31歲龐景峰被錢小豪寸功夫未到家：「我唔怪你，因為你有個好出色嘅老竇」

龐景峰節目上「大展拳腳」

龐景峰來到節目現場，就向觀眾「大展拳腳」，即場做前空翻及後空翻，令主持人紛紛大讚，Helen就問錢小豪：「有冇青出於藍先」，而錢小豪就先是拍手大讚：「好嘢，好到不得了啦。」之後他就問Andrew是否好大壓力，而兒子只是以笑回應。

父子互開玩笑

錢小豪開口就自誇：「我唔怪你，因為你有個好出色嘅老竇，你係跟唔到我啲筋斗咁靚，我搵個層次低啲嘅同你比，你都唔夠比，我搵錢家樂。」龐景峰當場大聲抗議回應：「我哋根本唔同！」之後就笑言：「我哋兩個啲春夢鬥唔過阿叔。 」錢小豪也認低威表示：「好彩盈盈（湯盈盈）唔喺到。」隨後錢小豪就大談他對於兒子的想法：「我都希望佢可以青出於藍，其實我係佢包袱，佢永遠出來做咩動作片，都會有人將我同佢比較，我希望佢可以再努力鍛煉。」

殺喪屍暗示父母離異

龐景峰在夢境中出現槍殺喪屍的情景，解夢專家Binky認為上述情況有機會是與父母離異有關，就問Andrew有否怨恨過爸爸。Andrew就直言表示在自己13到19歲時，在兩邊都沒有開心的感覺：「好似掉低我自生自滅，我唔可以用嬲呢個形容詞，因為你見一個人多就唔會記得到佢做過咩，但係少見就會記得同行對方一齊做嘅傻事，我同老竇嘅關係唔似父子，反而似兄弟，我係鍾意嘅。」，而錢小豪亦表示當初對於父子關係感到遺憾：「好似一套電影一開場後，就斷曬片，宜家Happy ending！」

去無綫上通靈節目爭曝光

無綫上月製作史上首個通靈選秀節目《通靈之王》並於7月11晚開播，龐景峰就以「功夫小子」做外號參加「通靈」。

龐景峰前後改名5次 錢小豪嘆無奈

龐景峰原名錢浩然，兩歲時父母離異，郭秀雲改嫁鋼鐵大王後人龐傑，龐景峰成為繼子，先後改名錢锜夫、錢梓宏及錢景峰。龐景峰一直隨繼父生活​​，前後改名五次，甚至連姓氏都改。由於21歲前改姓需經父母簽字同意，為免驚動生父，他需要跟後父姓，唯有硬加龐姓在前，變「雙姓人」 ，名為「龐錢景峰」。直到21歲後，最終才除父姓，改叫龐景峰。錢小豪對此一直蒙在鼓裡，在傳媒口中才知道此事，嘆十分無奈，稱五次改名自己都無法控制，隔幾年又改一個，令人混淆。他指龐景峰出世時爺爺叫他浩然，離婚後，媽咪幫佢改另一個，之後越改越多，連自己都不知道怎麼稱呼他。

龐景峰視爸爸為英雄

景峰自小隨母生活，14歲開始去外國讀書、獨自生活，景峰坦言不單止爸爸，連媽咪和屋企人都好少見，一年最多返港三四個月，而他每次相約見面的第一人，不是媽咪，更非爸爸。「我一定會搵爺爺嫲嫲先，因為佢哋年紀大喇，同埋阿嫲好錫我，錫嘅程度好恐怖㗎！」父子相隔兩地多年，最長試過幾年不見，小豪坦言一直記掛兒子，「佢始終都係我個仔，太耐冇見連發夢都夢見佢。」

對家人十分孝順的景峰，從沒有因為父母離婚而冷待爸爸，心底裡依然敬重，小時候看到爸爸的演出更十分仰慕，視他為英雄榜樣。「細個睇到爸爸喺電視同電影上面，我對眼係發晒光，覺得爸爸好型，係英雄呀！」

龐景峰、錢小豪首度父子檔拍戲

景峰望著爸爸，仍像小朋友仰慕爸爸的眼神。長大後景峰決定加入娛樂圈，出過唱片，現時他最渴望做一個出色的演員，已拍過兩部電影，直到今次第三部就有機會與爸爸合作。「可以同爸爸一齊拍戲係一種樂趣，唔係人人都有機會，我真係好開心！」

從爸爸身上學做一個演員，首先不是學演技，而是演戲的態度。小豪強調工作上最重要守時，能早到更佳，最好早兩小時到片場適應及熟讀劇本，並觀察幕後人員的工作，因為拍攝一套電影講求團隊精神，多與工作人員交流絕對有助演員發揮，景峰說：「爸爸天未光就敲門叫我起身，要我早兩個鐘學習幕後的重要性，同幕後人員建立關係。」

