黑色月光｜蔣祖曼客串做名模親解為何鍾情短髮 回顧拍戲初衷
相關文章：《黑色月光》 最新追劇日曆/ 劇情/ 播出時間/ 角色簡介
《黑色月光》蔣祖曼客串第6集飾演名模娜娜
早前在《法證先鋒VI：倖存者的救贖》（下簡稱《法證先鋒6》）飾演名模苗娜娜的蔣祖曼，與男主角黃宗澤有感情線，劇集最後提及娜娜誕下兒子但未有放棄事業，同樣在監製鍾澍佳旗下的另一重頭劇《黑色月光》， 想不到也可以見到蔣祖曼的演出：
六部機一齊拍Catwalk 大場面
該幕最值得留意的是《法證先鋒VI：倖存者的救贖》主角之一Nana（蔣祖曼飾）以名模身份現身宴會的天橋上大行catwalk，其中某些鏡頭、祖曼更與林夏薇及文雪兒同場，獲不少網民大讚驚喜。不說不知道，祖曼在場口的亮相時間、扣除楊茜堯及林夏薇的特寫鏡頭，前後只有約16秒，但這短短16秒的鏡頭、卻足足拍攝了大半個晚上，足見製作認真。祖曼受訪時直認是專誠到《黑色月光》劇組拍攝相關客串鏡頭，笑言很興奮：
「咁啱《法證》同《黑色月光》同一時間開工，但嗰日我淨係開《黑色月光》，所以唔係剪接，我係直接進入《黑色月光》劇組，見到楊茜堯同薇薇超開心。呢場戲好犀利，我人生未見過六部機一齊拍咁大場面，好犀利。同埋令我覺得Nana呢個角色圓滿咗好多，因為佢喺《法證》度冇乜實質行過天橋，咁《黑色月光》呢個位就彌補到佢呢個缺口。佳導成日都會埋啲伏筆，好多角色都會喺唔同嘅劇度穿插，呢樣嘢好好玩，最好玩嘅角色，係同一個角色但喺劇組度係接觸唔同嘅工作人員，梳化服都唔同，所以好過癮，我都好期待Nana將來係咪可以再去第二套劇玩。」
超級名模Nana角色圓滿
對於《法證先鋒6》角色，蔣祖曼透露是一名自帶喜感、有信心兼自戀的超級名模，並笑謂與自己有少許相像：「佢都係睇落好硬淨，但其實係鱷魚頭老襯底，又有少少喜劇性質喺度，我好希望可以拎住呢份可愛。我個人都有喜感嘅，但因為我勁I（Introvert），要對住好熟嘅朋友先表現到出嚟。」談到與Bosco首度合作，Joman笑言「初初好驚佢」：「因為佢做嘢好認真，睇落去好似好惡咁，但事實佢係超Nice，好感激Bosco拍攝時幫咗我好多，佢所有嘢都好快好準，又會主動畀意見我。」
黑色月光｜蔣祖曼為《法證先鋒6》角色激減15磅
蔣祖曼在短時間內激減15磅，為了演出精益求精，客串《黑色月光》可算是用盡今次造型：「我一接咗部劇第一樣嘢係減肥，因為至少外形都要說服到觀眾係Model先，所以唔可以畀自己有多餘嘅肥肉。準則係如果身邊人話我瘦咗好多，咁就唔啱喇，我目標係減到大家都要話我瘦得滯。今年年頭，大家都話我瘦得滯，嗰段時間應該係我人生最輕。但當我減完試造型，就好慶幸自己Keep咗弗，嗰啲衫真係有少少肉都着唔落，同埋有啲衫係設計師自己嘅Show Piece，由手袖、首飾到腳嘅配搭都係落足心思。」
星光路上｜蔣祖曼親解為何鍾情短髮 回顧經典角色憶述拍戲初衷
