初生嬰兒飲水影響腎功能？營養師解答新手媽媽餵奶迷思

撰文：營養師AnnieLee | 圖片：新傳媒資料庫 | 編輯：Sunday Kiss

BB需要飲水嗎？

好多時就算係新手爸媽，都會識答：其實BB淨係飲奶就夠啦，最多轉奶粉唔使飲水架。不過，如果係兩母女來聽講座，或是奶奶同新抱來，答案就可能未必一樣。

當我解釋BB 0-6個月其實都唔駛飲水嘅時候，準媽媽就會同媽媽/奶奶細細聲講：嗱，係唔係呀？營養師都話BB唔駛飲水㗎！

點知喺呢個時候，準婆婆/嫲嫲有機會會突然好大反應，然後大聲反駁：「咩姐！ 飲啖水之嘛，有幾大問題啫？你細個嗰陣時咪又係咁俾你飲？ 唔好話飲水，細個驚你唔夠營養，仲會轉奶粉開埋葡萄糖水俾你飲啦！」

世衛建議：0-6個月BB 純母乳餵哺

係，以前老一輩，成日怕阿B唔夠水：人奶怕佢唔夠飽；奶粉怕熱氣；天氣熱流汗；天氣凍又怕皮膚乾燥⋯⋯於是，好多時習慣飲完奶俾BB飲多兩啖水？濕吓個口，覺得飲少少水健康啲。

其實，世衛建議頭6個月BB「純」母乳餵哺 。「純」母乳的意思，是指沒有其他食物和飲料，包括埋水（不過如有需要可添加維他命或礦物質補充劑）。

初生BB飲水影響腎功能？

初生BB唔適合飲水，一方面飲水會影響他們的正常飲奶量和時間表；而且BB的腎臟很小，未發育健全，飲水有機會影響BB的腎功能，甚至水中毒。

一個家庭迎接一個初生B，全家上下都一定緊張期待， 但好多時大家可能都會有自己湊B的一套。有時過份緊張，有時危機意識不足，但有更多時侯，可能唔夠與時並進。所以迎接一個新的家庭成員，最好大家都花少少時間去增值一下，學習一啲最科學，最安全的湊B方法幫助嬰兒發展，成個家庭先可以真係開開心心迎接小生命來臨。

參考資料：

* http://apps.who.int/gb/archive/pdf_files/WHA55/ea5515.pdf?ua=1

**Am J Dis Child. 1991 Sep;145(9):985-90.

作者介紹：營養師 Annie Lee（食物及營養學學士、香港營養師學會 (HKNS) 認可營養師）

家有三寶，一囡和一對龍鳳胎。於體檢中心任職營養師，撰寫多個健康專欄，舉辦健康講座，分享貼地的母嬰和育兒的經驗及營養資訊。