49歲陳豪疫市奇「爸」狂吸金獨養九口之家完全無難度

May 14 2020

新冠肺炎疫情來勢洶洶，幾乎推冧全球經濟，香港娛樂圈亦被打擊得體無完膚，不少藝人冇工開幾個月，要勒緊褲頭慳住使，相比同業，無綫藝人繼續有劇拍，未至手停口停，不過冇晒賺外快機會，個個亦叫苦連天，但當中仍有另類例子。近日趕拍劇集《陀槍師姐2020》的陳豪，就成疫市奇「爸」，就算少工開都每月照袋幾十萬，令一班無綫藝人羨慕不已！

原文刊於：東方新地｜撰文、圖片：東方新地｜編輯：Sunday Kiss

陳豪疫市繼續有工開做足防疫措施

自今年初新冠肺炎殺入香港，各行各業都步入寒冬，電影同演唱會全面叫停，不少藝人同幕後收入同樣大幅下瀉，要攜手共渡難關，幸好，電視業務稍有運行，無綫連月來就繼續開劇，一班藝人可以繼續有工開。正在趕拍《陀槍師姐2020》的陳豪，在疫情開工拍劇的他亦緊張做足防疫措施，戴口罩雙重保護，在口罩內攝多層紙巾，每拍完一個鏡頭，都緊張戴回口罩，又不停用搓手液搓手相當緊張，慎防有機會把病菌帶返屋企。

新冠肺炎疫情影響下，無綫近月拍劇亦減少出外景，原本六月煞科的劇集《陀槍師姐2020，亦要延期至八月才拍竣。

屋企有大有細的陳豪，拍劇亦非常緊張防疫，一停機就會即刻戴回口罩，又搓手液、消毒用品時刻跟身。

簽包薪經理人約停工繼續每月出幾十萬糧

早前政府頒下「限聚令」，開有咖啡店的陳豪，生意雖受影響，但絕世好老公兼好爸爸，就得上天眷顧成為逆市奇「爸」，商業演出減少卻繼續有錢落袋，與陳豪同拍《陀槍師姐2020》的一班演員如羅仲謙、宣萱、洪永城及鄧佩儀等，就對繼續有高收入的「疫市奇爸」陳豪表現羨慕。據知情者透露：「拍劇開工時間長，大家停機都會圍埋傾偈，成班工作人員都好羨慕阿Mo（陳豪），因為呢排商業活動停晒，大家冇晒搵外快機會，傾開先知阿Mo係無綫最高薪藝人，就算佢拍咗嘅兩套劇，《殺手》同《愛美麗狂想曲》仲未出街，佢都唔使擔心，因為佢簽嘅係包薪經理人約，就算冇工開，一樣個個月出幾十萬糧，相比要靠外快增加收入嘅藝人，真係同人唔同命，大家又點會唔羨慕佢！」

一人賺錢獨養九口之家的陳豪，有萬能老婆持家，可以安心工作，日前趁住母親節，他就聯同三個仔女幫老婆慶祝，一家五口幸福到爆！

無綫旗下藝人，分為包薪經理人約，藝員合約及部頭合約，包薪經理人合約以每月底薪計算，新人由幾千元起跳，工作愈多，賺到超額會有錢分。

而多年來穩守無綫金蛋王的陳豪，一直深受客戶歡迎，廣告多不勝數，19年續約就年袋千萬。

為家人拒絕向外闖陳豪獨養一家九口無難度

2018年底，盛傳古天樂與蕭定一分別向陳豪招手，不過，獨力擔起頭家的他，家庭開支不少，為求穩陣就放棄外闖機會，寧願留在無綫穩紮穩打，有指成功以3,000萬同無綫續約。據知情人士透露：「阿Mo形象好，又畀人時尚有品味感覺，咁多年嚟都係廣告客嘅寵兒，有時一星期都出幾個活動，好多唔同層面嘅廣告又畀佢擸晒，為咗留住呢隻金蛋王，無綫都計晒數，阿Mo喺正黃金時間續約，佢咁搵到，當時經濟又好，薪酬特別高，只係佢續約半年左右，香港就遇上政治風波，加上呢幾個月新冠肺炎肆虐，唔止香港，外地同內地啲工作都停晒，咁嘅時勢，佢冇受影響真係行運。」