陳茵媺復出騷身材不似41歲 陳豪：多爸媽阻仔女成長 1法增學習興趣

陳茵薇疑復出與家人享親子樂 與陳凱琳齊騷身材

陳茵媺婚後主力照顧家庭，甚少出席幕前活動，十分顧家的她亦非常懂得享受家庭樂。近日有傳她即將返回幕前，與老公陳豪合作，於TVB新劇飾演情侶， 因此她把握和三個孩子的相處時間，早前帶家人Staycation，仲上載多張相片，只見全家酒店泳池邊開餐、坐上直昇機遊香港，幸福生活羨煞旁人。

其中陳茵媺上載一組身穿比堅尼的照片更是由老公陳豪親自操刀拍攝，可見照片中的她大露纖細蠻腰，身材完全不像一三孩之母，而且皮膚白滑零皺紋，吸引足足15萬人點擊收看。

除了Staycation，陳茵媺還會和女兒Camilla共享煮食樂，教女兒做一些小甜點、香腸芝士麵包、小蛋糕。更曾上載影片，影片中陳茵媺十分細心和有耐性地教導Camilla如何處理麵糰，畫面樂也融融。Camilla五官精緻，似足媽媽，網民紛紛留言大讚她絕對能夠跟媽媽一樣選美：「見到未來港姐冠軍！」

同是已為人母的陳凱琳也在個人社交平台上載了一組和KOL好友們一同舉行夏日派對的照片，照片中可見陳凱琳身穿針織短吊帶和針織短裙，將自己的小蠻腰展示出來。在六位女生當中陳凱琳更是最纖瘦的一位，看照片完全不覺得已生過兩個小朋友呢！陳茵媺和陳凱琳在產後身材都保持得很好，完全看不出已為人母，果然是06年與13年香港小姐冠軍。

陳茵媺回應第四胎傳聞

對第四胎傳聞，陳茵媺回應傳媒指自己不是懷孕，只是照片角度令身材看似圓潤，事實是反而瘦了。被傳媒問到會否再追多個女，湊成兩個「好」字，陳茵媺稱「三個就夠晒數」，如果一定是女孩子，她便會考慮。

夫妻恩愛比學業重要

陳豪跟太太陳茵媺（Aimee）於2010年因拍攝電視劇而刷出愛火花，拍拖兩年便認定對方是一生一世，雙雙步入教堂，三年抱三，一家五口樂也融融。無論在鏡頭前後，陳豪與Aimee都非常恩愛，是圈中的模範夫妻，每次見他們在社交網站分享合照，都會惹來網友們艷羨的目光。

孩子出生後，很多爸媽都會把生活重心放在小朋友身上，漸漸就會忽略身邊人的感受。陳豪和Aimee深深認為父母對孩子的影響深遠，認為其實父母相愛，作為子女當然也能感受到愛：「我相信屋企係唔係充滿愛，會直接反映小朋友將來有幾多愛。坦白講，今時今日學習唔係唔重要，不過屋企的愛絕對比學業重要。」

「小朋友被愛包圍，先會令佢哋對學習有興趣，而父母對佢哋的關心，會影響佢哋將會嘅性格係咪充滿陽光、快樂同透明度。我同Aimee好著重，除咗我哋兩公婆之間要有愛，都要確保屋企嘅環境係充滿愛咁畀佢哋成長。」

子女各有性格 獎勵計劃教育孩子

三年抱三，對於陳豪來說除了是個甜蜜的負擔，也算是人生的一大挑戰，正因為三名孩子的性格各有不同，也因為他們的年紀相若，不時會出現爭吵的情況，令陳豪不懂招架。幸好陳豪家中有賢內助Aimee，他可以放心拼搏事業，為這個家帶來更多新希望。

「大哥就比較文靜，鍾意畫畫、下棋，二哥就比較有耐性，鍾意面對挑戰，而囡囡天生比較強悍，非常貪靚，好有表演慾，基本上三個係完全唔同性格。有時佢哋好鬼Friend，有時又會爭玩具，甚至會有少少動手動腳，但好彩佢哋三個都係聽話，都知道佢哋個心底其實係愛錫大家。就好似有時同佢哋去街，佢哋都一定會確保個個都有得去，唔可以漏底任何一個。」

「我同Aimee見大哥同二哥兩兄弟經常都會嘈吓交，所以我哋由好細個開始，就將大哥同二哥放埋喺同一間房生活，唔理佢哋係嘈交又好，兄弟之間妥唔妥都好，要佢哋一齊去長大，明白咩叫血脈相連，就已經好夠。」

兄弟姊妹之間爭風呷醋是常有的事，要做到不偏心，陳豪就大讚Aimee有妙法：「我哋屋企有一個好好嘅獎勵計劃，當小朋友先發性做咗好事，例如自己去洗手間、自己食飯、著鞋著襪，就可以得到一粒波波。小朋友都有屬於自己嘅玻璃瓶，只要瓶入面啲波波滿晒，就可以單獨咁同爸爸媽媽享受去玩嘅時間，例如去坐摩天輪、旋轉木馬、去海洋公園玩等等。」

「教養方面，Aimee比較嚴謹，反而我就比較寬鬆，有時做爸爸畀小朋友嗲多幾句，就會乜都應承佢哋。我真係無Aimee咁叻，佢可以令到小朋友先發性做好多嘢，而我就係一個傳統少少嘅爸爸，有時小朋友唔肯做，我都會幫佢哋做，但Aimee就話唔得，自己的事一定要自己做，所以我哋先會有個獎勵制度。」

重視家庭時間 陪伴孩子成長

短短在四年之間，陳豪和Aimee由二人家庭，變成一家五口，作為家庭支柱家陳豪當然要努力工作。不過工作歸工作，照顧孩子不只是媽媽的責任，爸爸亦應擔當重要角色，陪伴孩子成長。因此只要一放假，陳豪就會變身成「湊仔公」，成為「超人爸爸」。

「小朋友嘅光陰其實好短，作為家長除咗要陪佢哋玩之外，仲要教佢哋好多嘢。其實只要同佢哋一齊，做乜都無所謂，陪佢哋做功課又開心，出街我又開心，食餐飯都會好享受，因為我係鍾意同小朋友一齊，只要佢哋喺我身邊，無論做咩都係咁開心。」

訓練孩子獨立 拒絕成為「港孩」

大哥Aiden今年8歲，二哥Nathan今年7歲，而女兒Camilla則是6歲，在這個年齡階段的小朋友，需要爸媽悉心照顧和注意力，「獨立」這個字似乎跟他們沾不上邊，不過陳豪解釋，早在Aiden出生時，已經跟Aimee討論好管教的模式：「世界上有好多嘢係需要孩子自己去學習，學習自己食飯、自己去洗手間，依家香港呢個環境，見到好多小朋友都有工人姐姐嘅照顧，如果我哋幫小朋友做，提供好多幸福畀佢哋，其實係扼殺咗佢哋成長嘅機會。」

「就好似有人會主張要餵小朋友食流質食物，原因就係驚佢哋會哽親，就忽略咗每樣食物都有唔同硬度，對孩子的腦部發展好有幫助，因為可以畀佢哋知原來依種食物係脆的，嗰種食物係硬的。」

「作為家長希望小朋友可以成長、多點學習，所以就要多鼓勵佢哋作新嘗試，千萬唔好怕失敗，要佢哋知道世界上仲有好多嘢值得佢哋去學習。就好似輸同贏咁，唔可以淨係要佢哋贏，要教埋佢哋輸，學習面對失敗。」