60歲吳岱融成樂壇最老得獎新人 相愛24年送愛妻冧爆情歌
廣告
60歲無綫藝人吳岱融喺2016年憑《巨輪II》大奸角「高天鷲」一角人氣急升，奸到出汁嘅表現非常亮眼，當年更獲網友盛讚「一個高天鷲救起成套劇」。但原來吳岱融除咗演得，仲好唱得！踏入「登六」之年，吳岱融近日憑著送給愛妻的冧爆情歌〈回去愛你十億秒〉一曲勇奪「共鳴新歌手獎」，成為樂壇最老新人，真係老而彌堅！
撰文、圖片：東方新地｜編輯：Sunday Kiss
吳岱融演得又唱得 憑冧妻歌曲奪獎
演技超班嘅吳岱融，入行前曾經喺歌廳做業餘歌手賺錢養家，原來都係唱得之人！去年為慶祝「登六」，推出歌曲〈回去愛你十億秒〉送畀太太鍾淑慧，外間反應唔錯，日前更於「面包台有您共鳴頒獎典禮」中，獲頒「共鳴新歌手獎」，以及憑歌曲 〈我的朋友不簡單〉獲得「共鳴金曲獎」，先前佢為呢首歌拍MV，碌盡人情卡特別邀請張兆輝、歐陽震華、陶大宇等好友助陣㖭！
「登六」仲有大把嘢可以玩 感謝太太支持
成為樂壇最老新人，喜獲兩獎嘅吳岱融鬼咁開心：「得獎當然開心啦！冇諗到自己可以喺『登六』之年成為新人歌手，多謝各位觀眾朋友、粉絲一直以嚟對我嘅支持，特別要多謝我太太鍾淑慧、唱片公司老闆同一班好朋友，我會繼續努力。」
