42歲陳鍵鋒患遺傳病改變人生觀 昔日無綫力捧小生今退休傳教

撰文、圖片：東方新地

陳鍵鋒腦部缺少一條主要血管

現年42歲的陳鍵鋒，去年在見證會上分享人生經歷，驚爆前年在泰國做身體檢查時，發現腦部缺少了一條主要血管，返港經專科診斷，證實是遺傳病一種，人生大受打擊，更曾因此有過輕生念頭。他坦言：「有一天我潛水的時候，突然萌生一絲奇怪的念頭，想著我一直潛下去，可能永遠冇人找到自己，好彩這念頭一飄而過！」身體響起警號令他開始重新審視自己人生！據知情者透露：「自從《美人心計》走紅之後，呢十年嚟Sammul 都喺內地搏殺，工作做到冇停手，始終年紀輕，根本唔會諗自己有咩病痛，直至檢驗到有血管遺傳病，對佢真係好大打擊，突然間有好多憂慮，又諗好多負面嘢，會諗如果血管爆咗，自己會唔會半身不遂，產生好多恐懼，好彩佢喺基督家庭成長，有家人同神嘅指引，令佢有新嘅領悟，重新審視自己嘅人生，將未來交畀神去安排，成個人亦輕鬆咗，有番正能量積極面對未來。」

細個已經有傳道諗法

去年陳鍵鋒報讀一個為期四年的美國芝加哥遙距神學學士課程，學費要幾十萬，更要應付大量功課，去年他到象山拍畢之前接下的網絡電影《封神榜大破萬仙陣》，已經未有再接新工作，近日更萌生退休念頭。據知情者透露：「本身Sammul 就好好學，以前為咗演出更專業，佢專登學急救、潛水，手語同幼兒護理，依家讀神學雖然功課好多，但喺學習過程令佢有好多啟發，佢決定完成學士學位之後，繼續進修碩士課程。因為爸爸係教會幹事，其實Sammul 細個已經有傳道嘅諗法，無心插柳入咗娛樂圈，因為工作繁忙，佢都自覺同神愈行愈遠，今次嘅經歷，令佢有一種係神召喚佢嘅感覺，佢決定讀完大學之後去傳教，退出之後，可以有更多時間去做分享同見證，鼓勵他人！」人生有幾個十年？當然要珍惜時間做自己喜歡的事！是晴是雨，取決於自己的心情！

TVB俊男攻內地爆紅

生得高大靚仔的陳鍵鋒，在無綫拍過不少受歡迎劇集如《律政新人王》、《學警》系列，與同期出道的吳卓羲、林峯及馬國明合拍《少年四大名捕》成好友，隨著陳鍵鋒退休，相信四人要再同框合作已經不容易。