，爆發力超強。

拆禮物日Encore唱《還有甚麼可以送給你》&《沙龍》

來到安歌環節，因之前平安夜、聖誕節觀眾不肯離場，搞到他要再度encore，Eason今晚唱了《還有甚麼可以送給你》，觀眾又再不肯離開，叫了15分鐘之後，Eason再度出場唱多一首《沙龍》，同時宣布27號晚休息，28號因不再是聖誕節故個唱會返回正常軌道。

相關文章：陳奕迅演唱會｜每場Encore歌單免費公開！聖誕額外唱出《Lonely Christmas》

肥仔瘋狂跳舞 193怕遮住觀眾唔敢企起身

拆禮物日Eason騷有周秀娜、193及肥仔，湯令山及女朋友Moon等支持，肥仔更看得非常投入，似已經學齊Eason台上《重口味》及《打得火熱》所有舞步，跟著不停狂跳，而旁邊的193可能怕自己身高會影響後面睇騷觀眾，所以不敢起身，只在座位搖來搖去。

陳奕迅 26 Dec Talk Part唱《浮誇》：

拒絕再幫歌迷簽CD怕畀老婆鬧　揚言2024年都未會退休

為了順利完成跨年演唱會，陳奕迅都要聽老婆訓示，與歌迷保持距離， 自從開騷初期他即興為歌迷於台上簽了CD之後，之後也有觀眾不停拿著他的專輯揮動叫他簽名，但Eason坦言他不能再接 CD簽名，因為上次已被老婆扭耳仔：「你知我好率性而為，但上次簽咗之後，已經比老婆話(做了一個扭耳仔動作)，不如你帶住喺街啦，2024年或者應該可以，我應該未退休…我成晚見到你好投入係到搖，我入晒心㗎啦，我記得你㗎。」

陳奕迅即場挑戰下肢挺舉捲腹

期間有觀眾大叫他「除衫」，Eason反問：「下？乜依家重興呢樣嘢咩？唔係唔係興著衫咩？」然後觀眾們讚他瘦了又大隻左，陳奕迅大笑說：「我邊大隻啊？我係瘦咗少少，自然咁瘦啦。 」說完後即場坐在地上表演Leg Raise crunch（下肢挺舉捲腹） ，「你日日試下，平時坐係廳睇電視咁…」接著他hold住這個難度動作，邊講邊笑說：「有冇人比本雜誌我….哈哈。」總共hold了1分06秒之後才站立起身，全場期間不斷歡呼拍掌大叫「好勁呀你！」Eason起身後，他立即狂笑及大叫，「哈哈，好攰呀，救命…死啦，我唔應該咁，依家好實（下腹）有冇人識按摩…哈哈。」