培養了早兩小時到場的態度，景峰亦應用於之後的電影拍攝，令他獲益良多，「可以跟燈光組學砌燈，跟攝影師學砌路軌、調校攝錄機，做演員唔係只顧自己嘅演技。」小豪更點出一個容易被忽略的好處，「早起身飲杯茶清腸胃，一早去清晒就唔會拍拍吓戲肚痛。」

龐景峰立志做武打演員

對於兒子在戲中的表現，小豪覺得中規中矩，值60分，尚有好大的進步空間。「佢始終係新人，我希望佢盡快適應拍戲狀態，呢個要經驗累積番嚟。拍戲要有好多才華，套戲要你做畫家，你就要似畫家；套戲要你識潛水，你就要識潛水，唔係對住屋企塊鏡就學到，做演員好多嘢要學。」

景峰對演戲充滿濃厚興趣，覺得做演員好好玩，可以擴闊自己眼光，學習更多，他更希望繼承爸爸的武打戲路，立志做一個出色的武打演員，現正積極裝備自己，勤力跑步、做gym、打拳，生性怕水的他更決定考潛水牌。「可能將來有套戲要我潛水呢？我要預備定。之前見到劉德華拍廣告墮馬受傷，所以我都去咗學騎馬，做演員最好玩係可以學好多嘢，仲學到以前父母唔畀學嘅嘢，好似玩槍、飛車！」

龐景峰期待父子潛水歷險

小豪聞言自己都有潛水牌，約定將來兩父子一齊旅遊潛水，景峰十分期待道：「我想同爹哋一齊拍啲歷險節目，即係潛水、爬山、征服雪山呢啲，難得呢個爹哋真係做到吖嘛！」小豪喝停他不要再談公事，不如來一次輕輕鬆鬆的父子旅行，「拍攝去玩喎……真係去玩先開心㗎嘛，為工作而去就唔好玩㗎喇。」景峰笑言要把握機會拍攝留念，「我好ready，你身體都OK，我哋玩到呢啲遊戲呀！」

景峰正值壯年，事業心重，希望與爸爸有更多工作上的合作；小豪的想法卻相反，已在影圈打滾多年的他，只希望與兒子四出旅遊，增廣見聞，「見識多啲呢個世界係大家嘅寶庫，唔係去東京shopping，係去喜馬拉雅山、巴布亞新畿內亞睇風土人情，可以學到好多嘢。」景峰點頭和應，但仍然滿腦子工作……「我好想同爹哋拍一場精彩嘅武打對手戲，第日老咗可以睇番……」小豪沒好氣道：「我打贏你又話我恰你，你打贏我就不孝，何必拍呢？」

與郭秀雲離婚遺憾無陪龐景峰成長 龐景峰感爸爸叔叔像大細路

經過大半年的相處後，小豪有感景峰真的長大了，不再是深印腦海中的BB樣，「我對阿仔最深嘅印象仲係3歲雛型前，之後斷斷續續有見吓面，一齊同佢爺爺嫲嫲飲茶，依家真係見到佢成長咗，又靚仔過我，工作態度好，對人又有禮貌，我了解佢多咗好多。」兩父子現在一碰面會分享工作點滴，小豪希望兒子會向他分享更多，「好似識女仔嗰啲嘢啦。」

兩父子縱使多年不見，但一拍即合，大家有相同嗜好，有許多共同話題，景峰笑言兩父子加上叔叔錢嘉樂都好玩得，又鍾意睇動漫，活像三個大細路。「我哋都攞咗細路仔嘅夢想做出一番事業，好似飛車、打交、動作，我哋三個喺呢方面溝通得好好，因為我哋都係大細路。」小豪外表較嚴肅，外界以為他是一名惡煞，景峰澄清爸爸是個百分百好人，「佢為人好好，仲會講好多爛gag！」

龐景峰同父異母的弟弟愛賽車

至於同父異母的弟弟錢穎德，景峰與他的年齡相差12年，坦言兩兄弟較少見面，但會盡量爭取機會連繫兄弟感情，但今個暑假未有機會，因為德德與前DJ媽咪丘倩鳴遠赴西班牙和英國旅行玩賽車，順道探望親友，小豪說：「所以呢段時間我咪同大仔一齊宣傳電影囉！」

現年14歲的德德最喜歡玩賽車，夢想是參加F1世界一級方程式賽車，小豪希望德德努力向目標進發。景峰笑言自己有玩過賽車，但興趣一般，「我啱啱拍戲先炒咗叔叔幾部車，對唔住叔叔！揸車係好玩，但我冇passion喺呢度，我寧願去做忍者，爬上樹做忍者好好玩㗎！」