《法言人》「釘官」蔣祖曼飾演嘅區域法院法官形象鐵面無私，與張頴康甜蜜互動，反差很大的形象都拿捏非常準確！最近她接受專訪談及自己近年演出的經典角色，回想入行的初衷，也回應了為何鍾情短髮造型，未知觀眾又對她哪個角色最有印象？
蔣祖曼親解鍾情短髮因由
熱播劇《法言人》入面飾演嘅區域法院法官形象鐵面無私，但喺同張頴康飾演嘅張大狀「女上男下CP」嘅感情線又令觀眾睇得賞心悅目，被大讚演技拿捏非常準確，受TVB《星光路上》主播潘盈慧訪問時，被問及出道至今都保持住短髮嘅形象，佢話自己係一個唔多打扮外表嘅人，對於其他女性鍾意扮靚同購物，佢就話自己入到舖頭就會打喊露。
蔣祖曼被指下巴時肥時瘦唔連戲
近日更有網民發現「釘官」蔣祖曼在劇中經常唔同樣，有部分網民更質疑其外貌經過「後天加工」，陷整容疑雲。劇中有某些角度顯得蔣祖曼離奇變哨牙，面部亦稍微變尖，竟質疑佢下巴疑似加工，導致表情有些不自然，又話某些角度撞樣前港姐翁慧德。不過估計只是因為蔣祖曼拍劇期間，時瘦時肥導致唔連戲。
蔣祖曼入行純因為愛上演戲
唔鍾意扮靚，又點解會入行呢？蔣祖曼覺得成件事好順理成章，當初讀書參加課外活動時，獲安排參加一個港台嘅劇集面試，之後就開始參與幕前演出。初時覺得拍青春劇覺得好開心好好玩，之後就再接觸獨立電影、舞台劇、電台DJ等工作。至於踏足電視台，就係由一位舞台劇攝影師推薦佢畀監製蘇萬聰（《鐵探》監製） ，之後再認識監製劉家豪（《逆天奇案》及 《法言人》監製） 。
蔣祖曼向來形象硬朗《輕．功》喊戲極大挑戰
蔣祖曼一直飾演嘅角色都畀人硬朗感覺，直至去到劇集《鐵探》飾演被人欺負嘅角色時，蔣祖曼都話收到劇本嘅時候好開心，好想呈現到另一面畀觀眾睇到。喺劇集《輕．功》入面飾演黎耀祥個女，但係成套劇就要不停喊，蔣祖曼都話係一大挑戰：「我記得有一場同祥哥，喺按摩店度做對手戲，嗰日好緊張，因為係成套戲拍第一場喊戲，加上收到劇本見到有咁多場喊戲，究竟要點喊，初時都未掌握得到，但拍到中段就發現可以習慣喊既感覺。」
喺劇集度面對演技嘅挑戰，又何止應付喊戲呀！蔣祖曼喺劇集《逆天奇案》飾演大狀，對住一大堆劇本，仲要有好多專業嘅用詞，係唔可以出錯，蔣祖曼話「我認真，我未試過，我嗰時連發夢都背緊，我就同自己講妳背唔到妳就真係…妳唔好諗啦，背啦!」嚟到今次喺劇集《法言人》飾演法官，蔣祖曼就笑住話輕鬆好多啦，不過對自己要求高嘅佢就有啲後悔，因為覺得自己演得唔夠威嚴。
更多：法言人｜蔣祖曼37歲演鐵面法官充滿少女心 外剛內柔真人被封「最強繼母」
蔣祖曼曾遇「渣男」 婚後忙於照顧仔女 拍劇成為「Me Time」
喺《法言人》入面，蔣祖曼就要主動追求阿康，不過現實生活中，佢就話自己絕對唔會咁做，不過就直認係一位愛情至上嘅人。喺感情路上，蔣祖曼遇過唔少「渣男」，例如賭徒、隱瞞自己有女友嘅人。直至遇到現任老公先搵到真正幸福，Joman話完全唔介意老公有一名兒子：
「嗰時我得21、2歲，當時我話，哦…你有個仔呀！OK！我同個仔真係好似姊弟咁相處。」
婚後為老公生咗一名女兒，Joman話平時喺屋企都要忙於照顧一對仔女同打理家頭細務，所以工作嘅時間先係自己嘅「Me Time」。
