2024香港小姐︱重溫決賽7大重點！必睇葉蒨文率後輩演出獲激讚

2024香港小姐競選︱1. 全女班卡士 網民嫌零火花

今年《2024香港小姐競選決賽》大會特別以「Proud To Be A Woman」為主題，首次採用全女班陣容。從大會司儀到評判，再到表演嘉賓，均由女性藝人或名媛擔任。不過有網民就嫌全女班卡士太寡，認為需要有男藝人在場搞氣氛才有火花：「都唔知邊個嘅屎橋, 全部女人, 寡到死, 無男人搞吓笑邊好睇架, 淨睇紅地毯啲卡士已經悶死」「上年4個悶蛋收視低 佢地以為係主男班搞到收視低」「睇下麥美恩可唔可以做搞笑擔當」等。

2024香港小姐競選︱2. 部分佳麗廣東話唔正 「呢位」最過分

今年《香港小姐競選》依然有幾位佳麗不擅廣東話，包括7號秦冀雯、9號陳甜甜和11號梁嘉莹等人。在問答環節中，網民提到7號秦冀雯「好大隻，隨時可以一拳打死人」，秦冀雯就即刻笑住回應自己小時候的確試過打同學；而9號陳甜甜就被網民批評連廣東話都講唔好，可以如何代表香港，陳甜甜就回應道：「其實我覺得代表香港可以有好多方式，例如話睇甜甜訪問覺得佢講廣東話好搞笑」，不過網民都話聽到一半都已經聽唔明佢講咩。

2024香港小姐競選︱3. 才藝表演質素參差14號京劇最有睇頭

今年才藝表演環節非常有睇頭，唱歌跳舞、鋼琴表演、空中瑜伽，甚至連京劇、劍舞都有。雖然才藝表演多元化，但質素都非常參差。表演唱歌的1號佳麗陳紫佟Jessie不停走音，負責跳舞的2號倪樂琳、5號莊曉婷和9號陳甜甜等佳麗亦表演得麻麻，10號吳芷靖表演舞劍更嚴重失手，成把劍飛落睇下；相反，表演京劇的14號楊梓瑤、表演鋼琴的4號謝淑怡和表演中國鼓的11號梁嘉莹就有超水準發揮，最後由14號楊梓瑤捧走「才藝女神大獎」。

2024香港小姐競選︱4. 泳裝問答環節多重點 14號再奪最高分

選出10強後，一班佳麗身穿泳裝再進行問答環節，不少問題都非常刁鑽，很考一班佳麗急才。其中10號吳芷靖就被問到「如果TVB委託妳同汪阿姐講要炒佢，你會點同佢講」，鏡頭即刻影住汪明荃，場面非常搞笑。其他佳麗的答案亦非常創新，例如11號梁嘉莹就提到會同熊貓唱粵曲推廣香港；14號楊梓瑤就認為最具代表香港的14號楊梓瑤「雙餸飯」為「楊枝甘露飯」，二人分別獲得全場第一二高分67分和74分，最後亦由14號楊梓瑤再奪獎，獲得「智囊百選女神大獎」。

2024香港小姐競選︱5. 佳麗講嘢好唔正 令觀眾諗起新何太金句

直到選出4強後，4位佳麗大玩辯論環節，2號倪樂琳和10號吳芷靖就以「香港應該設立『男女共用廁所』」為題作討論；11號梁嘉莹和14號楊梓瑤就討論「『分居婚姻』應該在香港推行」。

四強佳麗中有三位都不是土生土長的香港人，以致發音不正，其中14號的「X靜下、分X住 」令網民聯想起新何太金句「你七去瞓、矛根治我」，亦有網民不滿一班佳麗連廣東話都講唔好：「得一個識廣東話，都係上屆璇美人最掂」、「香港小姐講句廣東話都唔正… 究竟睇緊乜」、「2號冠軍啦 得佢土生土長 個樣又ok ，問答又得體」等。

2024香港小姐競選︱6. 首創「打棟直播」個別畫面歪位

今年TVB大搞新花樣，在myTV SUPER首度以豎屏模式直播，務求讓觀眾以「更真實、更近距離欣賞總決賽」，不過技術就似乎還沒成熟，部分直播畫面都會歪位，非常影響收看觀感。

2024香港小姐競選︱7. 葉蒨文帶頭表演「近年最高質表演」未能重溫？！

今年壓軸表演嘉賓有闊別港姐舞台31年的葉蒨文，帶領黃洛妍Janees、趙紫諾Sabrina、XiX其中三位成員Crystal＋Charlotte＋Caitlin、趙頌宜、劉詠彤及《校園好聲音—唱響中國》冠軍洪心怡一起表演。雖然今年炎明熹被雪藏未有為港姐擔任嘉賓，但一班新生代女歌手表現不俗，加上《東張西望》有直擊前一晚葉蒨文參與總綵排的盛況，高度參與畀足意見，網民都大讚今次為「郭富城台慶表演之後最高質嘅表演」。可惜這段表演未知是否版權問題，TVB未有即晚上載重溫影片，官方YouTube主要分享選美環節，未能即晚欣賞Sally與後輩的精彩合作！