陪跑12年 45歲馬國明首封視帝 孝順仔帶母去LV開心放血
撰文、圖片:東方新地 | 編輯:Sunday Kiss
馬國明封帝馬母狂喜孝順仔拉大隊名店放血
馬國明封視帝獲全城恭賀,狂喜的還有馬明家人,特別是他的母親。知情者透露:「之前馬明同心穎一齊,擺到明係畀人利用,老人家睇人唔會走漏眼,心穎唔安守本份又鍾意亂使錢,馬太(馬明母親)點會鍾意?不過佢唔想個仔難做,所以唔會出聲,由得佢哋發展。到心穎爆煲馬明斬纜,馬太知道個仔唔開心,但佢都唔會多問一句,只係默默支持,見佢日日放工就返屋企,做阿媽嘅就煮飯煲湯畀佢,兩母子一切在心中。今次馬國明終於封視帝,馬太開心到不得了,一早就買定餸煮餐好嘅同佢慶祝。」孻仔孻心肝,馬國明亦深明世上只有媽媽好,除了每月出糧會大大份家用孝敬老人家外,過時過節亦會識做送禮物,日前他帶住母親與家姐,前往銅鑼灣名店LV行街,眼見馬母孭住個舊款LV包包,看來她對這個牌子情有獨鍾。
拖到實怕走失 馬國明埋單兼做送貨員
出爐視帝大駕光臨,名店內的售貨員即打醒十二分精神,馬國明拖實母親行勻整間店,之後有專人服侍,拿出馬母心儀的多個款式讓她過目,馬明家姐一直在旁畀意見和幫手拎住舊手袋,馬明亦拎起多個新款讓母親比併看清楚,有乖仔傍實,馬母全程笑得好開心,最後因為她嫌心儀的手袋皮帶太幼,馬明向售貨員表示另外多配一條粗的皮帶,這個窩心決定令馬母更加滿意。馬母賢良淑德,從來不好名牌,也不喜歡揮霍,據知當日孭住的LV舊手袋也是多年前由馬明送贈,孝順仔見手袋已舊,說服多時母親才肯親自去名店再揀個新手袋,這日馬母揀了個實用款式連粗皮帶盛惠約2萬5千元,當然是由馬明埋單兼做送貨員。
拖住母親兼拎住兩大袋戰利品的馬國明,這日更擔任司機送母親及家姐去行街掃貨,離開銅鑼灣後,馬明駕車到達北角,泊好車後一行三人去到國貨公司。現場所見,馬母對一些酸枝傢俬非常感興趣,之後又去中藥部睇可以防中風,不少老人家會放在家中看門口的「牛黃丸」,而馬明亦非常有耐性,全程拖實陪睇陪買,細心的他回程時更先送母親及家姐抵達家門口,才獨自去停車場泊車。
![馬國明](https://imgs.orientalsunday.hk/wp-content/uploads/2020/01/12_1156a_cove_p14_17_1176807785e311ce3e42fb.jpg)