陶傑再論MIRROR ：怪論回應姜濤生日現象 刪完又再貼

陶傑回應姜濤生日現象

陶傑在姜濤生日當天再出怪論，提出四大建議，被網民批評「酸味甚濃」，他本人則強調以下建議不涉任何情緒立場、客觀中立，是為了為化解仇恨，平息社會鬱結，促進香港國際形象與整體利益，更說要向特首參選人李家超建議：

1，銅鑼灣地鐵站改名「姜濤站」—— 英譯方面，應該叫Keung To Station 定係Jiangtaozhan，都幾政治敏感，涉及港獨或大中华之爭，我不敢講由全港鏡媽姜粉投票，不如由港鐵揸主意啦。

2，將4月30號列為公眾假期，兼與「五一國際勞動節」假期連結，由特府駐京辦向大陸宣傳，加大黃金周消費力度，慶賀中港通關。

3，維園皇后殖民銅像改立為金身姜神像，立法會撥款，造價一億，不必投標，由北京工藝美術學院首席師傅率領團隊打造，慶祝香港回歸25周年，今年七一由新郎超哥會同某訪港國家領導人一齊主禮開光剪綵，香特從此天下太平。

4，每年十二個月，廢除月份英文名詞，公佈香港英文月份創意新名稱如下，並發行全套新郵票公告國際：
January – Ansonary
February – Frankiary
March – Jerch
April – Keungto
May – Mian
June – Jerune
July – Jutie

August – Altost
September – Stanlember
October – Altonber
November – Lokmanber
December – Dedanber

陶傑：如果李家超邀請MIRROR去大灣區表演⋯⋯

繼在周三晚（27日）的電台節目中大膽品評MIRROR係虛火後，陶傑在周五晚（29日）的節目中，繼續評論MIRROR現象，指現在MIRROR一支獨大，不成工業，他指以前八、九十年代的香港明星，走紅無政治考慮，不會強調自己身份，Fans亦無這種政治意識投射，所以在以前明星們可以走向不同市場，但在現今社會以政治取向分類的氛圍下，電視台與明星都好多掣肘，他舉例問：

「如果李家超邀請MIRROR去大灣區表演，會不會被歌迷放棄？」

如果自己25歲，都會轉行搞基

陶傑說並非MIRROR一定要入內地市場，但另一方面他們受歡迎，亦會受到內地權力人士關注，受政治有色眼鏡監視，就算去台灣同英國開演唱會，都會變成政治問題。陶傑強調他身為香港人，都好想MIRROR發揚光大，不過又抵死地表示MIRROR能夠激發他行「斷背山」的興趣，「如果我係25歲，都會轉行搞基」。他認為Fans不應該太過亢奮、要有危機感。他續指MIRROR對振興整個香港影視工業幫助不大，現在的問題是香港演藝圈缺乏一個百花齊放的生態，他指這個現象能夠講足3日3夜。

前兩日陶傑話：睇嚟睇去都MIRROR

陶傑日前與馮智政一同主持商台節目《光明頂》，當晚節目主題原本為探討曾江猝逝一事，但當講華語電影工業時，陶傑忽然狠批Mirror，指現時香港電影工業「睇嚟睇去都MIRROR」，直指他們的爆紅只是「虛火」，實際上毫無內涵同深度！

陶傑：MIRROR係救唔到香港任何工業同影視

陶傑爆Seed話Mirror ：「依家華語片同成個亞洲嘅電影工業，基本上都有種年齡歧視，依家香港都係，睇嚟睇去都MIRROR，MIRROR唔係話唔好，你可以喺情感方面向佢投射，但12件咁嘅嘢呢，樣樣小鮮肉，搓埋一團麵粉，拉番出嚟，我唔覺得分得開邊個打邊個囉！係你有啲人話分得開啫，我唔覺得係囉，所以呢，呢啲係虛火嚟嘅，對唔住呀，你可以有一種『傘後』，即係19年之後，自己嗰種一廂情願嘅政治情感投射，但係MIRROR係救唔到香港嘅任何工業同影視嘅，真係對唔住，因為呢一行係要真材實料，係要深度同內涵嘅。」

批後生、有觀眾緣、靚仔有肌肉就拎晒所有工作機會

陶傑認為香港娛樂圈有年齡歧視，不太著重曾江這類有深度及人生閱歷的年長演員，他說：「（喺香港）最緊要後生、有觀眾緣、靚仔有肌肉，就拎晒所有工作機會，但30歲以上就話好老，好似劉德華嘅角色就要成日30年前咁高大威猛。」他又引用曾江生前訪問的內容說：「佢講得好中肯，佢話香港做導演太年青，點解有班人對你哋咁苛責，因為好多明星演技唔合格，大陸演員好多演技高超，佢講嘅係事實，大陸嘅陳道明、葛優，佢哋唔係靠靚仔，佢哋演技爐火純青，大陸有演員有演技，無創作自由，而香港就倒轉嚟。」

馮智政警告：鏡粉喺英國有分部

陶傑這番說話引起網民熱討，有網民認同陶傑的言論，有網民就話「人唔喺香港就火力全開」、「好明顯陶傑攞唔到mirror飛先咁講」、「佢眼中可能得小鳳姐嗰啲先叫有實力」、「呢個世界係有偶像派」等等，亦有網民重提當年蔡楓華對張國榮所說的「名句」：「一剎那嘅光輝唔代表永恆」，將陶傑同蔡楓華相提並論。而陶傑的拍檔馮智政則在社交網預告陶傑「今晚可能繼續講mirror」，又搞笑「警告」陶傑說：「中國國安去唔到英國捉人，鏡粉係英國有分部架，陶生。」